বিধানসভা নিৰ্বাচনৰ ভোটগ্ৰহণ সমাপ্ত হোৱাৰ ২৪ ঘণ্টা নৌহওঁতেই শুকুৰবাৰে পুৱতি নিশা উত্তৰ লখিমপুৰস্থিত আগশাৰীৰ অসমীয়া দৈনিক কাকত ‘অসমীয়া প্ৰতিদিন’ৰ কাৰ্যালয়ত অচিনাক্ত দুৰ্বৃত্তই এক আক্ৰমণ সংঘটিত কৰে। কাৰ্যালয়টোলৈ লক্ষ্য কৰি কৰা শিলাবৃষ্টিৰ ফলত বিস্তৰ সা-সম্পত্তিৰ ক্ষয়-ক্ষতি হয় যদিও কোনো লোক হতাহত হোৱাৰ খবৰ পোৱা হোৱা নাই। গণতন্ত্ৰৰ চতুৰ্থ স্তম্ভৰ ওপৰত নিশাৰ অন্ধকাৰত হোৱা এই আক্ৰমণৰ ঘটনাই সমগ্ৰ অঞ্চলটোতে তীব্ৰ চাঞ্চল্যৰ সৃষ্টি কৰিছে।
প্ৰাপ্ত তথ্য অনুসৰি, দুৰ্বৃত্তৰ দলটোৱে কাকতখনৰ উত্তৰ লখিমপুৰৰ কাৰ্যালয়টোত অতৰ্কিতে আক্ৰমণ চলাই চৌহদত নিৰন্তৰ শিলগুটি নিক্ষেপ কৰে। ইয়াৰ ফলত অট্টালিকাটোৰ একাংশ ধ্বংসপ্ৰাপ্ত হোৱাৰ লগতে ভিতৰৰ সা-সঁজুলিৰ বিস্তৰ ক্ষতিসাধন হয়। অৱশ্যে, এই আক্ৰমণৰ সময়ত কাৰ্যালয়ত উপস্থিত থকা কৰ্মচাৰীসকল সুৰক্ষিত অৱস্থাত আছে বুলি জানিব পৰা গৈছে। কাকতখনৰ কৰ্তৃপক্ষৰ মতে, তেওঁলোকৰ নিৰপেক্ষ আৰু আপোচবিহীন সম্পাদকীয় নীতিয়ে একাংশ লোকৰ মাজত অসন্তুষ্টিৰ সৃষ্টি কৰাৰ পৰিণতিস্বৰূপেই এই আক্ৰমণ সংঘটিত হোৱা বুলি সন্দেহ কৰা হৈছে যদিও আক্ৰমণৰ প্ৰকৃত কাৰণ সন্দৰ্ভত এতিয়াও আনুষ্ঠানিকভাৱে কোনো তথ্য স্পষ্ট হোৱা নাই।
উল্লেখযোগ্য যে, শেহতীয়াকৈ কাকতখনক লক্ষ্য কৰি সংঘটিত হোৱা এয়া প্ৰথমটো ঘটনা নহয়। যোৱা ২৫ মাৰ্চত শিৱসাগৰ জিলাতো দুৰ্বৃত্তই ‘অসমীয়া প্ৰতিদিন’ৰ বিতৰণৰ বাবে নিয়া এখন বাহন আৱদ্ধ কৰি কাকতসমূহ কাঢ়ি নি পথৰ মাজতে জ্বলাই দিছিল। এনেদৰে এটাৰ পাছত এটাকৈ সংবাদ প্ৰতিষ্ঠানৰ ওপৰত হোৱা আক্ৰমণৰ ঘটনাই সমগ্ৰ ৰাজ্যখনতে সংবাদ মাধ্যমৰ নিৰাপত্তা আৰু প্ৰেছৰ স্বাধীনতাক লৈ সচেতন মহলৰ মাজত তীব্ৰ উদ্বেগ প্ৰকাশ পাইছে। উত্তৰ লখিমপুৰৰ এই শেহতীয়া ঘটনাটোক বিভিন্ন দল-সংগঠন তথা ৰাইজে কঠোৰ ভাষাৰে গৰিহণা দিছে।
ইতিমধ্যে ‘অসমীয়া প্ৰতিদিন’ৰ লখিমপুৰ সংস্কৰণৰ কৰ্তৃপক্ষই সমগ্ৰ ঘটনা সন্দৰ্ভত খেলমাটি আৰক্ষী চকীত এখন এজাহাৰ দাখিল কৰিছে।
