কৰ’না মহামাৰীৰ প্ৰকোপ বৃদ্ধিৰ ফলত স্থবিৰ হৈ পৰিছে জনসাধাৰণৰ স্বাভাৱিক জীৱন-যাপন ৷ চৰকাৰে জনতাৰ জীৱন ৰক্ষাৰ স্বাৰ্থত আংশিক লকডাউনৰ দৰে সিদ্ধান্ত গ্ৰহণ কৰিব লগীয়া হৈছে ৷ বন্ধ হৈ পৰিছে বজাৰ সমাৰ ৷ স্তব্ধ হৈ পৰিছে যাতায়াত ৷
আনহাতে, অনিৰ্দিষ্টকাললৈ বন্ধ ঘোষণা কৰা হৈছে শিক্ষানুষ্ঠান সমূহো ৷ শ্ৰেণীৰ পাঠদানৰ পৰিৱৰ্তে আৰম্ভ কৰা হৈছে অনলাইন পাঠদান ৷ পিছে, এই অনলাইন পাঠ গ্ৰহণ কৰিবলৈ গৈয়ে সমস্যাত পৰিছে বহু ছাত্ৰ-ছাত্ৰী ৷
কাৰণ বহু পৰিয়ালৰ অভিভাৱকৰ নিজ সন্তানক এটা এণ্ড্ৰইড ম’বাইল হেণ্ডছেট কিনি দিবলৈ সামৰ্থ্য নাই ৷ গোৱালপাৰা জিলাৰ কৃষ্ণাই অঞ্চলতো এনে বহু ছাত্ৰ-ছাত্ৰী আছে যিয়ে মাত্ৰ এটা ম’বাইলৰ অভাৱত অনলাইন ক্লাছ কৰিবলৈ সক্ষম হোৱা নাই ৷
এনে কিছু দুখীয়া পৰিয়ালৰ মেধাৱী ছাত্ৰ-ছাত্ৰীৰ মাজতে আজি কৃষ্ণাই প্ৰেছ ক্লাৱে একোটিকৈ এণ্ড্ৰইড ম’বাইল বিতৰণ কৰে ৷
কৃষ্ণাই অঞ্চলৰ বিভিন্নজন শুভাকাংক্ষীৰ সহযোগত আজি কৃষ্ণাই প্ৰেছ ক্লাৱে অঞ্চলটোৰ মুঠ পোন্ধৰ গৰাকী ছাত্ৰ-ছাত্ৰীৰ মাজত বিতৰণ কৰে একোটিকৈ ম’বাইল হেণ্ডছেট ৷
সম্পূৰ্ণ ক’ভিড প্ৰ’টকল মানি ছাত্ৰ-ছাত্ৰী সকলে অধ্যয়ণ কৰা শিক্ষানুষ্ঠানৰ সমুখত বা ঘৰে ঘৰে গৈ সাংবাদিক সকলে ম’বাইল সমূহ বিতৰণ কৰে ৷
কৃষ্ণাই প্ৰেছ ক্লাৱৰ এই সুন্দৰ প্ৰচেষ্টাত সহযোগ কৰিছে অঞ্চলটোৰ বহু কেইজন শুভাকাংক্ষীয়ে ৷ কৃষ্ণাই প্ৰেছ ক্লাৱৰ এই উদ্যোগক সচেতন মহলে আদৰণি জনাইছে ৷
