ঐতিহ্যমণ্ডিত শিৱসাগৰৰ জেৰেঙা পথাৰত প্ৰধান মন্ত্ৰী নৰেন্দ্ৰ মোদীয়ে ৰাজ্যবাসীক উদ্দেশ্যি দিয়া ভাষণৰ পৰা আঁতৰিল বহুকেইটা প্ৰসংগ।
যিকেইটা প্ৰসংগই ২০১৪ চনৰ পৰা আৰম্ভ কৰি ২০২০ ৰ ভিতৰৰ সময়ছোৱাত অসমৰ প্ৰত্যেকখন ৰাজনৈতিক-চৰকাৰী সভাত বৰকৈ স্থান লাভ কৰিছিল।
কিন্তু হঠাৎ শিৱসাগৰত আহি মোদীৰ মুখৰ পৰা উধাও হ’ল সেইকেইটা প্ৰসংগ। যি প্ৰসংগ লৈ ২০১৪ চনত অসমত বিজেপিৰ সমৰ্থন আদায় কৰি সাতোগৰাকী সাংসদ জয়ী কৰাই নিছিল।
ঠিক সেইদৰে ২০১৬ চনতো সেইকেইটা প্ৰতিশ্ৰুতিৰে পৰিৱৰ্তনৰ মিছা স্বপ্ন দেখি সৰ্বানন্দ সোণোৱালক শাসনৰ গাদীত বহুৱালে অসমৰ ৰাইজে।
২০১৯ ৰ লোকসভা নিৰ্বাচনৰ পূৰ্বেও সেই স্বপ্ন পুনৰ দেখুৱাই পুনৰ শাসনলৈ আহিলে সেই প্ৰতিশ্ৰুতি পূৰণ কৰাৰ আশ্বাস অসমৰ ৰাইজে শুনিলে।
তথাপিও সেই প্ৰতিশ্ৰুতি কেৱল মুখৰ কথাতেই সীমাৱদ্ধ হৈ থাকিল, কাৰ্য্যতঃ পৰিণত হ’ল ফুটুকাৰ ফেনত।
অসম চুক্তিৰ প্ৰতিটো দফাৰ সফল ৰূপায়ণ, ৬ নং দফা শীঘ্ৰে কাৰ্য্যকৰীকৰণ, NRC, ৬ জনগোষ্ঠীক জনজাতিকৰণ, বান গৰাখহনীয়া সমস্যাৰ সমাধান, মাজুলীৰ দলং নিৰ্মাণ ইত্যাদি কেতবোৰ আছিল মূল প্ৰতিশ্ৰুতি।
কিন্তু সেয়া যেন এতিয়া অতীত হ’ল। অসম চুক্তিৰ প্ৰতিটো দফা সফল ৰূপায়ণৰ ফলাফল দিলে ‘কা’ আইন বলবৎ কৰি তথা পাঁচ নং দফা ভংগ কৰিলে বিজেপিয়ে।
‘কা’ৰ বিৰুদ্ধে ৰাইজৰ বিক্ষোভ উপশম ঘটাবলৈ অন্য এক টোপ আনিলে বিজেপিয়ে। সেয়া হ’ল ৬ নং দফাৰ সফল ৰূপত কাৰ্য্যকৰী কৰিব বিজেপিয়ে। কিন্তু সংসদত এজন কেন্দ্ৰীয় মন্ত্ৰীৰ ভাষণত ওলাই পৰিল যে দিল্লীলৈ অসম চৰকাৰৰ তৰফৰ পৰা কোনোধৰণৰ প্ৰস্তাৱ দিয়া নাই। অৰ্থ্যাৎ দিচপুৰৰ আলমিৰাতে আৱদ্ধ হৈ থাকিল ৬ দফা কাৰ্য্যকৰীকৰণৰ পৰামৰ্শদাতা কমিটিয়ে দিয়া প্ৰতিবেদন।
ঠিক সেইদৰে মন্ত্ৰী হিমন্ত বিশ্ব শৰ্মাৰ অধ্যক্ষতাত ২০১৯ ৰ লোকসভা নিৰ্বাচনৰ পূৰ্বে ৬ জনগোষ্ঠীক জনজাতিকৰণৰ বাবে এখন কমিটি গঠন কৰি দিছিল।
সেই কমিটিয়ে কেনেধৰণৰ প্ৰতিবেদন কেন্দ্ৰীয় চৰকাৰৰ হাতত অৰ্পন কৰিলে সেয়া আজি পৰ্য্যন্ত ৰাজহুৱা নহ’ল। বৰঞ্চ কোচৰাজবংশী, মৰাণ আৰু মটকক স্বায়ত্ত শাসিত পৰিষদৰ মৰ্য্যদা প্ৰদান কৰাতেই মূল জনজাতিকৰণৰ প্ৰসংগ ফালৰি কাটি চৰকাৰৰ টোপ গিলিলে একাংশই।
