দেশত উদ্বেগজনক হাৰত ধৰ্ষণৰ ঘটনা বৃদ্ধি পোৱাৰ সময়তে কেৰালাৰ এখন আদালতে আজি এক বলাৎকাৰীক এনে ঘৃণনীয় অপৰাধৰ বাবে কঠোৰ শাস্তি ঘোষণা কৰিছে।
নিজ কন্যাক উপৰ্যুপৰি ধৰ্ষণ আৰু এই ধৰ্ষণৰ ফলত কিশোৰী কন্যাগৰাকীক গৰ্ভধাৰণ কৰোৱাৰ অপৰাধত এগৰাকী ব্যক্তিক ৩১ বছৰৰ কাৰাদণ্ডৰ শাস্তি প্ৰদান কৰিছে আদালতে।
প্ৰকাশিত খবৰ অনুসৰি, এই ধৰ্ষণকাণ্ড সংঘটিত হৈছিল ২০১৬ চনত। কেৰালাৰ ইডুক্কি জিলাৰ কননাথাডি নামৰ এখন গাঁৱত সংঘটিত হৈছিল এই নিৰ্লজ্জ কাণ্ড।
ঘৰত কোনো নথকাৰ সুযোগ লৈ নিশাৰ ভাগত লম্পট ব্যক্তিগৰাকীয়ে সেই সময়ত ১৪ বছৰীয়া নিজৰ কন্যাক কেইবাবাৰো যৌন নিৰ্যাতন চলাইছিল।
গৰ্ভপাত কৰা ভ্ৰুণৰ পৰা উদ্ধাৰ কৰা ডি এন এ প্ৰমাণৰ ভিত্তিত ফাষ্ট ট্ৰেক আদালতৰ ন্যায়াধীশ টি জি ভাৰ্গেজে অভিযুক্ত ব্যক্তিগৰাকীক দোষী সাব্যস্ত কৰি শাস্তি প্ৰদান কৰে।
আদালতে শুনানি গ্ৰহণ কৰি পিতৃয়ে নিজ কন্যাক ধৰ্ষণ কৰি গৰ্ভধাৰণ কৰোৱাটো এক অত্যন্ত জঘন্য কৰ্ম আৰু অভিযুক্ত এনে অপৰাধৰ বাবে দয়াৰ যোগ্য নহয় বুলি ৰায়ত উল্লেখ কৰে।
যৌন অপৰাধৰ পৰা শিশু সুৰক্ষা (POCSO) আইন অনুসৰি অভিযুক্তক ৩১ বছৰৰ কাৰাদণ্ডৰ শাস্তি প্ৰদান কৰা হয়।
আদালতে লগতে তেওঁৰ ওপৰত ৭৫ হাজাৰ টকা জৰিমনা বিহে আৰু জিলা আইন সেৱা কৰ্তৃপক্ষক ভুক্তভোগী কিশোৰীগৰাকীক পুনৰ্বাসনৰ বাবে ৫০ হাজাৰ টকা ক্ষতিপূৰণ দিবলৈ নিৰ্দেশ দিয়ে।