ল’ৰা-ছোৱালীক আজিকালি চম্ভালিবলৈ সহজ নহয়। তেওঁলোকে যি বিচাৰে তাকেই লাগে। নাপালে চিঞৰে, ঘৰ তোলপাৰ লগায়। শাৰীৰিক অসুস্থতাৰ বাবে পিতৃ-মাতৃ যেনেকৈ চিকিৎসকৰ ওচৰলৈ যায়, তেনেকৈয়ে বহু শিশুৰ খঙৰ সমস্যাৰ বাবেও বহুতে চিকিৎসকৰ ওচৰলৈ যায়। কাৰণ শিশুৰ খং চম্ভালিবলৈ টান। এনে শিশুৰ খং কমোৱাৰ কিছু উপায় জানো আহক।
ঘৰৰ বাহিৰত শিশুক খেলা-ধূলা কৰাত বাধা দিয়া, কাৰো লগত মিলিবলৈ নিদিয়াটোৱে খং উঠাব পাৰে
শিশুৰ খং বৃদ্ধিত পিতৃ-মাতৃয়ে ভূমিকা থাকিব পাৰে। এতিয়া ল’ৰা-ছোৱালীয়ে আগৰ দৰে বাহিৰত খেলা-ধূলা নকৰে। পৰিলে আঘাত পাব বুলি ভাবি পিতৃ-মাতৃয়ে খেলিবলৈ নিদিয়ে। বহুতে ইয়াক সময়ৰ অপচয় বুলি গণ্য কৰি সন্তানক কোনোবা নহয় কোনোবা ক্লাছত নামভৰ্তি কৰাই দিয়ে। শিশুসকলেও নিজৰ ইচ্ছামতে কিবা কৰিব নোৱাৰাৰ বাবে ক্ষোভতো খং কৰিব পাৰে। গতিকে যদি ল’ৰা-ছোৱালীয়ে বন্ধু বা চুবুৰীৰ ল’ৰা-ছোৱালীৰ সৈতে খেলিব বিচাৰে তেন্তে খেলিবলৈ দিয়ক। কিন্তু তেওঁলোকৰ ওপৰত চকু ৰাখিব।
ল’ৰা-ছোৱালীয়ে সদায় নতুন নতুন কথা শিকি থাকে, বহু প্ৰশ্ন থাকে, উত্তৰ বিচাৰি থাকে
শৈশৱত ল’ৰা-ছোৱালীয়ে বহুত দুষ্টামি কৰে, প্ৰশ্ন কৰে। তেওঁলোকৰ এই কাৰ্য্যত আপোনাৰ খং উঠিব পাৰে। কিন্তু তেওঁলোকৰ ওপৰত খং নকৰিব। তেওঁলোকৰ প্ৰশ্নৰ উত্তৰ দিয়ক, তেওঁলোকে বুজি পোৱা ধৰণেৰে। এইদৰে ল’ৰা-ছোৱালীয়ে আপোনাৰ লগত সকলো শ্বেয়াৰ কৰিব। মাক-দেউতাকৰ খং উঠিব বুলি ভাবি কিবা এটা ক’বলৈ ভয় নকৰে। শিশুৱে প্ৰশ্ন কৰাৰ স্বাধীনতা নাই বুলি অনুভৱ কৰিলে খং উঠে। গতিকে অভিভাৱকসকল সচেতন হোৱা উচিত।
পঢ়া-শুনা বা আন কোনো বিষয়ত শিশুক কেতিয়াও চাপ দিব নালাগে
পঢ়া-শুনাৰ প্ৰতিযোগিতাৰ বাবে বহু অভিভাৱকে সন্তানক পঢ়া-শুনা কৰিবলৈ বাধ্য কৰে। কিন্তু যদি শিশুটিয়ে পঢ়িব নিবিচাৰে তেন্তে তেওঁক শিকাই পঢ়াবলৈ চেষ্টা কৰক। জোৰ-জবৰদস্তি কৰিলে ল’ৰা-ছোৱালীয়ে চাপ অনুভৱ কৰিব। শিক্ষা গুৰুত্বপূৰ্ণ, কিন্তু ই শিশুৰ বাবে বোজা হৈ পৰিব নালাগে।
দিনটোৰ বেছিভাগ সময় মোবাইল ফোন চাই থকাটো শিশুৰ বাবে অতি ক্ষতিকাৰক
আগতে ল’ৰা-ছোৱালীয়ে সৰুতে মোবাইল ব্যৱহাৰ কৰা নাছিল। কিন্তু এতিয়া ল’ৰা-ছোৱালীবোৰ গোটেই দিনটো মোবাইলত ব্যস্ত। অত্যধিক মোবাইল ব্যৱহাৰে শিশুৰ খংও বৃদ্ধি কৰে। গতিকে শিশুক যিমান পাৰি মোবাইলৰ পৰা আঁতৰাই ৰাখক।
শিশুৱে যি বিচাৰিছে সেয়া যদি একেবাৰে প্ৰয়োজনীয় নহয়, তেন্তে কিনি দিব নালাগে
শিশুৱে যি বিচাৰে তাক কিনি দিলে ভুল নহয়, যদিহে ইয়াৰ দ্বাৰা তেওঁলোকৰ লাভ হয়। কিন্তু সকলো কিনি দিব নোৱাৰে। ল’ৰা-ছোৱালীক বুজাই চম্ভালিবলৈ শিকক। টকা-পইচাৰ সমস্যা বা আন কোনো কাৰণত শিশুসকলৰ সকলো দাবী পূৰণ কৰিব নোৱাৰিলে তেওঁলোকৰ খং উঠিব পাৰে। ল’ৰা-ছোৱালীক মৰম কৰাৰ লগতে তেওঁলোকক বুজাটোও গুৰুত্বপূৰ্ণ।
