এইবাৰ অসমত নিৰ্বাচনী প্ৰতিদ্বন্দ্বিতা আগবঢ়াব ঝাৰখণ্ড মুক্তি মৰ্চাই। আগন্তুক ২০২৬ চনৰ অসম বিধানসভা নিৰ্বাচনৰ বাবে ২১ গৰাকী প্ৰাৰ্থীৰ তালিকা আনুষ্ঠানিকভাৱে প্ৰকাশ কৰে দলটোৱে। আজি মনোনয়ন দাখিলৰ অন্তিম দিনটোত ঝাৰখণ্ড মুক্তি মৰ্চাৰ প্ৰাৰ্থীসকলে নিজ নিজ সমষ্টিত মনোনয়ন দাখিল কৰে।
জেএমএমৰ কেন্দ্ৰীয় সমিতিৰ হৈ সাধাৰণ সম্পাদক তথা মুখপাত্ৰ বিনোদ কুমাৰ পাণ্ডেই স্বাক্ষৰ কৰা এই তালিকাখনত উজনি অসম আৰু অন্যান্য কেইবাটাও অঞ্চলৰ প্ৰাৰ্থীসকলক স্থান দিয়া হৈছে। ইয়াৰ ভিতৰত ভেৰগাঁও সমষ্টিৰ পৰা প্ৰাৰ্থিত্ব লাভ কৰা প্ৰভাত দাস পানিকাৰ নাম উল্লেখযোগ্য। প্ৰভাত দাস পানিকা অসমৰ এগৰাকী পৰিচিত আদিবাসী নেতা তথা সমাজকৰ্মী, তেখেতে দীৰ্ঘদিন ধৰি শ্ৰমিক আৰু ছাত্ৰ সংগঠনৰ নেতৃত্ব বহন কৰি আহিছে। তেওঁ বৰ্তমান শ্ৰমিকৰ অধিকাৰ আৰু কল্যাণৰ হকে কাম কৰা সংগঠন ‘অসম মজুৰি শ্ৰমিক ইউনিয়ন‘ৰ (এএমএছইউ) সহকাৰী সম্পাদক হিচাপে কাৰ্যনিৰ্বাহ কৰি আছে। ইয়াৰ উপৰিও তেওঁ সদৌ আদিবাসী ছাত্ৰ সন্থাৰ (আছা) ওদালগুৰি জিলা সমিতিৰ প্ৰাক্তন সভাপতি আছিল।
প্ৰকাশিত তালিকাখনত ভেৰগাঁও সমষ্টিৰ লগতে আন কেইবাখনো আসনৰ প্ৰাৰ্থীৰ নাম ঘোষণা কৰা হৈছে। ইয়াৰ ভিতৰত মাজবাটৰ পৰা প্ৰীতি ৰেখা বাৰ্লা, বিশ্বনাথৰ পৰা তেহাৰু গৌড়, খুমটাইৰ পৰা অমিত নাগ, চাবুৱাৰ পৰা ভূৱেন মুৰাৰী, গোসাঁইগাঁৱত ফেডিক্ৰচন হাছদা, সোণাৰিত বলদেৱ তেলী, দুলীয়াজানত পিটাৰ মিনজ, ৰঙানদীত পৱন চাওতাল, ডিগবৈত ভৰত নায়ক আৰু টিংখাঙত মহাবীৰ বাস্কেৰ নাম উল্লেখযোগ্য
সমান্তৰালভাৱে, অনুসূচিত জনজাতিৰ বাবে সংৰক্ষিত বোকাজান সমষ্টিৰ পৰা প্ৰতাপচন্দ্ৰ ৰংফাৰ আৰু খোৱাঙৰ পৰা প্ৰভাকৰ দাসে প্ৰতিদ্বন্দ্বিতা কৰিব। আনহাতে, বৰচলাৰ পৰা আব্দুল মাজন, ৰঙাপৰাৰ পৰা মেথিউ তপ্ন, মাৰ্ঘেৰিটাৰ পৰা জৰ্নেল মিনজ, নাহৰকটীয়াৰ পৰা সঞ্জয় বাঘ আৰু মাকুমৰ পৰা মুনা কৰ্মকাৰকো দলে টিকট প্ৰদান কৰিছে।
ৰাজনৈতিক বিশ্লেষকসকলৰ মতে, ২১ খন আসনত প্ৰতিদ্বন্দ্বিতা কৰাৰ জেএমএমৰ এই সিদ্ধান্তই অসমৰ জনজাতীয় আৰু চাহ বাগিচাৰ সম্প্ৰদায়সমূহৰ ভোটাৰসকলক লক্ষ্য হিচাপে লোৱা বুলি ধাৰণা কৰা হৈছে। আগন্তুক নিৰ্বাচনত জেএমএম-এ ৰাজ্যখনৰ প্ৰতিষ্ঠিত দল যেনে ভাৰতীয় জনতা পাৰ্টি, কংগ্ৰেছ আৰু অন্যান্য আঞ্চলিক দলসমূহৰ সৈতে প্ৰতিদ্বন্দ্বিতা কৰিব।
