কৃষক বিদ্ৰোহৰ জোকাৰণি এতিয়া কেৱল ভাৰততে আৱদ্ধ হৈ থকা নাই।
কানাডা, ব্ৰিটেইন, আমেৰিকা আদি দেশত ন্যায় প্ৰাপ্তিৰ বাবে যুঁজ দি থকা ভাৰতীয় কৃষকসকলৰ বাবে ওলাই আহিছে বহু লোক।
এনে সময়তে কৃষক বিদ্ৰোহ সমৰ্থন কৰাৰ নামত আমেৰিকাত খালিস্তানৰ সমৰ্থ একাংশ লোকে সংঘটিত কৰিছে এক দুষ্কাৰ্য।
খালিস্তানৰ সমৰ্থকে আমেৰিকাৰ ৱাশ্বিংটনত তকা জাতিৰ পিতা মহাত্মা গান্ধীৰ প্ৰতিমূৰ্তিত ক’লা ৰং সানি দিয়াৰ লগতে মহাত্মাৰ প্ৰতিমূৰ্তিৰ কাষতে খালিস্তানৰ পতাকা উৰুওৱাৰ কথাই তীব্ৰ প্ৰতিক্ৰিয়াৰ সৃষ্টি কৰিছে।
ভাৰতৰ কৃষক বিদ্ৰোহত মলতঃ পাঞ্জাৱৰ গৰিষ্ঠ সংখ্যক কৃষকে ভাগ লোৱাৰ সুযোগ গ্ৰহণ কৰি বিদেশত খালিস্তানৰ সমৰ্থকে নতুন ৰূপত শক্তি প্ৰদৰ্শন কৰিব বুলি আশংকা ঘনীভূত হোৱাৰ সময়তে সেই আশংকাক সঁচা প্ৰমাণ কৰি আমেৰিকাত খালিস্তানৰ সমৰ্থকে মহাত্মা গান্ধীৰ প্ৰতিমূৰ্তিক আক্ৰমণৰ লক্ষ্য হিচাবে বাচি লৈছে।
খালিস্তানৰ সমৰ্থকে আনকি ভাৰতৰ প্ৰধানমন্ত্ৰী নৰেন্দ্ৰ মোদীৰ ছবিতো ক’লা ৰং সানি দিয়ে।
আমেৰিকাত সংঘটিত এই ঘটনাত তীব্ৰ প্ৰতিক্ৰিয়া ব্যক্ত কৰিছে দেশ খনত থকা ভাৰতীয় দূতাবাসে।
দুস্কৃতিকাৰীসকলৰ বিৰুদ্ধে কঠোৰ ব্যৱস্থা গ্ৰহণৰ দাবী জনাইছে ভাৰতীয় দূতাবাসৰ উৰ্ধতন বিষয়াই।
উল্লেখ্য তিনি খনকৈ বিতৰ্কিত কৃষি আইন বাতিলৰ দাবীত যোৱা ১৮ দিন ধৰি দিল্লীত কৃষকসকলে আন্দোলন চলাই গৈছে।
