কোহলি এক বিৰাট বিতৰ্কত লিপ্ত হৈ পৰিছে। বক্সিং ডে’ টেষ্টৰ প্ৰথম দিনাই বিৰাট কোহলিয়ে ক্ৰীজত নৱাগত ছেম কনষ্টাসক কান্ধত খুন্দা মাৰে। তাৰ পিছত কথা কটাকটিৰ পৰা আৰম্ভ কৰি স্লেজিংলৈকে আনকি ৰঙা চকু দেখুৱালৈকে – একো বাদ নিদিলে কোহলিয়ে। পিছত উছমান খোৱাজা আহি দুয়োকে পৃথক কৰি দিয়ে।
আই চি চিৰ নিয়ম অনুসৰি বিপক্ষ ক্ৰিকেটাৰ, আম্পায়াৰ, খেলুৱৈৰ ছাপোৰ্ট ষ্টাফ, মেচ ৰেফাৰীৰ সৈতে অবাঞ্চিত শাৰীৰিক সংস্পৰ্শ কৰিব নোৱাৰি। আইচিচিৰ নিয়মাৱলীত কোৱা হৈছে যে, “ক্ৰিকেটত যিকোনো ধৰণৰ অনুপযুক্ত শাৰীৰিক সংস্পৰ্শ নিষিদ্ধ। ইয়াৰ পৰা কেইবাটাও ব্যতিক্ৰম আছে। কিন্তু যদি কোনো খেলুৱৈয়ে ইচ্ছাকৃতভাৱে, বেপেৰোৱাভাৱে অন্য কোনো ক্ৰিকেটাৰ বা আম্পায়াৰৰ খোজ কাঢ়ি গৈ বা দৌৰি গৈ খুন্দা মাৰে বা কান্ধত আঘাত কৰে, তেন্তে তেওঁলোকে এই নিয়ম উলংঘা কৰিছে বুলি বুলি গণ্য কৰা হ’ব।”
“উলংঘাৰ গুৰুত্ব মূল্যায়নত তলত দিয়া কাৰকসমূহ বিবেচনা কৰা হ’ব (ইয়াৰ ব্যতিক্ৰম হিচাপে): (i) বিশেষ পৰিস্থিতিৰ প্ৰসংগ, য’ত যোগাযোগটো ইচ্ছাকৃতভাৱে (অৰ্থাৎ, উদ্দেশ্যপ্ৰণোদিত), অসাৱধানতাপূৰ্ণ, গাফিলতি আৰু/বা পৰিহাৰযোগ্য আছিল নে নাই সেইটোকে ধৰি।” (ii) সংস্পৰ্শৰ বল (iii) সংস্পৰ্শৰ ফলত ক্ষতিগ্ৰস্ত ব্যাক্তি আঘাতপ্ৰাপ্ত হৈছে নে নাই; আৰু (iv) যাৰ সৈতে সংস্পৰ্শ হৈছে তাৰ পৰিচয় (লেভেল ১ কেৱল খেলুৱৈৰ সৈতে সংস্পৰ্শৰ ক্ষেত্ৰতহে প্ৰযোজ্য)।”
অৰ্থাৎ মেলবৰ্ণ টেষ্ট পৰিচালনাৰ দায়িত্বত থকা জিম্বাবুৱেৰ মেচ ৰেফাৰী এণ্ডি পাইক্ৰফ্টে বিবেচনা কৰিব যে কোহলি-কনষ্টাসৰ কাণ্ডটোৱে আইচিচিৰ কোনটো নিয়ম উলংঘা কৰিছে। যদি তেওঁ ইয়াক লেভেল-২ অপৰাধ বুলি গণ্য কৰে, তেন্তে সংশ্লিষ্ট ক্ৰিকেটাৰজনৰ লগত তিনি-চাৰিটা ডিমেৰিট পইণ্ট যোগ কৰা হ’ব।
এই পৰ্যায়ত অপৰাধ বেছি হ’লে জৰিমনা বিহা হ’ব। কিন্তু চাৰিটা ডিমেৰিট পইণ্ট যোগ কৰিলে সংশ্লিষ্ট ক্ৰিকেটাৰজন এখন মেচৰ বাবে নিলম্বিত হ’ব পাৰে।
কোহলীয়ে আগতেও এনে অপৰাধ সংঘটিত কৰিছিল?
২০১৯ চনত বেংগালুৰুত অনুষ্ঠিত হোৱা টি-২০ মেচত দক্ষিণ আফ্ৰিকাৰ বেটছমেন বুৰন হেণ্ড্ৰিক্সৰ কান্ধত আঘাত কৰাৰ বাবে কোহলিৰ নামত ডেমেৰিট পইণ্ট সংযোজন কৰা হৈছিল। কেতিয়া ক্ৰিকেটাৰে নিৰ্বাসনৰ সন্মুখীন হ’ব? যদি ২৪ মাহৰ ভিতৰত কোনো ক্ৰিকেটাৰৰ নামত চাৰিটা বা তাতকৈ অধিক ডিমেৰিট পইণ্ট যোগ হয়, তেন্তে সেই ক্ৰিকেটাৰজনক নিৰ্বাসনত পঠিওৱা হয়।
