ক’ৰ’না ভাইৰাছক কেন্দ্ৰ কৰি সমগ্ৰ দেশত ল’কডাউন চলি থকাৰ মাজতে আজি কাকপথাৰ আৰক্ষীয়ে অভিযান চলাই বৃহৎ পৰিমাণৰ ড্ৰাগছ জব্দ কৰিবলৈ সক্ষম হোৱাৰ লগতে দুজন লোকক আটক কৰে।
প্ৰাপ্ত তথ্য মতে গোপন সূত্ৰৰ তথ্যৰ ভিত্তিত কাকপথাৰ আৰক্ষী থানাৰ উপ পৰিদৰ্ষক বিকাশজ্যোতি ডেকাৰ নেতৃত্বত যোৱা এটা আৰক্ষীৰ দলে লাজুমপথাৰ গাঁৱত অভিযান চলাই প্ৰায় ১ কেজি পৰিমাণৰ ব্ৰাউন ছুগাৰ জব্দ কৰিবলৈ সক্ষম হয়।
ড্ৰাগছসহ আৰক্ষীয়ে প্ৰথমে থাপাবাৰী গাঁৱৰ ভাইজান নেওগক কৰায়ত্ত কৰে আৰু তেওঁৰ স্বীকাৰোক্তিৰ ভিত্তিত কাকপথাৰ আৰক্ষী থানাৰ অন্তৰ্গত টকৌপথাৰৰ পৰা পুতুল বৰুৱাক আটক কৰে।
উল্লেখযোগ্য যে পুতুল বৰুৱাই ড্ৰাগছখিনি আনি ভাইজান নেওগক দিছিল। আৰক্ষীয়ে যুৱক দুজনৰ বিৰুদ্ধে গোচৰ ৰজু কৰি ধৃত দুই ড্ৰাগছ সৰবৰাহকাৰীক মাৰাথান জেৰা অব্যাহত ৰাখিছে।
আৰক্ষীৰ প্ৰাথমিক তদন্তত প্ৰায় ২ লাখ টকা মূল্যৰ ড্ৰাগছখিনি তিনিচুকীয়া জিলাৰ হাপজানৰ পৰা অৰুণাচল প্ৰদেশৰ নামচাইলৈ সৰবৰাহ কৰিবলৈ চেষ্টা কৰিছিল বুলি জানিব পৰা গৈছে।
