যোৱা ৩ মাৰ্চত সোণ সৰবৰাহৰ অভিযোগত গ্ৰেপ্তাৰ কৰা হৈছিল কানাড়া অভিনেত্ৰী ৰান্যা ৰাওক। অভিনেত্ৰীগৰাকীক গ্ৰেপ্তাৰ কৰাৰ পিছতে কানাড়া চলচ্চিত্ৰ জগতত চাঞ্চল্যৰ সৃষ্টি হৈছে।
ইপিনে, বিমানবন্দৰত যাত্ৰীসকলে যি ধৰণৰ নিৰাপত্তা আৰু নিৰীক্ষণৰ মাজেৰে পাৰ হ’বলগীয়া হয়, সেই ধৰণৰ নিৰাপত্তা আৰু নিৰীক্ষণৰ পৰা হাত সাৰি অভিনেত্ৰীগৰাকীয়ে কেনেকৈ সোণৰ চোৰাং সৰবৰাহ কৰিছিল তাক লৈও প্ৰশ্ন উত্থাপন হ’বলৈ আৰম্ভ কৰিছে।
যোৱা ৩ মাৰ্চত বেংগালুৰুৰ কেম্পেগৌড়া আন্তঃৰাষ্ট্ৰীয় বিমানবন্দৰৰ পৰা ১৪ কেজি ৮০০ গ্ৰাম সোণসহ গ্ৰেপ্তাৰ কৰা হৈছিল ৰান্যাক। ইয়াৰ আন্তঃৰাষ্ট্ৰীয় বজাৰ মূল্য প্ৰায় ১৩ কোটি টকা।
কানাড়া অভিনেত্ৰীগৰাকীক গ্ৰেপ্তাৰ কৰাৰ পিছৰে পৰা কেইবাটাও প্ৰশ্ন উত্থাপন হৈছে। তেওঁ কেনেকৈ সোণৰ চোৰাং সৰবৰাহ কৰিছিল? তদন্তকাৰীয়ে দাবী কৰিছে যে তেওঁ এবছৰত ৩০ বাৰ ডুবাই ভ্ৰমণ কৰিছিল। গতিকে প্ৰতিবাৰেই সৰবৰাহৰ বাবেই গৈছিল নেকি? যদি তেওঁ চোৰাং সৰবৰাহ কৰিছিল তেন্তে ইমান দিন ধৰা নপৰিল কিয়? ৰাজহ চোৰাংচোৱা সঞ্চালকালয় (ডি আৰ আই)ৰ সূত্ৰ অনুসৰি ৰান্যাই সোণৰ চোৰাং সৰবৰাহত কেতবোৰ কৌশল ব্যৱহাৰ কৰিছিল।
তদন্তৰ এক সূত্ৰই জনোৱা মতে, অভিনেত্ৰীগৰাকীয়ে ভালদৰেই জানিছিল যে সোণখিনি তেওঁৰ শৰীৰৰ এনে এটা অংশত ৰাখিব লাগিব যিটো সহজে ধৰা নপৰে। তাৰোপৰি নাৰী হোৱাৰ বাবে ভালদৰে পৰীক্ষা কৰা নহ’ব। আৰু সেই সুযোগকে কামত লগাইছি তেওঁ। সোণৰ বিস্কুটবোৰ তেওঁ টেপ আৰু ক্ৰেপ বেণ্ডেজেৰে উৰুত বান্ধি নিছিল। ৩ মাৰ্চতো তেওঁ একে কৌশল ব্যৱহাৰ কৰি সোণ সৰবৰাহ কৰিছিল। কিন্তু শেষ ৰক্ষা নহ’ল।
তদন্তকাৰীয়ে জনোৱা মতে, আগতে ৰান্যাৰ হাতত সোণৰ চোৰাং সৰবৰাহৰ বাবে বিশেষভাৱে তৈয়াৰী কাপোৰ আছিল। তেওঁ কেইবাটাও জেকেট তৈয়াৰ কৰিছিল যিবোৰৰ সহায়ত চকুত নপৰাকৈয়ে সহজে সোণৰ সৰবৰাহ কৰিব পৰা যায়। আনকি তেওঁ এক বিশেষ ধৰণৰ ‘ৰিষ্ট বেল্ট’ পৰিধান কৰে। তদন্তৰ এক সূত্ৰই দাবী কৰে তেওঁ তাৰ জৰিয়তেও চোৰাং সোণৰ সৰবৰাহ কৰিছিল।
সূত্ৰটোৱে লগতে দাবী কৰে যে বিমানবন্দৰৰ একাংশ কৰ্মচাৰীয়ে হয়তো ৰান্যাক চোৰাং সৰবৰাহত সহায় কৰিছিল। প্ৰথম অৱস্থাত বিমানবন্দৰৰ নিৰাপত্তাৰক্ষী কনিষ্টবল বাসবৰাজুৰ নাম পোহৰলৈ আহিছিল। অৱশ্যে তদন্তকাৰীয়ে সন্দেহ কৰিছে যে এই গোচৰৰ সৈতে কেৱল বাসৱৰাজুৱেই নহয়, আন বহু লোক জড়িত। আৰক্ষীয়ে বাসৱৰাজুক গ্ৰেপ্তাৰ কৰিছে।
