ফুড এপটো খুলিলেই আপুনি নিমিষতে আপোনাৰ পছন্দৰ খাদ্য অৰ্ডাৰ কৰিব পাৰে। ইয়াৰ বাহিৰেও চুবুৰীৰ চুক-কোণে ফাষ্ট ফুডৰ দোকান। সুস্বাদু খাদ্য খোৱাৰ বাবে এতিয়া উপায় বহুত। কিন্তু আপুনি লক্ষ্য কৰিছেনে যে এই সুস্বাদু খাদ্যই ক্ৰমান্বয়ে ৰোগৰ আশংকা বঢ়াই তুলিছে?
অস্বাস্থ্যকৰ খাদ্যাভ্যাসৰ বাবে ফেটি লিভাৰৰ সমস্যা বৃদ্ধি পায়। ইয়াক নন-এলকহলিক ফেটি লিভাৰ বুলিও কোৱা হয়। ইয়াৰ লগত মেদবহুলতা, টাইপ ২ ডায়েবেটিছ, উচ্চ কলেষ্টেৰল আৰু উচ্চ ৰক্তচাপ আদিও দেখা দিয়ে।
যদি সময়মতে ফেটি লিভাৰ ৰোগ নিয়ন্ত্ৰিত নহয় তেন্তে লিভাৰ চিৰ’ছিছ আৰু লিভাৰ বিকল হোৱাৰ দৰে সমস্যাৰ সৃষ্টি হ’ব পাৰে। ফেটি লিভাৰ সমস্যাৰ প্ৰাৰম্ভিক অৱস্থাত সহজে চিকিৎসা কৰিব পাৰি। তাকো, ঘৰুৱা প্ৰতিকাৰ অনুসৰণ কৰিয়েই। ইয়াৰ দ্বাৰা আপোনাৰ ওজন কমোৱাত সহায়ক হ’ব আৰু অন্যান্য শাৰীৰিক জটিলতাৰ পৰা হাত সাৰিব পাৰিব।
শৰীৰ চৰ্চাঃ
ব্যায়ামৰ কোনো বিকল্প নাই। ফেটি লিভাৰ, উচ্চ কলেষ্টেৰল, মেদবহুলতা বা টাইপ ২ ডায়েবেটিছৰ দৰে সমস্যাৰ পৰা হাত সাৰিবলৈ ওজন নিয়ন্ত্ৰণত ৰখাটো অতি প্ৰয়োজনীয়। আৰু এই ক্ষেত্ৰত প্ৰতিদিনে শৰীৰ চৰ্চা কৰিবই লাগিব।
খাদ্যাভ্যাসত গুৰুত্ব দিয়কঃ
খাদ্যৰ পৰিৱৰ্তন নকৰাকৈ ফেটি লিভাৰৰ পৰা মুক্তি পোৱা সম্ভৱ নহয়। প্ৰথমতে জাংক ফুডৰ পৰা আঁতৰি থকা উচিত। তদুপৰি শাক-পাচলি, ফল-মূল, দাইল, গোটাশস্য আদি বেছিকৈ খাব লাগে। উদ্ভিদজ খাদ্য লিভাৰৰ স্বাস্থ্যৰ বাবে উপকাৰী।
কফি খাব পাৰেঃ
লিভাৰৰ স্বাস্থ্য উন্নত কৰিবলৈ কফি খাব পাৰে। যকৃতৰ প্ৰদাহ কমোৱাত কফি উপযোগী। কিন্তু বেছিকৈ কফি খোৱা উচিত নহয়। দিনটোত তিনিকাপ কফি খাব পাৰে। সেইটোও গাখীৰ আৰু চেনি নোহোৱাকৈ।
চেনি পৰিহাৰ কৰকঃ
যদি আপুনি ফেটি লিভাৰ ৰোগত আক্ৰান্ত বুলি ধৰা পৰে তেন্তে জাংক ফুড খাব নালাগে। তেলত ভজা যিমানেই এৰাই চলিব সিমানেই ভাল। লগতে চেনি থকা খাদ্য আৰু পানীয় পৰিহাৰ কৰিব লাগে। চেনিৰ ফলত ফেটি লিভাৰকে ধৰি একাধিক ৰোগৰ আশংকা থাকে।
