২০২৬ চনৰ আই পি এল খিতাপৰ যুঁজখন ৰোমাঞ্চকৰ ফাইনেলত সমাপ্ত হয়। গুজৰাট টাইটানছ (জিটি)ক পৰাস্ত কৰি একেৰাহে দ্বিতীয়বাৰৰ বাবে আই পি এলৰ ট্ৰফী লাভ কৰে ৰয়েল চেলেঞ্জাৰছ বেংগালুৰু (আৰ চি বি)য়ে। এই বিজয়ৰ পিছত বেংগালুৰুত আৰম্ভ হ’ল উদযাপন।
এই জয়েৰে আই পি এলৰ ইতিহাসত মুম্বাই ইণ্ডিয়ানছ (এম আই) আৰু চেন্নাই ছুপাৰ কিংছ (চি এছ কে)ৰ পিছত একেৰাহে দুবাৰকৈ চেম্পিয়ন হোৱা তৃতীয়টো দল হিচাপে পৰিগণিত হয়। চেম্পিয়ন হিচাপে আৰ চি বিয়ে ২০ কোটি টকা লাভ কৰাৰ বিপৰীতে ৰানাৰ্ছ আপ গুজৰাট টাইটানছেও এক বৃহৎ পুৰস্কাৰ লাভ কৰে।
ভাৰতীয় ক্ৰিকেট নিয়ন্ত্ৰণ ব’ৰ্ডে ২০২৬ চনৰ আই পি এলৰ বাবে মুঠ ৪৬.৫ কোটি টকাৰ পুৰস্কাৰ ধন ঘোষণা কৰিছিল। এই ধনৰ স্থান অনুসৰি শীৰ্ষ চাৰিটা দলৰ মাজত ভাগ কৰা হৈছিল। ব্যক্তিগত প্ৰদৰ্শনৰ বাবেও পৃথক পৃথক পুৰস্কাৰ প্ৰদান কৰা হয়।
চেম্পিয়ন আৰ চি বিয়ে লাভ কৰিলে ২০ কোটি টকা। ফাইনেলত পৰাস্ত হয় ৰানাৰ্ছ আপ গুজৰাট টাইটানছ। তেওঁলোকে ১৩ কোটি টকা পালে। তৃতীয় স্থানৰ ৰাজস্থান ৰয়েলছে (আৰ আৰ) ৭ কোটি আৰু চতুৰ্থ স্থানত থকা ছানৰাইজাৰ্ছ হায়দৰাবাদে (এছ আৰ এইচ) ৬.৫ কোটি টকা লাভ কৰে।
এই ছিজনত সৰ্বাধিক চৰ্চিত খেলুৱৈ আছিল বৈভৱ সূৰ্য্যবংশী। তেওঁ ৭৭৬ ৰান সংগ্ৰহ কৰি অৰেঞ্জ কেপ লাভ কৰে। তেওঁৰ গড় আছিল ৪৮.৫০। বৈভৱে ৭২টা ছয় মাৰি শ্ৰেষ্ঠ ছিক্স হিটাৰৰ বঁটাও লাভ কৰে। ইয়াৰ উপৰিও তেওঁ শ্ৰেষ্ঠ উদীয়মান খেলুৱৈ আৰু শ্ৰেষ্ঠ খেলুৱৈৰ বঁটাও লাভ কৰে।
কাগিছ’ ৰাবাডাই ২৯টা উইকেট দখল কৰি পাৰ্পল কেপ লাভ কৰে। ৭৫ ৰানৰ অপৰাজিত ইনিংছ খেলা বিৰাট কোহলীয়ে ফাইনেলত মেন অৱ দ্য মেচৰ বঁটা লাভ কৰে।
বিৰাট কোহলীয়ে ফাইনেলত সৰ্বাধিক চাৰি মৰাৰ বাবে বঁটা লাভ কৰে, শ্ৰেষ্ঠ ছয় মৰাৰ বঁটাও লাভ কৰে। শ্ৰেষ্ঠ ডট বলৰ বঁটা লাভ কৰে ভুৱনেশ্বৰ কুমাৰে। ফাইনেলত শ্ৰেষ্ঠ ষ্ট্ৰাইক ৰেটৰ বঁটা লাভ কৰে ভেংকটেশ আয়াৰে। গুজৰাটৰ বিৰুদ্ধে চূড়ান্ত খেলখনত তেওঁৰ ষ্ট্ৰাইক ৰেট আছিল ২০০.০০।
সমগ্ৰ ছিজনত সৰ্বশ্ৰেষ্ঠ ষ্ট্ৰাইক ৰেটৰ বঁটা লাভ কৰে বৈভৱে। তেওঁৰ ষ্ট্ৰাইক ৰেট আছিল ২৩৭.৩০। পাঞ্জাব কিংছ (পিবিকেএছ)য়ে লাভ কৰে ফেয়াৰ প্লে বঁটা। শ্ৰেষ্ঠ কেচৰ বঁটা লাভ কৰে মনীষ পাণ্ডেই।
