ভূমিস্খলনত ক্ষতিগ্ৰস্ত কৰ্ণাটকৰ ৱায়নাডৰ লোকসকললৈ পুঁজি আগবঢ়ালে কেৰালাৰ চিপিআই(এম) দলৰ বিধায়ক সকলে।
কেৰালাৰ চিপিআই(এম) সকলো বিধায়কে এমাহৰ দৰমহা আগবঢ়াইছে কৰ্ণাটকৰ মুখ্যমন্ত্ৰীৰ সাহায্য পুঁজিলৈ।
উল্লেখ কৰাৰ প্ৰয়োজন যে যোৱা মঙলবাৰে হোৱা ভূমিস্খলনৰ উদ্ধাৰৰ কাম এতিয়াও অব্যাহত আছে। এতিয়ালৈকে ৪০০ ৰো অধিক লোকৰ মৃতদেহ উদ্ধাৰ কৰিছে উদ্ধাৰকাৰী দলে। লগতে এতিয়াও মাটিৰ তলত সমাধিস্থ তথা নিৰুদ্দেশ হৈ আছে বহুতো লোক।
জানিব পৰা মতে, বাওঁপন্থী শাসিত কেৰালা বিধানসভাৰ ৬২ গৰাকী চিপিআইএম বিধায়কে নিজৰ সম্পূৰ্ণ দৰমহা অৰ্থাৎ ৫০ হাজাৰ টকা সাহায্য পুঁজিত জমা দিয়াৰ সিদ্ধান্ত লৈছে। এনেদৰে মুখ্যমন্ত্রীৰ সাহায্য পুঁজিত মুঠ ৩১ লাখ টকা জমা হ’ব।
কেৰালাৰ মুখ্যমন্ত্রী পিনাৰায়ী বিজয়নে ইতিমধ্যে এক লাখ টকা আৰু তেওঁৰ পত্নী টি কে কমলাই এই পুঁজিলৈ ৩৩ হাজাৰ টকা আগবঢ়াইছে৷
ইয়াৰ পূৰ্বে চিপিআইএমৰ ৰাজ্যিক সম্পাদক এম ভি গোবিন্দই দলৰ হৈ মুখ্যমন্ত্ৰীৰ দুৰ্যোগ সাহায্য পুঁজিলৈ ২৫ লাখ টকাৰ বৰঙণি আগবঢ়াইছিল। তেওঁ লগতে জনায় যে দলৰ ত্ৰিপুৰা আৰু তামিলনাডুৰ চিপিআই(এম) দলে ক্ৰমে ২০ লাখ আৰু ১০ লাখ টকাৰ সাহায্য প্ৰদান কৰিছে।
ইফালে দক্ষিণ ভাৰতৰ বহু তাৰকাইও সহায়ৰ হাত আগবঢ়াইছে। আল্লু অৰ্জুনে মুখ্যমন্ত্ৰীৰ সাহায্য পুঁজিলৈ ২৫ লাখ টকা আগবঢ়াইছে। মালয়ালম অভিনেতা মামুটী আৰু তেওঁৰ পুত্ৰ দুলকুৰ ছালমানে যৌথভাৱে মুখ্যমন্ত্ৰীৰ সাহায্য পুঁজিলৈ ৩৫ লাখ টকা আগবঢ়াইছে। জ্যোতিকা, কাৰ্তি আৰু সূৰ্য্যই একেলগে ৫০ লাখ টকা আগবঢ়াইছে। তামিল অভিনেতা বিক্ৰমে ভুক্তভোগীৰ বাবে ২০ লাখ টকাৰ অনুদান আগবঢ়াইছে।
প্ৰসংগক্ৰমে কেৰালাৰ ৱেইনাডত ভূমিস্খলনে ব্যাপক ক্ষতিসাধন কৰিছে। মঙলবাৰে পুৱাই ভূমিস্খলনৰ ফলত গাঁওসমূহত পানী সোমাবলৈ আৰম্ভ কৰে। মুণ্ডক্কাই, চুৰমালা, আট্টামালা আৰু নুলপুজা গাঁও ভূমিস্খলনৰ ফলত আটাইতকৈ বেছি ক্ষতিগ্ৰস্ত হয়। নিশ্চিত নোহোৱা সূত্ৰৰ মতে, এই পৰ্যন্ত ৩৫০ৰো অধিক মৃতদেহ উদ্ধাৰ কৰা হৈছে। বহু ঘৰৰ ক্ষতিসাধন হৈছে। সেনা, নৌসেনা আৰু ৰাষ্ট্ৰীয় দুৰ্যোগ সঁহাৰি বাহিনীৰ ১৬০০ জোৱানে উদ্ধাৰ অভিযান চলাই আছে। কিন্তু অবিৰত বৰষুণৰ বাবে উদ্ধাৰ কামত বাধাৰ সৃষ্টি হৈছে। ৰাজ্যৰ ১০০ৰো অধিক সাহায্য শিবিৰত ১০ হাজাৰৰো অধিক লোকক আশ্ৰয় দিয়া হৈছে।
