২০২৩ চনত তদানীন্তন মুখ্যমন্ত্ৰী শিৱৰাজ সিং চৌহানৰ চৰকাৰে ‘লাডলী বেহেন যোজনা’ৰ অধীনত মধ্যপ্ৰদেশৰ ১.২৯ কোটি মহিলাৰ একাউণ্টলৈ প্ৰায় ১২ কোটি টকা ট্ৰেন্সফাৰ কৰিছিল। সেই সময়ত এই পদক্ষেপে আলোড়নৰ সৃষ্টি কৰিছিল যদিও এতিয়া আঢ়ৈ বছৰৰ পাছত সেয়া ধৰি ৰাখিবলৈ সংগ্ৰাম কৰিব লগা হৈছে।
শুকুৰবাৰে নৰ্মদাপুৰমত অনুষ্ঠিত ‘লাডলী বেহেন’ সন্মিলনত বৰ্তমানৰ মুখ্যমন্ত্ৰী মোহন যাদৱে যোগ্যতাৰ ভিত্তিত ৰাজ্যৰ ১.২৫ কোটি হিতাধিকাৰীৰ একাউন্টত আঁচনিৰ ১৮৩৬ কোটি টকা হস্তান্তৰ কৰে। কিন্তু প্ৰকল্পটোৰ ধাৰাবাহিকতা বজাই ৰাখিবলৈ চৰকাৰৰ কোষাগাৰত ঋণৰ পৰিমাণ বৃদ্ধি পাই গৈছে।
এই পৰ্যন্ত ৰাজ্য চৰকাৰে ‘লাডলী বেহেন’ যোজনাৰ বাবে মুঠ ৪৮,৬৩২ কোটি টকা ব্যয় কৰিছে। যিহেতু প্ৰকল্পটোৰ মাহিলী ব্যয় ১৫৪০ কোটিৰ পৰা ১৮৫০ কোটি টকা, গতিকে ২০২৬-২৭ বিত্তীয় বৰ্ষত কেৱল এই আঁচনিৰ বাবে প্ৰায় ২২,৬৮০ কোটি টকা ব্যয় হ’ব বুলি অনুমান কৰা হৈছে।
প্ৰতিবেদনত কোৱা হৈছে যে যোৱা দুবছৰত দৈনিক গড়ে ১২৫ কোটি টকা ঋণত পৰি লাডলী বেহেনৰ নামত মধ্যপ্ৰদেশৰ ঋণৰ বোজা ৪,৬৪,৩৪০ কোটি টকা হৈছেগৈ! যিটো ৰাজ্যৰ মুঠ বাৰ্ষিক বাজেটতকৈ ৪৩ হাজাৰ কোটি টকা বেছি!
প্ৰথমে মাহেকীয়া ভাট্টা ১১০০ টকাৰে আৰম্ভ কৰা হৈছিল যদিও যোৱা বছৰ দেৱালীৰ সময়ত এই আঁচনিখন ১৫০০ টকালৈ বৃদ্ধি কৰা হৈছিল। পুনৰ প্ৰতিশ্ৰুতি দিয়া হ’ল যে ভাট্টাৰ ৰাশি ৩ হাজাৰ টকালৈ বৃদ্ধি কৰা হ’ব। কিন্তু মহিলাৰ বিকাশৰ বাবে লোৱা এই পদক্ষেপ এতিয়া ৰাজ্য চৰকাৰৰ বাজেটৰ অন্যতম বোজা। কিন্তু ভাট্টা ৰাশি বৃদ্ধি কৰাৰ পাছতো যোৱা দুবছৰত কমিছে ‘বেহেন’ৰ সংখ্যা।
প্ৰকল্পটো আৰম্ভ হোৱাৰ সময়ত এই সংখ্যা আছিল ১ কোটি ২৯ লাখ, ২০২৩ চনৰ অক্টোবৰ মাহত ১ কোটি ৩১ লাখ হ’ল যদিও বৰ্তমান ১ কোটি ২৫ লাখ গ্ৰাহকে এই সেৱা ব্যৱহাৰ কৰি আছে। দেখা গৈছে যে বিগত ৩০ মাহত প্ৰায় ৫৭ লাখ মহিলা এই আঁচনিৰ পৰা বাদ পৰিছে। ইয়াৰে ১.৫ লাখ হিতাধিকাৰীয়ে ৬০ বছৰৰ সীমা অতিক্ৰম কৰিছে। ইপিনে চৰকাৰে পুনৰ আঁচনিৰ পঞ্জীয়ন প্ৰক্ৰিয়া বন্ধ কৰি দিছে।
আঁচনিৰ ধন কোনে দিব? বিশেষজ্ঞ মহলৰ এক প্ৰশ্নৰ উত্তৰত তেতিয়াৰ মুখ্যমন্ত্ৰীয়ে উত্তৰ দিছিল, “এয়া কোনো চৰকাৰী আঁচনি নহয়, এয়া এক আন্দোলন।” ইয়াৰ পিছতে ২০২৩ চনৰ বিধানসভা নিৰ্বাচনত মধ্যপ্ৰদেশে বিজেপিৰ এক আচৰিত বিজয়ৰ সাক্ষী হৈ পৰিছিল। কিন্তু ৩০ মাহৰ ভিতৰতে সেই ‘আন্দোলন’ৰ খৰচৰ ভৰত উৱাদিহ নোপোৱা অৱস্থাত পৰিছে বিজেপি চৰকাৰখনে।
