নাগৰিকত্ব বিধেয়কৰ বিৰুদ্ধে দ্বিতীয় পৰ্যায়ৰ আন্দোলন ঘোষণা কৰিছে কৃষক মুক্তি সংগ্ৰাম সমিতিয়ে। গুৱাহাটীৰ গান্ধীবস্তিস্থিত কেন্দ্ৰীয় কাৰ্যালয়ত দেওবাৰে এক সংবাদমেল সম্বোধন কৰি আন্দোলনৰ কাৰ্যসূচী ঘোষণা কৰে কৃষক নেতা অখিল গগৈয়ে।
তেওঁ জনোৱা অনুসৰি ১৮ নৱেম্বৰৰ পৰা কৃষক মুক্তিকে ধৰি ৪ টা ভাতৃ-ভগ্নী সংগঠনে প্ৰচাৰ অভিযান চলাব। গাঁৱে ভূঁইয়ে, চহৰে-নগৰে ঘৰে ঘৰে গৈ কৃষক সংগঠনটোৱে প্ৰচাৰ পত্ৰিকা বিতৰণ কৰিব।
“অস্তিত্ব ৰক্ষা কৰিবলৈ ইয়াৰ বাহিৰে কোনো উপায় নাই,”-অখিলে সংবাদমেলত কয়।
তদুপৰি, অহা ২২ নৱেম্বৰত কৃষক সংগঠনটোৱে ৰাজ ভৱন চলো কাৰ্যসূচী ৰূপায়ন কৰিব। ৰাজ্যপালৰ জৰিয়তে প্ৰধান মন্ত্ৰী আৰু ৰাষ্ট্ৰপতিলৈ শেষ বাৰলৈ স্মাৰক পত্ৰ প্ৰেৰণ কৰিব কৃষক মুক্তি সংগ্ৰাম সমিতিয়ে।
৭০ সংগঠন আৰু আছুৰ ৩০ টা সংগঠন আৰু বামপন্থী সংগঠনক একত্ৰিত হৈ কেবৰ বিৰুদ্ধে বৃহৎ আন্দোলন গঢ়ি তুলিবলৈ অখিল গগৈয়ে আহ্বান জনায়।
ইপিনে একেখন সংবাদমেলতে কেবৰ সপক্ষত থকা হিমন্ত বিশ্ব শৰ্মাৰ প্ৰতি আক্ৰমণাত্মক হৈ পৰে কৃষক নেতা অখিল গগৈ।
হিমন্তক কটাক্ষ কৰি অখিলে কয়, “হিমন্ত বিশ্ব শৰ্মাৰ কোনো মুল্য আছে বুলি নাভাবো। তেওঁ কেবৰ ভুল বাখ্যা কৰিছে। মহা প্ৰভু হিমন্ত বিশ্ব শৰ্মাই কেবৰ ভুল বাখ্যা কৰি অসমৰ মানুহক বিপথে পৰিচালিত কৰিব বিচাৰিছে।”
“নাগপুৰ আৰু দিল্লীৰ চুৱা চেলেকিবৰ বাবে আৰু নাগপুৰীয়াক সন্তুষ্ট কৰিবলৈ হিমন্ত বিশ্ব শৰ্মাই বিভ্ৰান্তিকৰ বক্তব্য ৰাখিছে,”-হিমন্তক কটাক্ষ কৰি অখিলে লগতে কয়।
হিমন্ত বিশ্ব শৰ্মাক “এজন দালাল ৰাজনৈতিক নেতা” আখ্যা দি তেওঁ কয়,”তেওঁ দুই নম্বৰী মাল। হিমন্ত বিশ্ব শৰ্মাক জাতিক বিক্ৰী নকৰিবলৈ আৰু দুই নম্বৰী মন্তব্য নকৰিবলৈ সকীয়াই দিছো।”
কেব নতুন ৰূপত আহিব বুলি কৈছে যদিও কেনেকুৱা ৰূপত আহিব সেই বিষয়ে হিমন্তই উল্লেখ কৰা নাই বুলি সদৰি কৰি অখিলে কয়, “লোক সভাৰ বুলেটিনত কেব কেনেকুৱা ৰূপত আহিব সেই কথা উল্লেখ আছে। এইবাৰ ৰাজ্যসভা আৰু লোকসভাত মুঠ ২৭ খন বিধেয়ক উত্থাপন হ’ব আৰু ১৬ নম্বৰত আছে কেব। যোৱাবাৰ পাছ নহ’ল বাবে নতুন বিল আহিব বুলি উল্লেখ আছে আৰু অবৈধ বিদেশীৰ সংজ্ঞা বদলাবলৈ এইখন অনা হৈছে।”
“২০১৬ ৰ বিধেয়কৰ নিচিনা ১৯’ৰ বিধেয়কতো ৬ টা ধৰ্মৰ লোকৰ নাম উল্লেখ আছে যিবিলাক পাকিস্তান, বাংলাদেশ আৰু আফগানিস্তানৰ পৰা আহিব পাৰিব। হয়তো এই বিধেয়কৰ পৰা খ্ৰীষ্টান আৰু পাৰ্ছীটো বাদ দি ৪ টা ধৰ্ম ৰাখিব পাৰে। ভিছা পাছপোৰ্ট নোহোৱাকৈ এই ধৰ্মৰ লোকসকল ভাৰতলৈ আহি নাগৰিকত্ব ল’ব পাৰিব। এই বিল গৃহীত হ’লে বিদেশী লোকক বৈধ নথি পত্ৰ নালাগে আৰু ১১ বছৰৰ সলনি ৬ বছৰ থাকিলেই নাগৰিকত্ব লাভ কৰিব,”-অখিলে লগতে কয়।
অখিলৰ মতে “বিল খন গৃহীত হ’লে শিলাদিত্য আৰু ত্ৰিপুৰাৰ মুখ্য মন্ত্ৰী বিপ্লৱ দেৱৰ দৰে নেতা হ’বলৈ দুদিন থাকিব লগীয়া নহয়, বাংলাদেশৰ পৰা আহিয়ে ইয়াত নিৰ্বাচন খেলি মন্ত্ৰী বিধায়ক হ’ব পাৰিব।”
“নাগালেণ্ড মেঘালয় আৰু মিজোৰামক হয়তো বাদ দিব পাৰে। অৰুণাচল, মণিপুৰকো বাদ দিব পাৰে। তেতিয়া অসম আৰু ত্ৰিপুৰা বাদ পৰি ৰ’ব। সেয়েহে এইবাৰ ভয়ংকৰ ৰূপত কেব আহিব সেইটো নিশ্চিত,”-অখিলে লগতে কয়।
আনহাতে, ৬ নং দফা সংশোধন কমিটি ভংগ কৰি আছুকে ধৰি অন্য সন্মানীয় ব্যক্তি সমূহক ওলাই আহিবলৈ অখিল গগৈয়ে আহ্বান জনায়।
