প্লে অফত স্থান নিশ্চিত কৰিবলৈ দিল্লী কেপিটেলছৰ বিৰুদ্ধে খেলখনত যিকোনো প্ৰকাৰে জয়লাভ কৰিবলগীয়া আছিল কলকাতা নাইট ৰাইডাৰ্ছৰ। কিয়নো এই মেচৰ আগলৈকে পাঁচটা দলৰেই ১০ পইণ্টকৈ আছিল। পূৰ্বৰ মেচখনত বিপুল ৰান সংগ্ৰহ কৰিও পঞ্জাব কিংছৰ হাতত পৰাস্ত হ’বলগীয়া হৈছিল নাইট ৰাইডাৰ্ছ।
সোমবাৰে কেকেআৰে ৭ উইকেটত জয়লাভ কৰি জয়ৰ পথলৈ ঘূৰি আহিল। শ্ৰেয়াছৰ দলটোৱে ১২ পইণ্টেৰে লীগ তালিকাত দ্বিতীয় স্থানত আছে। সোমবাৰে দিল্লীয়ে জয়ী হ’লে তেওঁলোক দ্বিতীয় স্থানলৈ উন্নীত হ’লহেঁতেন৷
খেলখন আছিল কলকাতা নাইট ৰাইডাৰ্ছ বনাম দিল্লী কেপিটেলছ। কিন্তু মেচখনৰ কেন্দ্ৰবিন্দু আছিল সৌৰভ গাংগুলী আৰু শ্বাহৰুখ খান।
এসময়ত সৌৰভ গাংগুলী কলকাতা নাইট ৰাইডাৰ্ছৰ অধিনায়ক আছিল। ইয়াৰ পিছত ঘটনাৰ পাকচক্ৰত কলকাতাৰ ড্ৰেছিং ৰুম এৰি পুনেলৈ ঢাপলি মেলিছিল সৌৰভ। এদশকৰ আগৰ সৌৰভৰ পুনে আৰু কেকেআৰৰ সেই মেচখন আজিও সকলোৰে মনত আছে। সেইদিনা বংগ যেন বিভক্ত হৈ পৰিছিল।
সৌৰভ এতিয়া দিল্লী কেপিটেলছৰ ক্ৰিকেট সঞ্চালক। ইডেনলৈ অহাৰ লগে লগে সৌৰভ ধ্বনিৰে উত্তাল চহৰখন। অৱশ্যে সোমবাৰৰ নিশাটো দিল্লীৰ নাছিল। নিশাৰ নিদ্ৰা কাঢ়ি নিছিল কে কে আৰে।
টছত জয়ী হৈ ঋষভ পণ্টে প্ৰথমে বেটিং কৰাৰ সিদ্ধান্ত লয়। দিল্লীয়ে আৰম্ভণিৰে পৰা নিয়মীয়া ব্যৱধানত উইকেট হেৰুৱাইছিল। কোনেও ডাঙৰ ৰান সংগ্ৰহ কৰিব পৰা নাছিল। মুম্বাইৰ বিৰুদ্ধে বিস্ফোৰক বেটিং কৰিছিল জেক ফ্ৰেজাৰে। সোমবাৰে তেওঁৰ বেট শান্ত হৈ থাকিল। দিল্লীৰ বেটছমেনৰ ভিতৰত সৰ্বাধিক ৰান সংগ্ৰহ কৰে কেৱল কুলদীপ যাদৱৰ। তেওঁ ৩৫ ৰানত অপৰাজিত হৈ থাকে। অধিনায়ক ঋষভে ২৭ ৰান সংগ্ৰহ কৰে। অৱশ্যে দিল্লীৰ ইনিংছ তছনছ কৰাৰ আঁৰত আছে কলকাতা নাইট ৰাইডাৰ্ছৰ বলাৰসকল।
শেষৰখন মেচত মিচেল ষ্টাৰ্কক ডাগআউটত ৰাখি খেলিছিল কেকেআৰে। সোমবাৰে ষ্টাৰ্কে খেলিছিল। ষ্টাৰ্কে ৪৩ ৰানত এটা উইকেট দখল কৰে। অষ্ট্ৰেলিয়াৰ তাৰকা বলাৰগৰাকীৰ বাবেই ফ্ৰেজাৰে ঘূৰি যাবলগীয়া হৈছিল। স্পিনাৰ বৰুণ চক্ৰৱৰ্তীয়ে ১৬ ৰানত ৩টা উইকেট দখল কৰে। বৈভৱ অৰোৰা আৰু হৰ্ষিত ৰাণাই ২টাকৈ উইকেট দখল কৰে। কলকাতাৰ বলাৰসকলে আক্ৰমণাত্মকভাৱে বল কৰে।
