প্ৰবীণ কাচোৱান নামৰ ভাৰতীয় বন সেৱা বিষয়া এজনে ছ’চিয়েল মিডিয়াত প্ৰকাশ কৰা কাজিৰঙাৰ সোণালী বাঘৰ ছবিয়ে সম্প্ৰতি যথেষ্ট বিতৰ্কৰ সৃষ্টি কৰিছে।
বিষয়াজনে এইয়া দেশৰে নহয় বিশ্বৰ একমাত্ৰ সোণালী বাঘ বুলি শ্বেয়াৰ কৰিছিল। তেওঁৰ মতে এইয়া ভাৰতত থকা একমাত্ৰ সোণালী বাঘ৷
কাজিৰঙাত এই বাঘৰ ফটো তুলিছিল ৱাইল্ড লাইফ ফটোগ্ৰাফাৰ ময়ুৰেশ হেন্দ্ৰেই।
এই ছবি ছ’চিয়েল মিডিয়াত শ্বেয়াৰ হোৱাৰ পাছতেই স্পষ্টিকৰণ দিছে কাজিৰঙা ৰাষ্ট্ৰীয় উদ্যান কৰ্তৃপক্ষই।
বাঘৰ চেনেটিক বৈষ্যমৰ বাবেই বাঘৰ চালৰ বৰণ কেতিয়াবা এনেকুৱা হয় বুলি জনাইছে উদ্যান খনৰ গৱেষণা বিষয়া ৰবীন্দ্ৰ শৰ্মাই৷
কৰ্তৃপক্ষৰ মতে বিগত সময় চোৱাত কাজিৰঙাত বাঘ গণনাৰ বাবে স্থাপন কৰা কেমেৰা ট্ৰেপত ইতিমধ্যেই এনে ধৰণৰ ছালৰ বৰণ সলনি হোৱা আৰু তিনিটা বাঘৰ ফটো পোৱা গৈছে বুলি জনাইছে উদ্যান কৰ্তৃপক্ষই।
প্ৰকৃততে নাহৰফুটুকী বাঘৰ বৰণ সলনি হৈ ঘোঙলৈ পৰিণত হোৱাৰ দৰে ঢেকীয়াপতীয়া বাঘৰ শৰীৰ হালধীয়া আৰু ক’লা বৰণৰ ঢেকীয়া পাতৰ দাগৰ ৰূপান্তৰ হৈ কেতিয়াবা সোণালী বৰণ হোৱা দেখা যায়৷
এইয়া চিৰিয়াখানাত দেখিবলৈ পোৱা বগা বাঘৰ দৰেই এক পৰিঘটনা বুলি উল্লেখ কৰিছে গৱেষণা বিষয়া গৰাকীয়ে৷
২০০৮ চনৰ বাঘ গণনাৰ সময়ত চিমলিপাল টাইগাৰ ৰিজাৰ্ভত এটা কলা বৰণৰ ঢেকীয়াপতীয়া বাঘ পোৱা বুলিও তেওঁ জনাইছে।
বাঘৰ শৰীৰত থকা আগ’তি জিনেই বাঘৰ শৰীৰৰ হালধীয়া বৰণ নিয়ন্ত্ৰন কৰে৷ শৰীৰত ইয়াৰ বৈষম্যই কেতিয়াবা সোণলী বৰণৰ সৃষ্টি কৰে৷
কাজিৰঙা ৰাষ্ট্ৰীয় উদ্যানৰ বিভিন্ন প্ৰান্তত এই বৰণৰ আৰু কেইবাটাও বাঘ আছে বুলিও উদ্যান কৰ্তৃপক্ষই জনাইছে৷ এই তিনিটা বাঘৰ ছবিও প্ৰকাশ কৰিছে কৰ্তৃপক্ষই।
এইয়া ঢেকীয়াপতীয় বাঘৰ কোনো নতুন প্ৰজাতি নহয় বৰং এক প্ৰাকৃতিক পৰিঘটনাহে৷
