ক্ৰমাৎ ভয়াৱহ ৰূপ ধাৰণ কৰিছে জম্মু-কাশ্মীৰৰ সন্ত্ৰাসবাদী কাৰ্যকলাপে। উপত্যকাটোত নিৰন্তৰভাৱে নিৰাপত্তাৰক্ষীয়ে সন্ত্ৰাসবাদ নিৰ্মূল কাৰ্যসূচী চলাই আহিছে যদিও হ্ৰাস পোৱা নাই সন্ত্ৰাসবাদীৰ কাৰ্যকলাপ।
কিছুদিন পূৰ্বে সংঘটিত কাশ্মীৰি পণ্ডিতৰ হত্যাকাণ্ড আৰু তাৰ পাছতে দুগৰাককৈপ্ৰব্ৰজিত শ্ৰমিকৰ হত্যাকাণ্ডৰ চাঞ্চল্য মাৰ নাযাওঁতেই এইবাৰ পুনৰ সন্ত্ৰাসবাদীৰ আক্ৰমণত আহত হৈছে দুগৰাকী প্ৰব্ৰজিত শ্ৰমিক।
কাশ্মীৰৰ অনন্তনাগত সন্ত্ৰাসবাদীৰ আক্ৰমণত আজি বিহাৰৰ এগৰাকী শ্ৰমিক আৰু নেপালৰ আন এগৰাকী শ্ৰমিক আহত হয়। দুয়োগৰাকী প্ৰব্ৰজনকাৰী শ্ৰমিক অনন্তনাগৰ বণ্ডিলগাম অঞ্চলৰ এখন ব্যক্তিগত বিদ্যালয়ত কৰ্মৰত আছিল।
কাশ্মীৰ জোন আৰক্ষীয়ে এক টুইট যোগে এই আক্ৰমণৰ কথা সদৰী কৰিছে। টুইটটোত আৰক্ষীয়ে কয়, “সন্ত্ৰাসবাদীয়ে অনন্তনাগ জিলাৰ বণ্ডিয়ালগামৰ এখন ব্যক্তিগত এছএপিএছ বিদ্যালয়ত কাম কৰি থকা দুগৰাকী প্ৰব্ৰজিত শ্ৰমিকৰ ওপৰত গুলীচালনা কৰিছিল।”
আহত দুয়োগৰাকী শ্ৰমিককে তাৎক্ষণিকবাৱে চিকিৎসালয়লৈ প্ৰেৰণ কৰা হৈছে বুলি আৰক্ষীয়ে জানিবলৈ দিয়ে। ইফালে আঘাতপ্ৰাপ্ত এগৰাকী শ্ৰমিকৰ অৱস্থা সংকটজনক বুলিও আৰক্ষীয়ে সদৰী কৰিছে।
উল্লেখ্য যে যোৱা মাহত উপত্যকাটোৰ শ্বপিয়ানত গ্ৰেনেড আক্ৰমণত উত্তৰ প্ৰদেশৰ দুজন শ্ৰমিক নিহত হৈছিল। আক্ৰমণৰ ঠিক পিছতে আৰক্ষীয়ে অভিযুক্ত আক্ৰমণকাৰী ইমৰান বছিৰ গানাইক গ্ৰেপ্তাৰ কৰিছিল।
কাশ্মীৰ আৰক্ষীৰ মতে ইমৰান বছিৰ গানাই লস্কৰ-ই-তৈবাৰ এগৰাকী ‘হাইব্ৰিড সন্ত্ৰাসবাদী’ আছিল। গ্ৰেপ্তাৰ হোৱাৰ এদিন পিছতে আন এক সন্ত্ৰাসবাদ বিৰোধী অভিযানৰ সময়ত গানাই নিহত হৈছিল।
