কৃষক মুক্তি সংগ্ৰাম সমিতিৰ নেতা অখিল গগৈৰ জামিন আবেদন মঙলবাৰে নিয়াৰ আদালতে মঞ্জুৰ কৰে।
আজি ৰাতিপুৱা নিয়াৰ আদালতত জামিন আবেদন দাখিল কৰিছিল অখিলৰ অধিবক্তাই। অখিলৰ হৈ আদালতত যুক্তি দৰ্শাই জ্যেষ্ঠ অধিবক্তা জিয়াউৰ কামাৰে।
সেই আবেদনৰ ভিত্তিত নিয়া আদালতে ৩০ হাজাৰ টকা জৰিমনা আৰু এগৰাকীৰ চিকিউৰিটিত অখিল গগৈক জামিন দিয়ে।
অখিলৰ অধিবক্তা কৃষ্ণ গগৈয়ে সংবাদ মাধ্যমৰ আগত এই কথা জানিবলৈ দিয়ে।
কালি নিয়াই অভিযোগ নামা দাখিলৰ বাবে পুনৰ ৯০ দিনৰ সময় বিচাৰি আবেদন জনাইছিল যদিও কিন্তু সেই আবেদন নিয়াৰ আদালতে খাৰিজ কৰে।
নিয়াৰ অভিযোগ দাখিলৰ ৯০ দিনৰ সীমা উকলি আজি ৯১ দিন গৰকাত নিয়া আদালতে অখিলৰ জামিন মঞ্জুৰ কৰে।
কৃষক মুক্তি সংগ্ৰাম সমিতিৰ সক্ৰিয় নেতা গৰাকীক নিয়াই ১২ ডিচেম্বৰত যোৰহাটৰ পৰা গ্ৰেপ্তাৰ কৰিছিল।
বিগত বৰ্ষৰ ডিচেম্বৰ মাহত অসমত চলি থকা নাগৰিকত্ব সংশোধনী আইন বিৰোধী প্ৰতিবাদৰ সময়ত অখিল গগৈক চৰকাৰ বিৰোধী উচতনি, ঘৃণা বিয়পোৱাৰ বাবে নিয়াই গ্ৰেপ্তাৰ কৰিছিল।
বেআইনী কাৰ্য্যকলাপ(প্ৰতিৰোধী)আইনৰ অধীনত নিয়াই অখিল গগৈক গ্ৰেপ্তাৰ কৰা হৈছিল।
অখিল গগৈক গ্ৰেপ্তাৰৰ উপৰি তেওঁৰ বাসগৃহতো নিয়াই তালাচী চলাইছিল।
সমগ্ৰ ৰাজ্যত অখিল গগৈৰ মুক্তিৰ দাবীত প্ৰতিবাদ আৰম্ভ হোৱাৰ সময়ত গগৈৰ মাতৃ প্ৰিয়দা গগৈয়ো ২০ ডিচেম্বৰত আমৰণ অনশনত বহিছিল যদিও তেওঁৰ স্বাস্থ্য বেয়া হোৱাৰ প্ৰতি লক্ষ্য ৰাখি ২২ ডিচেম্বৰত সেই আন্দোলন উঠাই লোৱা হৈছিল।