উত্তৰ প্ৰদেশ চৰকাৰে শুকুৰবাৰে লখিমপুৰ খেৰী ঘটনাৰ তদন্ত কৰি থকা বিশেষ তদন্তকাৰী দল (SIT)ৰ নেতৃত্ব দি থকা আৰক্ষীৰ উপ মহাপৰিদৰ্শক (DIG) উপেন্দ্ৰ কুমাৰ আগৰৱালক গোণ্ডা ৰেঞ্জৰ DIG হিচাপে দায়িত্ব ল’বলৈ নিৰ্দেশ দিয়ে।
২০০৫-বেচৰ এজন আইপিএছ বিষয়া আগৰৱাল লক্ষ্ণৌত উত্তৰ প্ৰদেশৰ আৰক্ষী সঞ্চালক প্ৰধানৰ মুখ্য কাৰ্যালয়ৰ সৈতে সংযুক্ত আছিল।
অতিৰিক্ত সঞ্চালক প্ৰধান (আইন-শৃংখলা) প্ৰশান্ত কুমাৰে কৈছিল যে আগৰৱালে তেওঁৰ নতুন নিযুক্তিৰ স্বত্বেও বিশেষ তদন্তকাৰী দলৰ মুৰব্বী হৈ থাকিব।
আগৰৱালৰ নতুন দায়িত্বই সকলোকে আচৰিত কৰি তুলিছে কিয়নো লখিমপুৰ খেৰী জিলা গোণ্ডা পৰিসৰৰ অন্তৰ্গত নহয়, বৰঞ্চ খেৰী জিলা লক্ষ্ণৌ পৰিসৰৰহে অধীনত আছে।
উল্লেখ্য যে কেন্দ্ৰীয় গৃহ ৰাজ্য মন্ত্ৰী অজয় মিশ্ৰৰ পুত্ৰ আশীষ মিশ্ৰৰ কনভয়ে ৩ অক্টোবৰত প্ৰতিবাদকাৰী কৃষকক গাড়ীৰে মহতীয়াই নিছিল।
ঘটনাটোত চাৰিজন কৃষক নিহত হোৱাৰ লগতে এজন সাংবাদিকসহ আন চাৰিজন সংঘৰ্ষত নিহত হয়। ৰাজ্য চৰকাৰে গোচৰটোৰ তদন্তৰ বাবে আগৰৱালাৰ অধীনত ন জনীয়া বিশেষ তদন্তকাৰী দল গঠন কৰিছিল।
ৰাজ্যিক মন্ত্ৰী অজয় মিশ্ৰৰ পুত্ৰ আশীষ মিশ্ৰকে ধৰি প্ৰায় ১০ জন লোকক বিশেষ তদন্তকাৰী দলে লখিমপুৰ খেৰী গোচৰত গ্ৰেপ্তাৰ কৰিছে।
আজি লখিমপুৰ খেৰী আদালতে আশীষ মিশ্ৰ আৰু অংকিত দাস, তেওঁৰ চালক শেখৰ ভাৰতী আৰু তেওঁৰ ব্যক্তিগত দেহৰক্ষী লতিফকে ধৰি আন তিনিজনক আৰক্ষী জিম্মাত বিচাৰি বিশেষ তদন্তকাৰী দলৰ আবেদনৰ শুনানি ল’ব।
ইতিমধ্যে উচ্চতম ন্যায়ালয়ে লখিমপুৰ খেৰী ঘটনা সন্দৰ্ভত উত্তৰ প্ৰদেশ চৰকাৰৰ লেহেমীয়া স্থিতিক তীব্ৰ ভৎসনা কৰি গোচৰটোৰ ক্ষেত্ৰত দায়বদ্ধতা প্ৰদৰ্শন কৰিবলৈ সকীয়নি দিছিল।