শ্বাহৰুখ খানে কলকাতাৰ এই আগ্ৰাসী বলিং-বেটিং চাব বিচাৰিছিল। খেলৰ এদিন আগতে তেওঁ কলকাতা চহৰলৈ আহিছিল। কিং খানে পুত্ৰ আব্ৰামক ক্ৰিকেটৰ সাধাৰণ পাঠ দিয়াও দেখা গৈছিল। সোমবাৰে কলকাতাৰ খেলুৱৈসকলে তেওঁৰ সন্মুখত নিজৰ শক্তি প্ৰদৰ্শন কৰিছিল। কে কে আৰ বলাৰৰ দক্ষতাৰ বাবেই দিল্লী কেপিটেলে ১৫৩ ৰানতে ইনিংছ সামৰিবলৈ বাধ্য হয়।
সেই ৰানৰ লক্ষ্য খেদি ফিল ছল্টে ধুমুহাৰ সৃষ্টি কৰিলে। অ’পেন কৰিবলৈ নামি তেওঁ আৰু সুনীল নাৰাইনে ৭৯ ৰানৰ পাৰ্টনাৰশ্বিপ গঢ়ে। কিন্তু সুনীল নাৰাইনে পূৰ্বৰ দিনটোৰ দৰে আগ্ৰাসী বেটিং কৰিব নোৱাৰিলে। ১৫ ৰান সংগ্ৰহ কৰি অক্ষৰ পেটেলৰ বলত আউট হৈ উভতি আহে। নাৰাইন, ছল্ট, ৰাছেলৰ শক্তিৰ বাবে ৰিংকু সিঙে বেটিং কৰাৰ বিশেষ সুযোগ পোৱা নাছিল। সোমবাৰে তেওঁক তিনি নম্বৰত পঠিওৱা হৈছিল।
বিশ্বকাপৰ বাবে দলটো এতিয়াও ঘোষণা কৰা হোৱা নাই। কিন্তু শ্বাহৰুখ খানে নিৰ্বাচকসকলৰ ওপৰত চাপ বৃদ্ধি কৰিলে। আই পি এল সম্প্ৰচাৰক সংস্থাৰ সৈতে হোৱা এক সাক্ষাৎকাৰত শ্বাহৰুখে কয় যে মই ৰিংকু বিশ্বকাপৰ দলত থকাটো বিচাৰো।
সোমবাৰে যেতিয়া ৰিংকুৱে বেটিং কৰিবলৈ নামিছিল, তেতিয়া কেকেআৰ শিবিৰত জয়ৰ গোন্ধ বিয়পিছিল। ১৫৩ ৰান টী-২০ ফৰ্মেটত বৰ ডাঙৰ ৰান নহয়। তাৰ উপৰি ফিল ছল্টে বিধ্বংসী বেটিং অব্যাহত ৰাখিছে। দিল্লীৰ বলাৰসকলক গোটেই খেলপথাৰৰ চৌদিশে মাৰি পঠিয়াইছিল। ফলত ৰিংকুৰ ওপৰত কোনো চাপ নাছিল। ছল্ট (৬৮)ক অক্ষৰ পেটেলে আউট কৰে। তেতিয়া কে কে আৰৰ ৰান আছিল ২ উইকেটত ৯৬ ৰান।
ৰিংকুৱেও ৰান নাপালে। তেওঁ ১১ ৰান কৰি উভতি আহিল। অৱশ্যে কলকাতা নাইট ৰাইডাৰ্ছৰ মেচখনত জয়ী হোৱাত কোনো সমস্যা নাছিল। অধিনায়ক শ্ৰেয়াছ আয়াৰ আৰু ভেংকটেশ আয়াৰ শেষলৈকে অপৰাজিত থাকি বাকী কামখিনি শেষ কৰিলে। এই জয়েৰে কেকেআৰে ৯খন খেলত মুঠ ১২ পইণ্ট সংগ্ৰহ কৰে।
সংক্ষিপ্ত স্কোৰঃ
দিল্লী কেপিটেলছ-১৫৩/৯ (কুলদীপ ৩৫*, পন্ত ২৭, বৰুণ ৩/১৬)
কলকাতা নাইট ৰাইডাৰ্ছ – ১৫৭/৩ (ছল্ট ৬৮)
কেকেআৰে ৭ উইকেটত জয়লাভ কৰে।
