শেহতীয়াভাৱে বৃহৎ নদীবান্ধে সংঘটিত কেৰালাৰ ভয়ংকৰ বানৰ পাছত মূৰৰ ওপৰতে জলবোমা থকা অসমতো নদীবান্ধে কৰিব পৰা ক্ষতিৰ বিষয়ত লাহে লাহে এটা গণমত গঢ়ি উঠবলৈ আৰম্ভ কৰিছে। এই গণমতৰ সুৰতেই সুৰ মিলাই বৃহৎ নদীবান্ধ সমুহ বন্ধ কৰাৰ দাবীৰে শুকুৰবাৰে কৃষক মুক্তি সংগ্রাম সমিতিৰ শিৱসাগৰ জিলা সমিতিয়ে জিলা উপায়ুক্তৰ কাৰ্য্যালয়ৰ সন্মুখত ধৰ্মঘটৰ কাৰ্য্যসূচী ৰূপায়ণ কৰে। ধৰ্মঘটৰ কাৰ্য্যসুচীৰ পিছতেই সংগঠনটোৱে জিলা উপায়ুক্তৰ জৰিয়তে মুখ্যমন্ত্ৰীলৈ নদীবান্ধ বন্ধৰ দাবীত এখন স্মাৰক পত্ৰ প্ৰেৰণ কৰে।
স্মাৰক পত্ৰত সংগঠনটোৱে উল্লেখ কৰে যে, ৰঙানদী জলবিদ্যুৎ প্ৰকল্প, কুৰিশ্বু প্ৰকল্প, দৈয়াং জলবিদ্যুৎ প্ৰকল্প, কাৰ্বি লাংপি আৰু কপিলী জলবিদ্যুৎ প্ৰকল্পই এৰি দিয়া পানীয়ে অসমত ভয়াবহ পৰিস্থিতিৰ সৃষ্টি কৰিছে। ৪৫০ মেগাৱাট বিদ্যুৎ উৎপাদন কৰা নীপকোৰ ৰঙানদী প্ৰকল্পই লখিমপুৰ, মাজুলী, ৬০ মেগাৱাট বিদ্যুৎ উৎপাদন কৰা কুৰিশ্বু প্ৰকল্পই বাক্সা , নলবাৰী, চিৰাং, বঙাইগাঁও, বৰপেটা আদি জিলাত ভয়াবহ সমস্যাৰ সৃষ্টি কৰিছে। একেদৰে ৭৫ মেগাৱাট জলবিদ্যুৎ উৎপাদন কৰা দৈয়াং প্ৰকল্পই গোলাঘাট জিলা, ১০০ মগাৱাট বিদ্যুৎ উৎপাদন কৰা কাৰ্বি লাংপি প্ৰকল্পই কাৰ্বি আংলং, নগাওঁ, ২০০ মেগাৱাট বিদ্যুৎ উৎপাদন কৰা কপিলী জলবিদ্যুৎ প্ৰকল্পই নগাওঁ তথা মৰিগাও জিলাৰ গ্ৰাম্য অৰ্থনীতি ধ্বংস কৰি পেলাইছে।
ইয়াৰ উপৰিও ভাৰত চৰকাৰে অসম তথা অৰুণাচলত নিৰ্মাণ কৰি থকা ১০০০০ মেগাৱাট উৎপাদন ক্ষমতা সম্পন্ন চিয়াং প্ৰকল্প, ৩০০০ মেগাৱাট উৎপাদন ক্ষমতা সম্পন্ন দিবাং প্ৰকল্প, ২০০০ মেগাৱাট এন এইচ পি চি ৰ দ্বাৰা নিৰ্মীয়মান নামনি সোৱণশিৰি জলবিদ্যুৎ প্ৰকল্প, ১৭৫০ মেগাৱাট নামনি ডেমবে প্ৰকল্পকে ধৰি নিৰ্মাণ কৰিবলৈ লোৱা ১৬৮ টা বৃহৎ নদীবান্ধৰ প্ৰভাৱ অসমৰ কাৰণে কিমান বিপদজনক হব তাক লৈ শংকিত হৈ পৰিছে সংগঠনটো। অৰুণাচল প্ৰদেশৰ পাহাৰত ব্ৰক্ষ্মপুত্ৰ আৰু ইয়াৰ উপনদী সমুহত নিৰ্মাণ কৰা বা নিৰ্মাণ কৰিবলৈ পৰিকল্পনা কৰা সকলো নদীবান্ধৰ সামগ্ৰিক কু-প্ৰভাৱ অসমৰ ওপৰত কেনে হব তাক বৈজ্ঞানিক দৃষ্টিভংগীৰে অধ্যায়ন কৰাৰ দাবী জনাইছে সংগঠনটোৱে ।
আনহাতে নিৰ্মীয়মান নামনি সোৱণশিৰি জলবিদ্যুৎ প্ৰকল্পৰ ওপৰত প্ৰকাশিত সকলোবোৰ বিজ্ঞানসন্মত অধ্যয়নে প্ৰমাণ কৰিছে যে এনএইচপিচিৰ দ্বাৰা নিৰ্মাণ কাৰ্য চলি থকা প্ৰকল্পটো মুঠেই নিৰাপদ নহয়। গতিকে প্ৰকল্পটোৰ নিৰ্মাণ কাৰ্য্য বন্ধ কৰি ইয়াক পৰিত্যক্ত ঘোষণা কৰাৰ লগতে বৰ্তমানলৈকে নিৰ্মাণ কৰা অংশ ভাঙি পেলোৱাৰ দাবী জনাইছে সংগঠনটোৱে।
ব্ৰহ্মপুত্ৰৰ ওপৰত চীনে যি নদীবান্ধ নিৰ্মাণ কৰিছে বুলি অভিযোগ উঠিছে সেই সন্দৰ্ভত তদন্ত কৰি চৰকাৰে চীনক নিৰ্মাণ কাৰ্য্য বন্ধ কৰোৱাৰ বাবে বাধ্য কৰিবলৈ দাবী উত্থাপন কৰিছে।
ভূটানে ৩২০০০ মেগাৱাট বিজুলী উৎপাদনৰ বাবে যি নদীবান্ধ প্ৰকল্প স্থাপনৰ পৰিকল্পনা কৰিছে সেই বান্ধে যে অসমক ধ্বংস কৰি পেলাব সেই কথা উল্লেখ কৰি ভূটান চৰকাৰকো এই নিৰ্মাণ কাৰ্য্য পৰিকল্পনা বন্ধ কৰিবলৈ দাবী জনাইছে কৃষক মুক্তি সংগ্ৰাম সমিতিয়ে।