অসমৰ উত্তৰ আৰু দক্ষিণ পাৰক সংযোগ কৰা ঐতিহাসিক কলীয়াভোমোৰা দলঙত পুনৰ টোলকৰ সংগ্ৰহৰ বিষয়টোক কেন্দ্ৰ কৰি ৰাজ্যজুৰি তীব্ৰ প্ৰতিক্ৰিয়াৰ সৃষ্টি হৈছে। নগাঁও আৰু শোণিতপুৰ জিলাক সংযোগ কৰা চাৰি লেনযুক্ত ৭১৫ (এ) নং ৰাষ্ট্ৰীয় ঘাইপথত যাতায়ত কৰা বাহনৰ পৰা অতি সোনকালে টোল সংগ্ৰহ কৰা হ’ব।
এই উদ্দেশ্যে নগাঁও আৰু শোণিতপুৰ জিলাৰ সীমান্তৱৰ্তী চিলঙত এটা নতুন টোল প্লাজা নিৰ্মাণৰ কাম প্ৰায় সম্পূৰ্ণ হৈ উঠিছে। বিভাগীয় সূত্ৰৰ মতে, চূড়ান্ত অনুমোদন লাভ কৰাৰ পাছতে চলিত মাহৰ পৰাই ইয়াত টোল সংগ্ৰহৰ প্ৰক্ৰিয়া আৰম্ভ কৰাৰ পৰিকল্পনা কৰা হৈছে।
উল্লেখ্য যে ২০১৬ চনতো এই একেটা স্থানতে টোল সংগ্ৰহৰ পদক্ষেপ গ্ৰহণ কৰা হৈছিল; কিন্তু জনসাধাৰণৰ তীব্ৰ প্ৰতিবাদৰ পৰিপ্ৰেক্ষিতত চৰকাৰে এই সিদ্ধান্ত বাতিল কৰিবলৈ বাধ্য হৈছিল। স্থানীয় লোকসকলৰ মতে, এই নতুন টোল কৰৰ বোজাই জীৱিকা, ব্যৱসায়, শিক্ষা আৰু চিকিৎসাৰ দৰে বিভিন্ন কামত দৈনিক দলঙখন পাৰ হোৱা সাধাৰণ যাত্ৰীসকলক অতিশয় জুৰুলা কৰিব। অত্যাৱশ্যকীয় সামগ্ৰীৰ পৰিবহন ব্যয় বৃদ্ধি পোৱাৰ ফলত নিম্নবিত্ত লোকসকল আটাইতকৈ বেছি ক্ষতিগ্ৰস্ত হোৱাৰ সম্ভাৱনা আছে।
ৰাষ্ট্ৰীয় ঘাইপথ আৰু আন্তঃগাঁথনি উন্নয়ন নিগম লিমিটেড (NHIDCL) এ বৰ্তমান চৰকাৰৰ সৈতে এই প্ৰকল্পৰ কাম চলাই আছে। আনহাতে, বিভিন্ন দল-সংগঠন আৰু স্থানীয় ৰাইজে চৰকাৰৰ এই পদক্ষেপৰ বিৰুদ্ধে ইতিমধ্যে তীব্ৰ প্ৰতিবাদ সাব্যস্ত কৰিছে। কি কাৰণত পুনৰ টোল সংগ্ৰহৰ সিদ্ধান্ত লোৱা হৈছে, তাক লৈ ৰাইজে চৰকাৰৰ পৰা সম্পূৰ্ণ স্বচ্ছতা দাবী কৰিছে।
