নৰেন্দ্ৰ মোদী নেতৃত্বাধীন বিজেপি চৰকাৰৰ দিনত পে’ট্ৰল-ডিজেলৰ লগতে অত্যাৱশ্যকীয় সামগ্ৰীৰ মূল্যবৃদ্ধিৰ বিৰুদ্ধে শুকুৰবাৰে গুৱহাটীত কৃষক মুক্তি সংগ্ৰাম সমিতিয়ে প্ৰতিবাদ সাব্যস্ত কৰে। কৃষক নেতা অখিল গগৈৰ নেতৃত্বত সংগঠনটোৰ প্ৰায় ৫০০ নেতা-কৰ্মীয়ে আমবাৰীৰ পৰা সমদল উলিয়াই কাছাৰীলৈ যায় আৰু তাৰ পৰা এটা দল গৈ ৰাজ্যপালক সাক্ষাৎ কৰি স্মাৰকপত্ৰ প্ৰদান কৰে।
উল্লেখ্য যে, পে’ট্ৰলজাত সামগ্ৰীকে ধৰি নিত্য ব্যৱহাৰ্য সামগ্ৰীসমূহৰ আকাশলংঘী মূল্যবৃদ্ধিয়ে সাধাৰণ ৰাইজৰ বাবে সমস্যাৰ সৃষ্টি কৰিছে। এই সন্দৰ্ভত ৰাইজক উদ্দেশ্যি কৃষক মুক্তি সংগ্ৰাম সমিতিৰ উপদেষ্টা অখিল গগৈয়ে কয়, “নৰেন্দ্ৰ মোদী নেতৃত্বাধীন বিজেপি চৰকাৰৰ দিনত সামগ্ৰীৰ মূল্যবৃদ্ধিয়ে সৰ্ব-সাধাৰণৰ মূৰত মাধমাৰ শোধাইছে। এই চৰকাৰখন কেৱল পুঁজিপতিসকলৰ ভালৰ বাবেহে আছে। সাধাৰণ ৰাইজৰ কল্যাণৰ বাবে নহয়। নিৰ্বাচনৰ আগত নৰেন্দ্ৰ মোদীয়ে কৈছিল ‘মেহেংগা হতায়েংগে’। কিন্তু এতিয়া তাৰ সম্পূৰ্ণ ওলোটাহে হৈছে।”
তেওঁ লগতে নৰেন্দ্ৰ মোদীক মিছলীয়া আখ্যা দি আগন্তুক নিৰ্বাচনত বিজেপিক বৰ্জন কৰিব লাগে বুলি মন্তব্য কৰে। ‘নৰেন্দ্ৰ মোদীয়ে দুৰ্নীতি কৰা নাই বুলি কোনোবাই যদি ভাবে সেয়া পাহৰি যাওক’, প্ৰতিবাদী ৰাইজক উদ্দেশ্যি অখিল গগৈয়ে কয়।
ইয়াৰ উপৰি গুৱাহাটীৰ চিটিবাছৰ ভাড়া বৃদ্ধি, নিৰ্মাণ সামগ্ৰীৰ মৃল্যবৃদ্ধি আদি প্ৰসংগতো সৰৱ হয় কৃষক নেতাজন।
ইপিনে, মাজুলীত অনুষ্ঠিত বিজেপিৰ ৰাজ্যিক কাৰ্যনিৰ্বাহকত নাগৰিকত্ব সংশোধনী বিধেয়ক সন্দৰ্ভত প্ৰস্তাৱ লোৱা প্ৰসংগত গগৈয়ে কয়, “এতিয়া অসম গণ পৰিষদ আৰু বি পি এফ দলে অপেক্ষা কৰাৰ কোনো অৰ্থ নাই। এই দুয়োটা দলে অসমৰ ৰাইজৰ স্বাৰ্থত বিজেপিৰ সৈতে মিত্ৰতা ত্যাগ কৰিব লাগে।”
ইয়াৰ উপৰি অহা ২৩ অক্তোবৰত নাগৰিকত্ব সংশোধনী বিধেয়কৰ শুনানিৰ বাবে গঠন কৰা যুটীয়া সংসদীয় সমিতিৰ সভাৰ পূৰ্বে ৭ দিন ধৰি কৃষক মুক্তি সংগ্ৰাম সমিতিয়ে প্ৰতিবাদী কাৰ্যসূচী পালন কৰিব বুলি জানিবলৈ দিয়ে।
