দেশৰ এগৰাকী মহিলা চলচ্চিত্ৰ পৰিচালিকাৰ বিৰুদ্ধে এইবাৰ চৰকাৰে ৰুজু কৰিলে দেশদ্ৰোহিতাৰ গোচৰ।
লাক্ষাদ্বীপৰ প্ৰথমগৰাকী মহিলা চলচ্চিত্ৰ পৰিচালিকা আয়েছা চুলতানাৰ বিৰুদ্ধে ৰুজু কৰা হৈছে দেশদ্ৰোহিতাৰ গোচৰ।কিন্তু কি দোষ কৰিছিল মহিলা চলচ্চিত্ৰ পৰিচালিকাগৰাকীয়ে?
কিছুদিন পূৰ্বে মালায়ালম টিভি চেনেল মিডিয়া ৱান টিভিৰ এক আলোচনাত ভাগ লৈছিল চলচ্চিত্ৰ পৰিচালিকাগৰাকীয়ে। অনুষ্ঠানত আয়েছা চুলতানাই কৈছিল যে লাক্ষাদ্বীপত ক’ৰ’না ভাইৰাছ চৰকাৰে ইচ্ছাকৃত ভাবে বিয়পাই দিছে।বিজেপি চৰকাৰে লাক্ষাদ্বীপত ক’ৰ’না ভাইৰাছক জৈৱিক অস্ত্ৰ হিচাবে ব্যৱহাৰ কৰিছে বুলিও আয়েছাই কৈছিল।
তেওঁ কৈছিল—’বিজেপি নেতাসকলে কৈ আহিছে কেন্দ্ৰই লাক্ষাদ্বীপৰ প্ৰতি গুৰুত্ব দিছে।কিন্তু এয়াই নেকি গুৰুত্বৰ নমুনা?য’ত ক’ৰ’না সংক্ৰমিতৰ সংখ্যা শূন্য আছিল তাত এতিয়া দৈনিক ক’ৰ’নাত আক্ৰান্তৰ সংখ্যা এশ হৈছে।ক’ৰ’নাক তেওঁলোকে জৈৱিক অস্ত্ৰ হিচাবে ব্যৱহাৰ কৰিছে।ক’ৰ’না শূন্য এটা স্থানত তেওঁলোকে জৈৱিক অস্ত্ৰ প্ৰয়োগ কৰাটো সম্পূৰ্ণ সঁচা কথা’।
চীনে যিদৰে ক’ৰ’না ভাইৰাছক জৈৱিক অস্ত্ৰ হিচাবে ব্যৱহাৰ কৰি সমগ্ৰ বিশ্বতে বিয়পাই দিছে, তেনেদৰে লাক্ষাদ্বীপতো এই ভাইৰাছ চৰকাৰে বিয়পাই দিছে বুলি আয়েছাই কৈছিল।
উক্ত অনুষ্ঠানটোত উপস্থিত আছিল বিজেপি নেতা বিজি বিষ্ণু। তেওঁ আয়েছাৰ মন্তব্যৰ তীব্ৰ বিৰোধিতা কৰিছিল।
লাক্ষাদ্বীপ বিজেপিৰ সভাপতি আব্দুল কাদেৰেও আয়েছাৰ মন্তব্যৰ বিৰোধিতা কৰিছিল। ইমানৰ পিছতো নিজৰ মন্তব্য প্ৰত্যাহাৰ কৰিবলৈ অস্বীকাৰ কৰা আয়েছাৰ বিৰুদ্ধে বিজেপিয়ে কাবাৰাট্টি থানাত এজাহাৰ দাখিল কৰে।
উক্ত এজাহাৰৰ ভিত্তিতে আৰক্ষীয়ে আয়েছাৰ বিৰুদ্ধে ভাৰতীয় দণ্ডবিধিৰ ১২৪ ক ধাৰাত দেশদ্ৰোহিতাৰ গোচৰ ৰুজু কৰি আয়েছাক আটক কৰিছে।আয়েছাৰ বিৰুদ্ধে ১৫৩ খ ধাৰাতো গোচৰ ৰুজু হৈছে।
উল্লেখ্য লাক্ষাদ্বীপত বিজেপিয়ে প্ৰফুল্ল পেটেলক নতুন প্ৰশাসক হিচাবে দায়িত্ব অৰ্পন কৰাৰ পিছতে তাত ক’ৰ’নাৰ প্ৰকোপ বৃদ্ধি পোৱা বুলি অভিযোগ উঠিছে।
