নীতি আয়োগে আৰম্ভ কৰা চতুৰ্থ স্বাস্থ্য সূচক অনুসৰি কেৰালা দেশৰ ৰাজ্যসমূহৰ মাজত সামগ্ৰিক স্বাস্থ্য প্ৰদৰ্শনৰ ক্ষেত্ৰত শীৰ্ষ স্থানত আছে।
আনহাতে দেশৰ শীৰ্ষ স্থানৰ ৰাজ্য হিচাপে ঢাক-ঢোল বজোৱা যোগী আদিত্যনাথৰ উত্তৰ প্ৰদেশে তালিকাৰ আটাইতকৈ নিম্ন স্থানত অৱস্থান কৰিছে।
অৱশ্যে পূৰ্বৰ বৰ্ষতকৈ উত্তৰ প্ৰদেশে এই ক্ষেত্ৰত এই সূচাংকত কিছু উন্নত প্ৰদৰ্শন দেখাবলৈ সক্ষম হয়।
তালিকাৰ ১২ নং স্থানত অৱস্থান কৰিছে অসমে। অৱশ্যে পূৰ্বৰ প্ৰদৰ্নতকৈ ৪.৩৫ সূচাংকৰ অগ্ৰগতিৰে বৰ্দ্ধিত প্ৰদৰ্শনৰ ক্ষেত্ৰত দ্বিতীয় স্থানত থাকে।
স্বাস্থ্য সূচকৰ চতুৰ্থ ৰাউণ্ডত প্ৰসংগ বৰ্ষ হিচাপে ২০১৯-২০ বৰ্ষক বিবেচনা কৰা হৈছিল।
প্ৰতিবেদন অনুসৰি তামিলনাডু আৰু তেলেংগানা স্বাস্থ্যৰ মাপকাঠিৰ ওপৰত ক্ৰমান্বয়ে দ্বিতীয় আৰু তৃতীয় শ্ৰেষ্ঠ প্ৰদৰ্শনকাৰী হিচাপে চিহ্নিত হৈছে।
আনহাতে ক্ষুদ্ৰ ৰাজ্য সমূহৰ ভিতৰত মিজোৰাম সামগ্ৰিক প্ৰদৰ্শনৰ লগতে বৰ্ধিত প্ৰদৰ্শনত সৰ্বশ্ৰেষ্ঠ প্ৰদৰ্শনকাৰী হিচাপে তালিকাভুক্ত হয়।
আনহাতে কেন্দ্ৰীয় শাসিত অঞ্চলসমূহৰ ভিতৰত চণ্ডীগড় তালিকাৰ শীৰ্ষত থাকে। দিল্লী আৰু জম্মু-কাশ্মীৰ সামগ্ৰিক প্ৰদৰ্শনৰ ক্ষেত্ৰত নিম্ন স্থান লাভ কৰে কিন্তু বৰ্ধিত প্ৰদৰ্শনৰ ক্ষেত্ৰত শীৰ্ষ দুই স্থানত থাকে।
বিশ্ব বেংকৰ কাৰিকৰী সহায়ত স্বাস্থ্য আৰু পৰিয়াল কল্যাণ মন্ত্ৰালয়ৰ সহযোগত প্ৰতিবেদনখন প্ৰস্তুত কৰা হৈছে।