স্বনামধন্য জ্ঞানদাভিৰাম বৰুৱাই বেৰিষ্টাৰী পঢ়িবলৈ গৈ লাভ কৰা অভিজ্ঞতাৰ ভিত্তিত কৈছিল- অসম পুলিচো লণ্ডনৰ আৰক্ষীৰ দৰেই অত্যন্ত ভদ্ৰ ; নম্ৰ ; শিষ্ট ; বিনয়ী ; দায়িত্বসম্পন্ন আৰু সৰ্বসাধাৰনৰ হিতৰ বাবে উৎসৰ্গিত হওক । কিন্ত সেই আশা দুৰাশাত পৰিনত । বহু কষ্ট আৰু ত্যাগৰ বিনিময়ত অসম আৰক্ষীৰ যিকন অৱশিষ্ট ভাবমূৰ্তি আছিল সেয়াও লোপ পালে মুখ্যমন্ত্ৰী হিমন্ত বিশ্ব শৰ্মাৰ দিনত । ডিজিপি জি-পি-সিঙৰ শেহতীয়া টুইটটোৰ পৰাই এটা কথা স্পষ্ট হৈ পৰিছে যে আৰক্ষী লোকৰ বাবে মন্দিৰস্বৰূপ আৰু নাগৰিকৰ বাবে নিৰাপত্তাৰ আলয় হব লগা থানাবোৰেই এতিয়া চয়তানৰ ৰূপ লৈছে । ঘগ্ৰাপাৰ থানাৰ ইন্সপেক্টৰজনৰ কৰ্ম-কাণ্ডই সমগ্ৰ আৰক্ষী বাহিনীটোৰে নাক-কান কাটিলে । আৰক্ষীৰ গৌৰৱোজ্বল ভাবমূৰ্তি অটুত ৰখাৰ বাবে তেওঁ সকলোপ্ৰকাৰে চেষ্ঠা কৰিব আৰু থানাসমূহ শিশু-মহিলা তথা নাগৰিকৰ বাবে নিৰাপদ আশ্ৰয় স্থল হোৱাতো নিশ্চিত কৰিব বুলি একপ্ৰকাৰ ক্ষমা ভিক্ষা মাগিব লগা হৈছে । ইয়াৰ আগতে কোনো ডিজিপিয়ে এনে অনাহুত পৰিস্থিতি আৰু অসহায় অৱস্থাৰ সন্মুখীন হোৱাৰ নজীৰ আছেনে ! এশবাৰ কম- অসম আৰক্ষীৰ এই দুখ লগা পৰিনতিৰ বাবে মুখ্যমন্ত্ৰী হিমন্ত বিশ্ব শৰ্মাই জগৰীয়া । আৰক্ষী বাহিনীটোক আইনৰ অধীনত পৰিচালিত হবলৈ সুবিধা নিদি ৰাজনৈতিক হস্তক্ষেপৰ জৰিয়তে নচুৱাবলৈ যোৱাৰ ফল এয়া । আৰক্ষীৰ নতুন পেৰ্টানৰ নামত ভুৱা এনকাউণ্টাৰ ; বুলডেজাৰ অভিযানৰ কথা নকওঁৱেই ; জামিন পোৱা অভিযুক্তৰ বিৰুদ্ধে নতুনকৈ গোচৰ পঞ্জীয়ন ; নতুন ধাৰা লগাই গ্ৰেপ্তাৰ ; কাৰাবন্দীক মোকলাই দিয়াৰ দৰে নিৰ্দেশো তেওঁ দিবলৈ ললে ৰজাৰ দৰে । আৰক্ষীৰ ওপৰত ৰাজনৈতিক হস্তক্ষেপ আৰু পুলিচৰাজৰ বিষম পৰিনামৰ কথা বৰপেটাৰ ন্যায়াধীশগৰাকীয়ে জিগনেশ মেৱানীৰ গোচৰৰ ক্ষেত্ৰতে কঠোৰভাবে সকীয়াই দিয়া নাছিলনে ! আৰক্ষী বাহিনীক নাকী লগাবলৈ তেওঁ তেতিয়াই দিহা-পৰামৰ্শ দিয়া নাছিলনে ! শেহতীয়াকৈ ৰোহিনী সিঙৰ টুইটেও অসম আৰক্ষীৰ ভাবমূৰ্তি কি সেয়া প্ৰমান কৰা নাছিলনে ! এগৰাকী আৰক্ষী বিষয়াৰ পত্নী অঞ্জু বৰাই কংগ্ৰেছ চৰকাৰৰ আমোলত আৰক্ষী আৰু জনসাধাৰনৰ মাজত সম্পৰ্ক কেনে হব লাগে তাৰ ওপৰত বিশদ আলোচনাসম্বলিত তলৰ কিতাপখন প্ৰকাশ কৰিছিল ; যত জ্ঞানানন্দ শৰ্মা পাঠক ; হৰেকৃষ্ণ ডেকা ; বিনয়ৰঞ্জন দাস ; আব্দুল কুদ্দুছ ; অমৰেন্দ্ৰ বৰগোহাঁই ; সুৰেন্দ্ৰ কুমাৰৰ দৰে আৰক্ষী বিষয়াই আৰক্ষী বাহিনী আৰু জনসাধাৰনৰ মাজত সম্পৰ্ক কেনে হোৱা উচিত তাৰ ওপৰত টোকা লিখি থৈছে । আইনৰ কিতাপ পিচে-পৰেও পঢ়িব ; পোনতে আৰক্ষী লোকসকলে এই কিতাপখনকে পঢ়ক । তেতিয়াও আৰক্ষী বাহিনীৰ লোকসকলৰ কিছু জ্ঞান হব আৰু হ্নত মান-মৰ্যদা ঘূৰি আহিব । ক্ষমতা আছে বাবেই নিজকে সৰ্বজান্তা জাহিৰ কৰাৰ সলনি গৃহ মন্ত্ৰী আৰু ডিজিপিয়েও কিতাপখন পঢ়া ভাল ।
