কোকৰাঝাৰ জিলাৰ কাৰিগাঁও আৰক্ষী চকীৰ অন্তৰ্গত গৌৰীনগৰত সোমবাৰে নিশা এক পথ দুৰ্ঘটনাক কেন্দ্ৰ কৰি সংঘটিত হোৱা মব লিঞ্চিং বা গণপ্ৰহাৰৰ ঘটনাই সমগ্ৰ অঞ্চলটোত তীব্ৰ উত্তেজনাৰ সৃষ্টি কৰিছে। এই ভয়াৱহ কাণ্ডত বৰ্তমানলৈকে দুজন লোকৰ মৃত্যু হোৱাৰ বিপৰীতে তিনিজন গুৰুতৰভাৱে আহত হৈ চিকিৎসাধীন হৈ আছে।
প্ৰাপ্ত খবৰ অনুসৰি, সোমবাৰে নিশা প্ৰায় ৭ বজাত ৩১ নম্বৰ ৰাষ্ট্ৰীয় ঘাইপথৰ সমীপৰ গৌৰীনগৰত এখন স্কৰপিঅ‘ বাহন দুৰ্ঘটনাত পতিত হয়। চিকনা জৌহালৌও বিস্মিত (৩২) আৰু তেওঁৰ সহযোগীসকলে কৰ্মস্থলীৰ পৰা সামগ্ৰী লৈ উভতি আহি থকাৰ সময়তে এই দুৰ্ঘটনাটো ঘটে। স্থানীয় একাংশ লোকে দুৰ্ঘটনাটোত ক্ষুব্ধ হৈ বাহনখনলৈ শিলগুটি নিক্ষেপ কৰে, যাৰ ফলত বাহনখন পথৰ কাষত বাগৰি পৰে। ইয়াৰ পাছতেই উত্তেজিত জনতাই বাহনখনৰ পৰা আৰোহীসকলক টানি উলিয়াই আনি নিৰ্মমভাৱে প্ৰহাৰ কৰে আৰু বাহনখন জ্বলাই দিয়ে।
এই নিৰ্মম আক্ৰমণত চিকনা জৌহালৌও বিস্মিতৰ ঘটনাস্থলীতে মৃত্যু হয়। আনহাতে, সুনীল মুৰ্মু (৪০) নামৰ আন এজন লোকৰ চিকিৎসালয়ত মৃত্যু ঘটে। আহতসকল ক্ৰমে মহেশ মুৰ্মু (৫০), প্ৰভাত ব্ৰহ্ম (৫০) আৰু তেওঁৰ ১৭ বছৰীয়া পুত্ৰ যুগিৰাজ ব্ৰহ্ম বুলি চিনাক্ত কৰা হৈছে। বৰ্তমান তিনিওজন কোকৰাঝাৰ চিকিৎসা মহাবিদ্যালয়ত সংকটজনক অৱস্থাত চিকিৎসাধীন হৈ আছে।
সোমবাৰৰ এই ঘটনাক কেন্দ্ৰ কৰি মঙলবাৰে পুৱাৰে পৰা কাৰিগাঁও অঞ্চলত পৰিস্থিতি অধিক অৱনতি ঘটে। উত্তেজিত ৰাইজে কাৰিগাঁও থানাৰ সন্মুখত ৰাষ্ট্ৰীয় ঘাইপথ অৱৰোধ কৰি প্ৰতিবাদ সাব্যস্ত কৰে। প্ৰতিবাদকাৰীয়ে বীৰছা কমাণ্ডো ফ‘ৰ্চৰ দুটাকৈ অস্থায়ী শিবিৰ আৰু একাংশ দোকান-গৃহত অগ্নিসংযোগ কৰাৰ লগতে চিদু কানহু ভৱন আদিৰ ব্যাপক ক্ষতিসাধন কৰে। পৰিস্থিতি নিয়ন্ত্ৰণৰ বাহিৰলৈ যোৱা দেখি অঞ্চলটোত আৰক্ষী আৰু নিৰাপত্তা বাহিনী মোতায়েন কৰা হৈছে।
কোকৰাঝাৰৰ বিধায়ক লৰেন্স ইছলাৰী আৰু বিটিচিৰ কাৰ্যবাহী সদস্য প্ৰকাশ বসুমতাৰীয়ে চিকিৎসালয়ত উপস্থিত হৈ পৰিস্থিতিৰ বুজ লয়। বিধায়ক ইছলাৰীয়ে এই ঘটনাক অত্যন্ত নিন্দনীয় আৰু দুৰ্ভাগ্যজনক বুলি অভিহিত কৰি শান্তি বৰ্তাই ৰাখিবলৈ আহ্বান জনাইছে। আৰক্ষীয়ে জানিবলৈ দিয়া মতে, এতিয়ালৈকে এই ঘটনাৰ সৈতে জড়িত থকাৰ অভিযোগত ১৮ জন ব্যক্তিক আটক কৰা হৈছে। একাংশ লোকে ইয়াক গৰু চোৰৰ সন্দেহত সংঘটিত হোৱা ঘটনা বুলিও সন্দেহ প্ৰকাশ কৰিছে।
এই বৰ্বৰ হত্যাকাণ্ডৰ প্ৰতিবাদত আৰু ন্যায়ৰ দাবীত ‘বনছু‘ৱে (BNSU) বুধবাৰে বিটিচি (BTC) বন্ধৰ আহ্বান জনাইছে। বৰ্তমান সমগ্ৰ কোকৰাঝাৰ জিলাত এক চেপা উত্তেজনাই বিৰাজ কৰিছে।
