আজি ৮ মাৰ্চ, আন্তঃৰাষ্ট্ৰীয় নাৰী দিৱস। পৃথিৱীৰ বিভিন্ন প্ৰান্তৰ লোকৰ বাবে এই দিনটো কেৱল উদযাপনৰ দিন নহয়, লিংগ সমতা, নাৰীৰ অধিকাৰ, সামাজিক আৰু অৰ্থনৈতিক ক্ষেত্ৰত মহিলাৰ অসাধাৰণ অৱদানক স্বীকৃতি দিয়াৰ দিন। এই বিশেষ দিনটোত সমগ্ৰ বিশ্বই উদযাপন কৰিছে নাৰীৰ সংগ্ৰাম, সাহস আৰু সফলতাৰ কাহিনী।
আমাৰ চৌপাশৰ বহু অঞ্চলত এতিয়াও বৈষম্য বিদ্যমান। নাৰী দিৱসৰ জৰিয়তে সেই বৈষম্য দূৰ কৰাৰ সংকল্প লোৱা হয়। শিক্ষা, কৰ্ম, জীৱনৰ সকলো দিশতে মহিলাসকলে যাতে সম সুযোগ লাভ কৰে তাৰ লক্ষ্যৰে সমগ্ৰ বিশ্বতে এই দিৱস পালন কৰা হয়। ৰাজনীতি, অৰ্থনীতি, সংস্কৃতি, বা সমাজ, নাৰীয়ে সকলো ক্ষেত্ৰতে গুৰুত্বপূৰ্ণ অৱদান আগবঢ়াইছে – যিটো আজিৰ দিনটোত বিশেষভাৱে স্মৰণ কৰা হয়।
২০২৬ চনৰ বাবে বিশেষ থিম: ‘Give to Gain’
এইবাৰৰ নাৰী দিৱসৰ মূল বিষয়বস্তু হৈছে ‘ Give to Gain’‘। অৰ্থাৎ আমি যদি মহিলাসকলক আগুৱাই যোৱাৰ সুযোগ দিওঁ, তেতিয়াহে সমগ্ৰ সমাজ আৰু দেশৰ উন্নতি হ’ব। অৰ্থাৎ মহিলাসকলৰ বাবে উন্নত কৰ্মৰ সুযোগ সৃষ্টি কৰি আমি সকলোৱে লাভৱান হ’ব পাৰো।
নাৰী দিৱসৰ ইতিহাস
এই দিনটোৰ আঁৰত এক দীঘলীয়া সংগ্ৰামৰ কাহিনী আছে। ১৯০৮ চনত আমেৰিকাৰ নিউয়ৰ্কৰ কাপোৰৰ কাৰখানাৰ শ্ৰমিকসকলে ৰাজপথলৈ ওলাই আহি উচিত মজুৰি, কামৰ সময় হ্ৰাস কৰা আৰু ভোটাধিকাৰ দাবী কৰিছিল। ইয়াৰ পৰাই আৰম্ভ হৈছিল নাৰী অধিকাৰৰ আন্দোলন। তাৰ পিছত ১৯১১ চনত প্ৰথমবাৰৰ বাবে আনুষ্ঠানিকভাৱে নাৰী দিৱস পালন কৰা হয়। অৱশেষত ১৯৭৫ চনৰ ৮ মাৰ্চত ৰাষ্ট্ৰসংঘই আনুষ্ঠানিকভাৱে এই দিৱসক আন্তঃৰাষ্ট্ৰীয় নাৰী দিৱস হিচাপে ঘোষণা কৰে।
এই দিনটোৰ গুৰুত্ব
আজি আমাক সোঁৱৰাই দিয়ে যে নাৰীক এৰি কোনো দেশ বা সমাজ সমৃদ্ধিশালী হ’ব নোৱাৰে। বৈষম্য দূৰ কৰি এখন সুন্দৰ পৃথিৱী গঢ়িবলৈ নাৰী আৰু পুৰুষৰ সম অংশগ্ৰহণ অতি প্ৰয়োজনীয়। সেয়ে আজি মহিলাৰ বিজয় উদযাপনৰ লগতে নিজৰ অধিকাৰ অৰ্জনৰ বাবে নতুন শপত গ্ৰহণৰ দিন।
