বৰপেটাত ৫০৩ জনৰ মাজত মাটিৰ পট্টা বিতৰণ
সমগ্ৰ ৰাজ্যৰ লগতে আজি বৰপেটা জিলাতো ভূমিহীন খিলঞ্জীয়া লোকৰ মাজত আনুষ্ঠানিকভাৱে মাটিৰ পট্টা বিতৰণ কৰা হয়।
আজি শিৱসাগৰ জিলাৰ জেৰাইমুখত আয়োজিত প্ৰধানমন্ত্ৰী নৰেন্দ্ৰ মোদীৰ দ্বাৰা পট্টা বিতৰণ কৰাৰ সমান্তৰাল ভাৱে বৰপেটা জিলা পুথিভঁৰাল প্ৰেক্ষাগৃহত আয়োজিত এটি গাম্ভীৰ্যপূৰ্ণ অনুষ্ঠানত বৰপেটা বিধানসভা সমষ্টিৰ বিধায়ক গুণীন্দ্ৰ নাথ দাসে আনুষ্ঠানিকভাৱে পট্টা বিতৰণ কাৰ্যসূচী মুকলি কৰে।
এই উপলক্ষে দিয়া ভাষণত তেওঁ এনে পদক্ষেপৰ বাবে মুখ্যমন্ত্ৰী সৰ্বানন্দ সোণোৱালৰ ভূয়সী প্ৰশংসা কৰে। তেওঁ কয় যে দল-মত নিৰ্বিশেষে সকলোৱে এই চৰকাৰখনৰ এনে উন্নয়নমুখী পদক্ষেপৰ প্ৰশংসা কৰিবই লাগিব।
ইয়াৰ আগতে সভাৰ আৰম্ভণীতে জিলা উপায়ুক্ত মুনীন্দ্ৰ শৰ্মাই আদৰণী ভাষণ দি কয় যে এইবাৰ বৰপেটা জিলাৰ ৫০৩ জনক আজি পট্টা বিতৰণ কৰা হব।
ইয়াকে লৈ যোৱা বছৰৰ পৰা এতিয়ালৈকে ১৭৫১ জনক পট্টা প্ৰদান কৰা হল। পৰবৰ্তী পৰ্যায়ত আৰু অধিক লোকক ভূমি পট্টা দিয়াৰ প্ৰচেষ্টা অব্যাহত থাকিব বুলি তেওঁ উল্লেখ কৰে। ইয়াৰ উপৰিও অভাৱগ্ৰস্ত ৰাইজক সকাহ দিয়াৰ বাবে হাতত লোৱা অৰুণোদয় আৰু ৰি-স্বয়ম আঁচনিৰ অগ্ৰগতিৰ বিষয়েও তেওঁ উল্লেখ কৰে।
জিলা তথ্য আৰু জনসংযোগ বিষয়া বিকাশ শৰ্মাই আতঁধৰা সভাখনৰ আৰম্ভণীতে ডাঙৰ পৰ্দাত জেৰাইমুখত প্ৰধান মন্ত্ৰীয়ে দিয়া ভাষণৰ পোনপটীয়া সম্প্ৰচাৰ প্ৰদৰ্শন কৰা হয়। সভাত শলাগৰ শৰাই আগবঢ়াই অতিৰিক্ত উপায়ুক্ত নৱজিৎ পাঠকে।