শিৱসাগৰ থানাৰ গোচৰ নম্বৰ ১৩৪৪/১৯ৰ পৰা জামিন লাভ কৰাৰ পাছতেই চাবুৱা থানৰ ২৮৯/১৯ নম্বৰৰ গোচৰত আজি অখিল গগৈক শিৱসাগৰ জিলা কাৰাগাৰৰ পৰা পুনৰ গ্ৰেপ্তাৰ কৰিলে ডিব্ৰুগড় আৰক্ষীয়ে।
চাবুৱা থানাৰ উক্ত গোচৰ সন্দৰ্ভত আজি শিৱসাগৰ জেইলত ভিডিঅ’ কনফাৰেঞ্চৰ জৰিয়তে থকা শুনানিৰ পূৰ্বেই ডিব্ৰুগড় আৰক্ষীয়ে গ্ৰেপ্তাৰ কৰে অখিল গগৈক।
ইফালে কোনো ৱাৰেন্ট নোহোৱাকৈৱে অখিল গগৈক গ্ৰেপ্তাৰ কৰাৰ অভিযোগ তুলিছে তেওঁৰ অধিবক্তা হেমেন বৰাই।
গ্ৰেপ্তাৰৰ সময়ত আৰক্ষীৰ সৈতে অখিল গগৈ আৰু তেওঁৰ অধিবক্তাৰ হতাহতি হোৱা পৰিলক্ষিত হয়। গ্ৰেপ্তাৰৰ সময়ত অখিলে আৰক্ষীক সামাজিক দূৰত্ব বজাই ৰাখিবলৈ সকিয়নী প্ৰদান কৰে।
শিৱসাগৰ জিলা কাৰাগাৰৰ পৰা ওলাই আহি সংবাদ মাধ্যমৰ আগত অখিল গগৈয়ে সকলোকে লকডাউন মানি চলিবলৈ আহ্বান জনায়।
তেওঁ কয়, ‘লকডাউন মানি চলিবলৈ অসমীয়া মানুহৰ বাবে সহজ। বসন্ত বা আই ওলালে অসমীয়া মানুহে নিজকে নিলগাই ৰখাৰ পৰম্পৰা মানি চলেই। সেইবাবে অসমীয়া মানুহে লকডাউন মানি চলাতো জটিল নহয়’।
লকডাউন ভংগ কৰাৰ নামত আৰক্ষীয়ে যি অত্যাচাৰ চলাইছে সেইটো উচিত হোৱা নাই বুলিও তেওঁ উল্লেখ কৰে।
ক’ৰ’না ভাইৰাছৰ বিৰুদ্ধে যুঁজিবলৈ অসমবাসীলৈ আহ্বান জনোৱাৰ লগতে সমান্তৰালকৈ কাৰ বিৰুদ্ধে যুঁজ দিবলৈও কৃষক নেতাগৰাকীয়ে আহ্বান জনায়।
ইফালে তেওঁৰ স্বাস্থ্য বৰ্তমান ভাল নহয় বুলি জনালে সাংবাদিকক। মঙলবাৰে শিৱসাগৰ জিলা কাৰাগাৰত চেলাইন লোৱা বুলি কোৱাৰ লগতে তেওঁৰ কিডনীত পাথৰ আৰু খাদ্যনলীত ঘাঁ হোৱাৰ কথা উল্লেখ কৰে।
আনহাতে আবেগিক হৈ অখিল গগৈয়ে তেওঁৰ মাতৃক চকুৰ অপাৰেশ্যন কৰিবলৈ কয় আৰু পৰিয়ালৰ সকলোকে ভালদৰে থাকিবলৈ অনুৰোধ জনায়।
আনহাতে আজিৰ দিনটোৰ পৰা চাহ বাগান সমূহ খুলিবলৈ দিয়া কাৰ্যটো চৰকাৰৰ এক আত্মঘাটি সিদ্ধান্ত বুলি মন্তব্য কৰে গগৈয়ে।
তেওঁ চাহ শ্ৰমিক সকলক তেওঁলোকৰ মজুৰি বা অন্যান্য সুবিধা দি ২১ টা দিন লকডাউন পালন কৰাৰ সুবিধা দিবলৈ চৰকাৰক আহ্বান জনায়।
জেইলৰ ভিতৰত ক’ৰ’না ভাইৰাছে সংহাৰী ৰূপ ধাৰণ কৰিব পাৰে বুলি শংকা প্ৰকাশ কৰি অখিল গগৈয়ে কয়দীসকলক জামিনত মুক্তি দিয়াৰ বাবে অসম চৰকাৰক পত্ৰ প্ৰেৰণ কৰা বুলিও জানিবলৈ দিয়ে।
অখিল গগৈয়ে আজি তেওঁক এইদৰে গ্ৰেপ্তাৰ কৰাটো বে আইনী বুলি কয় আৰু তেওঁক আজি গ্ৰেপ্তাৰ কৰা সকলো বিষয়াৰ ওপৰত গোচৰ তৰিব বুলি উল্লেখ কৰে।
অখিলৰ হুংকাৰ, ‘কা আন্দোলন কৰাতো যদি দেশদ্ৰোহ হয়, তেতিয়া মই হাজাৰ বাৰ এনেকুৱা কা আন্দোলন কৰিম। কোনো বিদেশী হিন্দুৱেই হওক বা মুছলমানেই হওক অসমত অহাটো মানি নলও’।
উল্লেখ্য যে অখিল গগৈক গ্ৰেপ্তাৰ কৰিবলৈ মঙলবাৰৰ পৰাই ডিব্ৰুগড় আৰক্ষীৰ এটা বৃহৎ দল শিৱসাগৰত বাহৰ পাতি আছিল।