খাকী ছবিখনৰ নাম ইতিমধ্যেই অসমৰ ৰাইজৰ অৱগত। ছবিখনৰ কাহিনী, চিত্ৰনাট্য লিখিছে অতনু ভূঞাই। ছবিখন পৰিচালনাও কৰিছে অতনু ভূঞায়েই। যোৱা ২৭ ফেব্ৰুৱাৰী তাৰিখে মুক্তিপ্ৰাপ্ত এই ছবিখন অতনু ভূঞাৰ দ্বাৰা পৰিচালিত প্ৰথমখন ছবি। খাকী বৰ্তমান অসমৰ ভিন্ন ছবিগৃহত চলি আছে।
চিনেমাৰ আৰম্ভণিতে অসমৰ বৰ্তমানৰ মুখ্যমন্ত্ৰীৰ শপতগ্ৰহণ অনুষ্ঠানৰ কিয়দংশ নেপথ্যত বজাই থাকে। লগতে তেওঁৰ কিছু অনুৰাগীৰ ভাষ্যও। যদিওবা মুখ্যমন্ত্ৰীগৰাকীৰ নাম স্পষ্টকৈ উল্লেখ কৰা নাই, কিন্তু “মামা” বুলি ঠিকেই উল্লেখ কৰিছে। আৰম্ভণিয়েই কিছু আভাস দিয়ে ছবিখন কেনে হ’ব!
পৰৱৰ্তী সময়ত আৰক্ষীৰ ওপৰত অধিক চিত্ৰায়ণ কৰা হয়, যিহেতু ছবিখনৰ নামেই খাকী। আৰক্ষীৰ এক এনকাউণ্টাৰ দেখুওৱা হয়, প্ৰাক্তন বিধায়িকা মনোৰমা গগৈৰ ভাতৃ বিপুল গগৈৰ। এইখিনিতে চিনেমাই ফ্লেছবেকত গতি কৰে। আৰক্ষী বিষয়া (আই চি) এছ এন ভাগৱতী (পৱন গায়ন)ৰ কৰ্মসূত্ৰে বদলি হয় অসমৰ এখন সৰু চহৰলৈ। চহৰখনলৈ অহাৰ পিছত আৰক্ষী বিষয়াজন আৰু তেওঁৰ পত্নী গীতু (শ্ৰেয়া বৰঠাকুৰ)ৰ জীৱনত কি কি ঘটে, আৰক্ষী থানাত কি কি ঘটে, ১৫ বছৰৰ শাসন চলি থকা বিৰোধী ৰাজনৈতিক দলৰ প্ৰেক্ষাপটত হোৱা কিছু ঘটনাক লৈ ছবিখন আগবঢ়োৱাৰ চেষ্টা কৰে পৰিচালক, কাহিনীকাৰ ভূঞাই।
এইখিনিতে আহিছোঁ চিনেমাৰ কাহিনীলৈ। খাকীত কাহিনী বুলিবলৈ একো নাই, মাথোঁ টুকুৰা-টুকুৰি খণ্ডচিত্ৰ কিছুমান জোৰা লগাই কাহিনীৰ এক ৰূপ দিয়াৰ চেষ্টা কৰা হৈছে। খাকীৰ মূল বাৰ্তা হ’ল শাসকীয় দলৰ ৰাজনৈতিক প্ৰচাৰ, আৰু ১৫ বছৰ শাসনত থকা বিৰোধীৰ ত্ৰুটি আৰু সাম্প্ৰদায়িক ৰাজনীতি (হিন্দু-মুছলমান) দ্বাৰা আনিবলৈ চেষ্টা কৰা বিভাজন। সংখ্যালঘু সংখ্যালঘু বুলি বাল্যবিবাহৰ নামত মিঞাৰ ওপৰত অত্যাচাৰ দেখুওৱা হৈছে শাসকীয় দলৰ শাসনকালত। আৰক্ষীৰ সফলতা বুলি দৰ্শোৱা হৈছে এইখিনিক। ছবিখন ইমানেই আমনিদায়ক যে, আৰম্ভণিৰ কিছু সময়ৰ পিছৰ পৰাই ই কেতিয়া শেষ হয়, কেতিয়া শেষ হয় লাগিছিলে।
দ্বিতীয়াৰ্ধৰ পিছৰ সময়লৈ দৰ্শোৱা হয় কিদৰে পূৰ্বৰ ৰাজনৈতিক হেঁচাত ঘোচ খাই দুৰ্নীতিত লিপ্ত হোৱা আৰক্ষীসকলে নতুন অৰ্থাৎ শাসকীয় চৰকাৰ গঠন হোৱাৰ পিছৰে পৰাই সকলো দুৰ্নীতিমুক্ত হৈ, নিকা হৈ, আৰু কোনো ৰাজনৈতিক হেঁচা নোহোৱাকৈ মুক্তমনে নিজৰ কৰ্তব্য পালন কৰিব পৰা হৈ পৰিলে। কাজেই খাকীয়ে বৰ্তমানৰ চৰকাৰখনৰ ভূয়সী প্ৰশংসা কৰাৰ লগতে দেখদেখকৈ অনাগত নিৰ্বাচনৰ প্ৰচাৰকে চলোৱাৰ কথা স্পষ্ট। সমগ্ৰ ছবিখনতেই হিন্দু-মুছলমানৰ বিভাজনৰ ৰাজনীতি স্পষ্ট। ছবিখনৰ উদ্দেশ্য স্পষ্ট আছিল, আৰু এই দিশৰ পৰা এখন ৰাজনৈতিক উদ্দেশ্যধৰ্মী প্ৰচাৰমূলক (প্ৰপাগাণ্ডা) চিনেমা হিচাপে খাকী সফল। এটা সংলাপ আছে খাকীত— “চব মুছলমান কিন্তু অপৰাধী নহয়”— কিম্ অধিকম্!
অভিনয়ৰ ক্ষেত্ৰত সুযোগ আছিল আৰক্ষী বিষয়া ভাগৱতীৰ ভূমিকাত অভিনয় কৰা পৱন গায়নৰ। পিছে তেওঁৰ অভিনয় চকুত লগাকৈ শোচনীয়। অৰুণ নাথৰ অভিনয়ৰ সুযোগ নাই যদিও যিকণ সময় অভিনয় কৰিছে ভাল বুলিবই লাগিব। ছবিখনৰ সম্পাদনাৰ দিশটো অতি দুৰ্বল। মুঠতে খাকী চাবলৈ গৈ ২ ঘণ্টা ৫৭ মিনিট সময় কোনো কাৰণতে অপব্যয় কৰিব নোৱাৰি।
mail- [email protected]
