খিলঞ্জীয়া মঞ্চ, অসমে প্ৰভাৱশালী ৰাজনীতিক “বদৰুদ্দিন আজমলৰ নিচিনা’’ লোকসকলক বৰাক-ব্ৰহ্মপুত্ৰ উপত্যকাৰ “খিলঞ্জীয়া”ৰ স্বীকৃতিৰ পৰা আঁতৰত ৰখাৰ পোষকতা কৰিছে।
মঞ্চটোৱে নিজৰ মতৰ আধাৰত যুগুতোৱা এশটাতকৈ অধিক খিলঞ্জীয়া গোষ্ঠীৰ এক তালিকা শুকুৰবাৰে অসম চুক্তিৰ ৬নং দফা ৰূপায়ণ সম্পৰ্কীয় পৰামৰ্শদাতা সমিতিক দাখিল কৰিছে।
খিলঞ্জীয়াৰ অস্তিত্ব বিপন্ন হোৱাৰ পৰা বচোৱাৰ বাবে মঞ্চই “খিলঞ্জীয়া” নিৰ্ধাৰণত কোনো ভিত্তিবৰ্ষ নাৰাখিবলৈ সমিতিক পৰামৰ্শ আগবঢ়াইছে।
“কোনো ভিত্তিবৰ্ষ লৈ খিলঞ্জীয়াৰ সংজ্ঞা নিৰ্ধাৰণ কৰিব নালাগে। যদি ১৯৫১ চন হয়, তেন্তে বদৰুদ্দিন আজমলৰ নিচিনা মানুহে খিলঞ্জীয়া হিচাপে স্বীকৃতি পাব। তেওঁলোকে কৈছে যে দুটা সন্তান নীতি মানি নলৈ ১০-২০ টা সন্তান জন্ম দিব, ই অসমত খিলঞ্জীয়াৰ অস্তিত্ব বিপন্ন কৰিব,” সমিতিৰ সৈতে গুৱাহাটীত বৈঠকৰ পিছত সংগঠনটোৰ নেতা অনুপ চেতিয়াই জনায়।
মঞ্চ ১৯৫১ ভিত্তিবৰ্ষৰ “দুৰ্ঘোৰ বিৰোধী” বুলি উল্লেখ কৰি চেতিয়াই কয় যে “খিলঞ্জীয়া” সন্দৰ্ভত তেওঁলোকে “ৰাষ্ট্ৰ সংঘই নিৰ্ধাৰণ কৰা সংজ্ঞা” গ্ৰহণ কৰিছে।
“ঔপনিৱেশিকতাবাদ (উপনিৱেশ?) আৰম্ভ হোৱাৰ পূৰ্বে যিসকল জনগোষ্ঠীয়ে বসবাস কৰিছিল, সেইসকলেই সেই ভূ-খণ্ডৰ খিলঞ্জীয়া। আমি এটা কথাই কৈছো যে ঐতিহাসিকভাৱে অসমত যিসকলে বসবাস কৰি আহিছে সেইসকলেই খিলঞ্জীয়া,” চেতিয়াই কয়।
খিলঞ্জীয়াৰ সুৰক্ষা সন্দৰ্ভত মত লৈ থকা কেন্দ্ৰগঠিত সমিতিখনক মঞ্চই কৈছে যে অসমৰ অখিলঞ্জীয়াক সাংবিধানিক ৰক্ষাকবচ দিয়া উচিত নহ’ব।
‘ব্ৰহ্মপুত্ৰ উপত্যকাত মুঠ ৮৪ টা জনগোষ্ঠী ক্ষুদ্ৰ জনগোষ্ঠী আছে। এই তালিকাৰ বাহিৰেও দুই এটা জনগোষ্ঠীৰ নাম বাদ পৰি যাব পাৰে।’‘চেতিয়াই কয়।
আনহাতে, বৰাক উপত্যকাৰ ক্ষেত্ৰত ১৭শ শতিকাত ডিমাছা ৰজাৰ ৰাজকীয় চনদ যিসকল জনগোষ্ঠীয়ে লাভ কৰিছিল সেই জনগোষ্ঠীসমূহেই বৰাক উপতক্যাৰ খিলঞ্জীয়া লোক বুলি দাবী কৰি চেতিয়াই কয় ‘বৰাকৰ মুঠ ১৯ টা জনগোষ্ঠীৰ তালিকা উচ্চস্তৰীয় সমিতিৰ হাতত অৰ্পন কৰা হৈছে। ৰাজকীয় চনদ পোৱা জনগোষ্ঠী হ’ল বৰলস্কৰ, বৰভুঞা, লস্কৰ, মাঝাৰ ভুঞা, নাথ-যোগী, মজুমদাৰ, চৌধুৰী, ১২ ঘৰীয়া ব্ৰাহ্মণ, তালুকদাৰ আৰু নমসুদ্ৰ দাস।‘
আনহাতে, শুকুৰবাৰৰ এই আলোচনাত ‘বৰাকৰ পৰা ১৯ টা জনগোষ্ঠীয় সংগঠনৰ প্ৰতিনিধিয়ে যোগদান কৰাটো আটাইতকৈ ডাঙৰ কথা’ বুলি উল্লেখ কৰি চেতিয়াই কয় ‘বৰাকৰ খিলঞ্জীয়া জনসাধাৰণ সজাগ হৈছে। প্ৰকৃত খিলঞ্জীয়াইহে সাংবিধানিক সুৰক্ষা কবচ পোৱা উচিত। যিসকল অখিলঞ্জীয়া লোক তেওঁলোকে কেতিয়াও সাংবিধানিক সুৰক্ষা কবচ পাব নালাগে। খিলঞ্জীয়াৰ অস্তিত্ব আজি অসমত বিপন্ন হৈছে তথা আমি নিঃশেষ হৈ যোৱাৰ উপক্ৰম হৈছো।’
উল্লেখযোগ্য যে, খিলঞ্জীয়া মঞ্চ অসমৰ হৈ অনুপ চেতিয়া মৃণাল হাজৰিকাকে ধৰি অন্যান্য প্ৰতিনিধিসকল উপস্থিত থাকে। উচ্চ স্তৰীয় সমিতিৰ অসমৰ মহাধিবক্তা ৰমেশ বৰপাত্ৰগোহাঞি, অৰুণাচল প্ৰদেশৰ মহাধিবক্তা নিলয় দত্ত, অৱসৰপ্ৰাপ্ত আই এ এছ বিষয়া সুভাষ দাস, অসম আৰক্ষী (বিশেষ শাখা)ৰ প্ৰাক্তন সঞ্চালকপ্ৰধান পল্লৱ ভট্টাচাৰ্য্য, অৱসৰপ্ৰাপ্ত অধ্যাপক সৃষ্টিধৰ দত্ত, লেখক সুমন্ত চলিহা, অধ্যাপক জয়কান্ত শৰ্মা, জ্যেষ্ঠ সাংবাদিক ৱাছবিৰ হুছেইন আৰু সদৌ অসম ছাত্ৰ সন্থাৰ মুখ্য উপদেষ্টা, সভাপতি আৰু সম্পাদক ক্ৰমে ড০ সমুজ্জ্বল কুমাৰ ভট্টাচাৰ্য্য, দীপাংক কুমাৰ নাথ আৰু লুৰিণজ্যোতি গগৈ আলোচনাত উপস্থিত থাকে।