অসুস্থ লালু প্ৰসাদ যাদৱ: এয়াৰ এম্বুলেঞ্চেৰে দিল্লী এইমছলৈ স্থানান্তৰৰ সম্ভাৱনা
বিহাৰৰ প্ৰাক্তন মুখ্যমন্ত্ৰী তথা ৰাষ্ট্ৰীয় জনতা দলৰ (আৰজেডি) মুৰব্বী লালু প্ৰসাদৰ স্বাস্থ্যৰ অৱনতি ঘটিছে।
শৰীৰত ক্ৰিয়েটিনিন স্তৰ বৃদ্ধি হোৱাৰ পিছত লালু প্ৰসাদ যাদৱ শাৰিৰীকভাৱে যথেষ্ট অসুস্থ হৈ পৰে।
অসুস্থ লালু প্ৰসাদ যাদৱক এয়াৰ এম্বুলেঞ্চেৰে দিল্লী এইমছলৈ স্থানান্তৰিত কৰাৰ সম্ভাৱনা আছে।
বৰ্তমান লালু প্ৰসাদ যাদৱ ৰাজেন্দ্ৰ চিকিৎসা বিজ্ঞান প্ৰতিষ্ঠান (RIMS) ত চিকিৎসাধীন হৈ আছে। লালুৰ স্বাস্থ্যৰ অৱস্থাৰ প্ৰতি লক্ষ্য ৰাখি তেওঁক এইমছলৈ প্ৰেৰণ কৰাৰ বিষয়ে RIMS ত এখন বৈঠক অনুষ্ঠিত হয়।
বৈঠকৰ পিছতে চিকিৎসালয় কৰ্তৃপক্ষই লালুক এইমছ দিল্লীলৈ প্ৰেৰণ কৰিবলৈ এখন আবেদন দাখিল কৰিছে।
উল্লেখ্য যে ২১ ফেব্ৰুৱাৰীত বিহাৰৰ প্ৰাক্তন মুখ্য মন্ত্ৰী লালু প্ৰসাদ যাদৱক পুনৰ পাঁচ বছৰৰ কাৰাদণ্ডৰে দণ্ডিত কৰা হৈছিল।
লালুৰ বিৰুদ্ধে উত্থাপিত পশুখাদ্য কেলেংকাৰীৰ পঞ্চমটো গোচৰত তেওঁক দোষী সাব্যস্ত কৰা হৈছিল।
১৯৯৫-৯৬ চনত বিহাৰৰ দোৰান্দা কোষাগাৰৰ পৰা ১৩৯.৩৫ কোটি টকা বেআইনী ভাৱে সৰকোৱাৰ গোচৰত লালু প্ৰসাদ যাদৱক আদালতে দোষী সাব্যস্ত কৰিছিল।