এই ক্ষেত্ৰত কেৱল তিনিটা জনগোষ্ঠীক স্বায়ত্ত শাসিত পৰিষদৰ অন্তৰ্গত কৰাত অন্য তিনিটা জনগোষ্ঠী ক্ৰমে আহোম, চুতীয়া আৰু চাহ জনগোষ্ঠীৰ ক্ষেত্ৰত বৈষম্যমূলক আচৰণ কৰাৰো অভিযোগ উঠিছে।
মুঠৰ ওপৰত জনজাতিকৰণৰ প্ৰসংগও সেইবাবেই যেন ভাষণৰ পৰা আতঁৰাই ৰাখিলে প্ৰধান মন্ত্ৰীয়ে।
ঠিক সেইদৰে, NRC ৰ দ্বাৰা বিদেশী বিতাৰণ কৰিবলৈ আজি পৰ্য্যন্ত সক্ষম নহ’ল বিজেপি চৰকাৰ। কিন্তু NRC প্ৰক্ৰিয়াৰ সম্পূৰ্ণ পুনৰীক্ষণহে দাবী কৰিলে চৰকাৰে নিজে। বিদেশী অনুপ্ৰৱেশকাৰীক চিনাক্ত কৰি বহিষ্কাৰ কৰা আৰু অসমৰ খিলঞ্জীয়াক সাংবিধানিক সুৰক্ষা প্ৰদান কৰাটো আছিল অসম চুক্তিৰ মূল ৰাষ্ট্ৰীয় প্ৰতিশ্ৰুতি।
তেনেকৈ বান-গৰাখহনীয়া সমস্যাক ৰাষ্ট্ৰীয় সমস্যা হিচাপে গণ্য কৰি ইয়াৰ স্থায়ী সমাধান কৰাটোৱো যেন বিজেপিৰ এক অন্য মিছা প্ৰতিশ্ৰুতি। সেয়েহে হয়তো সেই প্ৰসংগও অসমলৈ আহিলে ভাষণৰ পৰা এৰাই চলিছে প্ৰধান মন্ত্ৰীয়ে।
আনহাতে, এইসমূহ প্ৰসংগৰ বিপৰীতে মোদীয়ে ভাষণত আনিলে অসমৰ ভাষা-সংস্কৃতিৰ সুৰক্ষাৰ প্ৰসংগ। এন ডি এ চৰকাৰ অসমৰ ভাষা-সংস্কৃতিৰ সুৰক্ষাৰ ক্ষেত্ৰত বদ্ধ পৰিকৰ বুলি মোদীয়ে সদৰী কৰে।
তেওঁ ভাষণ প্ৰসংগতে উল্লেখ কৰি কয় ‘আত্মনিৰ্ভৰ ভাৰতৰ বাবে উত্তৰ-পূবৰ দ্ৰুত উন্নয়ন অতি প্ৰয়োজন। শিৱসাগৰক দেশৰ ৫ প্ৰত্নতাত্বিক স্থানৰ অন্তৰ্ভূক্ত কৰিবলৈ পদক্ষেপ ল’ব চৰকাৰে। অসমৰ চাহ জনগোষ্ঠীৰ লোকক অত্যাৱশ্যকীয় সুবিধাসমূহ প্ৰদান কৰা হৈছে। এক্ট-ইষ্ট প’লিচিয়ে উত্তৰ-পূবক অন্য দেশৰ সৈতে সংযুক্ত কৰি আছে।জলপথৰে উত্তৰ-পূবৰ পৰা বাংলাদেশ, ম্যানমাৰ আদিলৈ যাতায়াতৰ ব্যৱস্থা চলি আছে।‘
ঠিক সেইদৰে উন্নয়নৰ ক্ষেত্ৰত হিতাধিকাৰী কেন্দ্ৰিক কথাবতৰাবোৰহে বেছিকৈ মোদীৰ ভাষণ শোভাবৰ্দ্ধন কৰা দেখিবলৈ পোৱা গ’ল।
অসমৰ খিলঞ্জীয়াই সাংবিধানিক সুৰক্ষা কেনেকৈ পাব, কা’ বলৱৎ হ’লে অসমৰ খিলঞ্জীয়াৰ প্ৰতি আহিব পৰা ভাবুকি কেনেকৈ আঁতৰ হ’ব, বহিৰাগতই দপদপাই থকা অসমৰ ভাষা-সাহিত্য-সংস্কৃতি কেনেকৈ সুৰক্ষিত হ’ব তাৰ কোনো বাস্তৱ সন্মত পদক্ষেপৰ কথা নোলাল প্ৰধান মন্ত্ৰী মোদীৰ মুখত। আৰু ক’বনো কেনেকৈ, এটা বছৰে সেই পদক্ষেপ গ্ৰহণৰ কোনো ইচ্ছাই প্ৰকাশ নকৰিলে চৰকাৰখনে। তেনেকৈয়ে কেৱল ভাষণৰ ফুলজাৰি মাৰি অসমৰ ভাষা-সংস্কৃতিৰ সুৰক্ষাৰ কথা ক’লে নৰেন্দ্ৰ মোদীয়ে। মুঠৰ ওপৰত অসমৰ খিলঞ্জীয়াক আশ্বস্ত কৰিব লাগে। কাৰণ ’২১ৰ বিধান সভা নিৰ্বাচন সন্মুখত।
