মণিপুৰত অপহৃত তিনিজন শ্ৰমিকক মুকলি কৰি দিলে অপহৰণকাৰীয়ে
মণিপুৰত সন্দেহযুক্ত জনজাতীয় উগ্ৰপন্থীৰ এটা গোটে যোৱা ৬ মাৰ্চত অপহৰণ কৰি নিয়া শ্ৰমিক তিনিজনক মুকলি কৰি দিয়াৰ কথা সোমবাৰে আৰক্ষীয়ে জানিবলৈ দিছে। বাতৰিত প্ৰকাশ পোৱা অনুসৰি অপহৃত শ্ৰমিক তিনিজনক এছ বিজয়, কে গোপেন আৰু কে টেনবা বুলি চিনাক্ত কৰা হৈছে।
অপহৃত শ্ৰমিক তিনিজন থাউবেল জিলাৰ আৰু তেওঁলোকক সন্দেহযুক্ত উগ্ৰপন্থীয়ে সেনাপতি জিলাৰ পৰা অপহৰণ কৰিছিল।
জানিব পৰা মতে, শ্ৰমিক কেইজনে ২নং ৰাষ্ট্ৰীয় ঘাইপথত মেৰামতিৰ কাম কৰি থকাৰ সময়তে অপহৰণৰ ঘটনাটো ঘটিছিল।
বাতৰি অনুসৰি দেওবাৰে মাজনিশা অপহৰণকাৰীয়ে মুকলি কৰি দিয়াৰ পাছত শ্ৰমিক কেইজনে পাহাৰৰ পৰা নামি আহি থাকোতে মণিপুৰৰ সেনাপতি জিলাৰ নাগা পিপুলছ অৰ্গেনাইজেশ্যন (এনপিঅ’)ৰ সদস্যই প্ৰত্যক্ষ কৰে। সোমবাৰে পুৱা ৰাজ্যিক ৰাজধানী এৰাৰ আগতে নাগা পিপুলছ অৰ্গেনাইজেশ্যনে শ্ৰমিক কেইজনক খাদ্য আৰু আশ্ৰয় প্ৰদান কৰে।
নাগা পিপুলছ অৰ্গেনাইজেশ্যনৰ সভাপতি ছল’মন এৰোৰ উদ্ধৃতি দি বাতৰিত কোৱা হৈছে, ‘’আমি এই শ্ৰমিককেইজনৰ সুৰক্ষিত মুক্তিৰ বাবে প্ৰচেষ্টা চলাইছিলো। আমি শ্ৰমিক কেইজনৰ নিৰাপদ মুক্তিৰ দাবী উত্থাপন কৰা ছাত্ৰ সংগঠনকে ধৰি সংগঠনকেইটাক ধন্যবাদ জনাইছো।
পূৰ্বতে আৰক্ষীয়ে দাবী কৰিছিল যে উগ্ৰপন্থীয়ে ৰাজ্যখনত ‘সুৰক্ষা’ৰ ধন (প্ৰটেকশ্যন মানি) আদায়ত বিলম্ব হ’লেই কাম নিয়োজিত শ্ৰমিকক অপহৰণ কৰে।
আনহাতে, জানিব পৰা মতে মণিপুৰৰ মাজেৰে যোৱা ৰাষ্ট্ৰীয় ঘাইপথটোৰ মেৰামতি তথা নিৰ্মাণৰ কাম চলাই থকা বি আই পি এল নামৰ কোম্পানীৰ বিষয়াই এই সন্দৰ্ভত কোনো অভিযোগ দাখিল কৰা নাই।