বিগত দুমাহত কেৰিবিয়ান আৰু প্ৰশান্ত মহাসাগৰত ড্ৰাগছ সৰবৰাহৰ সন্দেহত আমেৰিকাই চলোৱা মাৰাত্মক আক্ৰমণক লৈ ৰাষ্ট্ৰসংঘই কঠোৰ সতৰ্কবাণী দিছে। ৰাষ্ট্ৰসংঘৰ মানৱ অধিকাৰ মুৰব্বী ভলকাৰ টাৰ্কে এই আক্ৰমণসমূহক আন্তঃৰাষ্ট্ৰীয় আইন উলংঘা আৰু ন্যায় বহিৰ্ভূত হত্যাকাণ্ড বুলি অভিহিত কৰিছে। এই আক্ৰমণত আমেৰিকাই ৬০ জনতকৈ অধিক লোকক হত্যা কৰিছে।
ভলকাৰ টাৰ্কে স্পষ্ট কৰি দিছে যে ড্ৰাগছ সৰবৰাহৰ বিৰুদ্ধে যুঁজ দিয়াটো জৰুৰী যদিও মাৰাত্মক আক্ৰমণ ইয়াৰ সমাধান নহয়। তেওঁৰ মতে, জীৱন-মৰণৰ কথা আহিলেহে আইন অনুসৰি এনে শক্তি ব্যৱহাৰ কৰিব পাৰি।
টাৰ্কে আমেৰিকাক আহ্বান জনাইছে যাতে তেওঁলোকে এই আক্ৰমণসমূহ তাত্ক্ষণিকভাৱে বন্ধ কৰে আৰু তাৰ পৰিৱৰ্তে আইনী পদ্ধতি অৱলম্বন কৰে, যেনে: জাহাজ জব্দ কৰা, সন্দেহযুক্ত লোকক আটক কৰা আৰু গোচৰ চলোৱা। তেওঁ লগতে আমেৰিকাই এই আক্ৰমণসমূহৰ বিষয়ে অতি কম তথ্য দিছে বুলিও অভিযোগ কৰে।
আমেৰিকাৰ ৰাষ্ট্ৰপতি ড’নাল্ড ট্ৰাম্পে অৱশ্যে এই আক্ৰমণসমূহৰ পক্ষত থিয় দিছে। তেওঁ যুক্তি দিছে যে অবৈধ ড্ৰাগছ সৰবৰাহ বন্ধ কৰিবলৈ এই আক্ৰমণসমূহ অত্যাৱশ্যকীয়। ট্ৰাম্পে দাবী কৰে যে আন্তঃৰাষ্ট্ৰীয় জলসীমাত এই নাওসমূহত আক্ৰমণ কৰাৰ আইনী অধিকাৰ আমেৰিকাৰ আছে।
এই অঞ্চলসমূহত আমেৰিকাই নিজৰ সামৰিক উপস্থিতি যথেষ্ট বৃদ্ধি কৰিছে, যাৰ ভিতৰত আছে নৌসেনাৰ জাহাজ, যুঁজাৰু বিমান, আৰু বিশ্বৰ অন্যতম ডাঙৰ যুদ্ধজাহাজ ইউ এছ এছ জেৰাল্ড আৰ ফৰ্ড।
আমেৰিকাৰ এই কাৰ্যই লেটিন আমেৰিকাৰ দেশসমূহৰ মাজত তীব্ৰ ক্ষোভৰ সৃষ্টি কৰিছে। মেক্সিকো, কলম্বিয়া, আৰু ভেনিজুৱেলাই আমেৰিকাৰ পদক্ষেপক গৰিহণা দিছে।
ইফালে আমেৰিকাই ড্ৰাগছ সৰবৰাহ ৰোধ কৰাত ব্যৰ্থ হোৱাৰ অভিযোগত কলম্বিয়াৰ ৰাষ্ট্ৰপতি গুস্তাভো পেট্ৰ’ৰ ওপৰত নিষেধাজ্ঞা আৰোপ কৰিছে। আনহাতে, ট্ৰাম্পে ভেনিজুৱেলাৰ ৰাষ্ট্ৰপতি নিকোলাছ মাদুৰোক ড্ৰাগছ মাফিয়াৰ সৈতে গোপন বুজাবুজি কৰাৰ অভিযোগ উত্থাপন কৰিছে।
