উৎকোচক লৈ আদানিৰ বিৰুদ্ধে সৰৱ বিৰোধী ইণ্ডিয়া ব্লক। কংগ্ৰেছৰ লগতে মিত্ৰ দলসমূহেও আদানিক লক্ষ্য কৰি লৈছে। ইপিনে, কেৰালাৰ বাওঁ মৰ্চাৰ চৰকাৰে আদানিৰ সৈতে ৰাজ্যখনৰ বন্দৰ সন্দৰ্ভত এক পৰিপূৰক চুক্তিত স্বাক্ষৰ কৰিছে।
উল্লেখ্য যে কেৰালাৰ ভিজিঞ্জামত পাব্লিক-প্ৰাইভেট পাৰ্টনাৰশ্বিপৰ অধীনত এটা বন্দৰ গঢ়ি তোলা হৈছে। বন্দৰ নিৰ্মাণ প্ৰকল্পৰ মুঠ ব্যয় হ’ব ৭৭০০ কোটি। এই বন্দৰৰ সৈতে নতুন চুক্তিৰ লগে লগে কেৰেলা চৰকাৰৰ ৰাজহ একেবাৰতে বহু পৰিমাণে বৃদ্ধি পালে।
প্ৰতিবেদনত দাবী কৰা হৈছে যে ২০২৮ চনৰ ডিচেম্বৰৰ ভিতৰত কেৰালাৰ এই বন্দৰত কণ্টেইনাৰ উঠা-নমাৰ কাম আৰম্ভ হ’ব। এই পৰিপ্ৰেক্ষিতত কেৰেলাৰ বন্দৰ মন্ত্ৰী ভি এন বাছাৱনে এই নতুন পৰিপূৰক চুক্তিৰ বিষয়ে কয়, ‘২০২৮ চনৰ ডিচেম্বৰৰ ভিতৰত বন্দৰৰ সম্প্ৰসাৰণ সম্পূৰ্ণ হ’ব। এই পৰিস্থিতিত পূৰ্বতে ভবা হৈছিল যে এই বন্দৰৰ পৰা ৩৬ বছৰত ৫৪,৭৫০ কোটি ৰাজহ হ’ব। এতিয়া অনুমান কৰা হৈছে যে ৰাজহ ২,১৫,০০০ কোটি টকালৈ বৃদ্ধি পাব। এই বন্দৰৰ পৰা চৰকাৰৰ আয়ৰ অংশ ৬৩০০ কোটিৰ পৰা ৩৫,০০০ কোটিলৈ বৃদ্ধি পাইছে।‘
নতুন চুক্তি অনুসৰি বন্দৰ নিৰ্মাণত পলম হোৱাৰ পিছতো ২০৩৪ চনৰ পৰা কেৰালা চৰকাৰে ৰাজহৰ অংশ লাভ কৰিবলৈ আৰম্ভ কৰিব। পূৰ্বৰ চুক্তিত কোৱা হৈছিল যে যদি বন্দৰৰ কামত পলম হয় তেন্তে চৰকাৰৰ ঘৰত আয়ৰ অংশ সোমাবলৈ ২০৩৯ চন পাব পাৰে। ইফালে এই নতুন চুক্তিৰ ফলস্বৰূপে কেৰালা চৰকাৰে বন্দৰৰ চাৰিটা পৰ্যায়ৰ পৰা আদানিৰ পৰা লভ্যাংশ লাভ কৰিব। পূৰ্বৰ চুক্তিত কোৱা হৈছিল যে বন্দৰটোৰ প্ৰথম পৰ্যায়তহে চৰকাৰক লভ্যাংশ প্ৰদান কৰা হ’ব।
ইপিনে, এই বন্দৰৰ ফলত কেৰালাৰ পৰোক্ষ আয়ো বৃদ্ধি পাবলৈ গৈ আছে। চুক্তিৰ ম্যাদত এই বন্দৰৰ পৰা কেৰালাৰ বাবে জি এছ টি ৰাজহ ২৯,০০০ কোটি টকা। আনহাতে, এই বন্দৰৰ পৰা বছৰি ১০ লাখ কণ্টেইনাৰ উঠা-নমাৰ লক্ষ্যৰে প্ৰথমে কাম আৰম্ভ কৰা হৈছিল। কিন্তু এতিয়া জনা গৈছে যে এই বন্দৰলৈ বছৰি ৪৫ লাখ কণ্টেইনাৰ উঠা-নমা কৰিব পৰা যাব।
এই দৃশ্যপটত কেৰালাৰ এই ভিজিঞ্জাম দক্ষিণ ভাৰতৰ সৰ্ববৃহৎ বাণিজ্যিক বন্দৰ হৈ পৰিব। ইফালে নতুন চুক্তিৰ ফলস্বৰূপে কেৰালা চৰকাৰৰ ওপৰত ‘চাপ’ কমিবলৈ গৈ আছে। ইয়াৰ পূৰ্বে এই বন্দৰ নিৰ্মাণৰ বাবে কেৰালা চৰকাৰে ৪০৮.৯ কোটি টকা দিব লাগিছিল। কিন্তু নতুন চুক্তিৰ ফলত কেৰালা চৰকাৰে ৩৬৫.১০ কোটি টকাহে দিব লাগিব।
