জম্মু-কাশ্মীৰৰ শ্বোপিয়ান জিলাত আজি নিৰাপত্তাৰক্ষীৰ সৈতে হোৱা এক সংঘৰ্ষত নিহত হয় লস্কৰ-ঈ-তৈবা(LeT)ৰ এজন সন্ত্ৰাসবাদী। নিহত সন্ত্ৰাসবাদীজন উপত্যকাটোত সংঘটিত কেইবাটাও হিংসাত্মক কাণ্ডত জড়িত আছল বুলি প্ৰকাশ কৰিছে আৰক্ষীয়ে।
জিলাখনৰ চোটিগাম গাঁৱত সন্ত্ৰাসবাদীজনৰ উপস্থিতিৰ নিৰ্দিষ্ট তথ্য লাভ কৰাৰ পিছতে এই তথ্যৰ আধাৰত পুৱাৰ ভাগত নিৰাপত্তা বাহিনীয়ে তালাচী অভিযান আৰম্ভ কৰে বুলি আৰক্ষীয়ে জানিবলৈ দিয়ে।
নিৰাপত্তা বাহিনীয়ে সন্দেহযুক্ত স্থানৰ কাষ চাপি অহাৰ লগে লগে লুকাই থকা সন্ত্ৰাসবাদীজনে তেওঁলোকৰ ওপৰত নিৰ্বিচাৰ গুলীচালনা কৰে আৰু ইয়াৰ প্ৰতিশোধকল্পে অভিযানকাৰী দলটোৱেও গুলীবৰ্ষণ কৰে বুলি লগতে জানিবলৈ দিয়ে আৰক্ষীয়ে।
এই এনকাউণ্টাৰত সন্ত্ৰাসবাদীজন নিহত হয় আৰু এনকাউণ্টাৰৰ স্থানৰ পৰা তেওঁৰ মৃতদেহ উদ্ধাৰ কৰা হয় বুলিও লগতে আৰক্ষীয়ে সদৰী কৰে। নিহত সন্ত্ৰাসবাদীজনক বিলাল আহমেদ ভাট বুলি চিনাক্ত কৰা হৈছে।
তথ্য অনুসৰি, হত্যাকে ধৰি কেইবাটাও সন্ত্ৰাসবাদী অপৰাধৰ গোচৰত জড়িত আছিল ভাট। সুদছান কুলগামৰ বাসিন্দা স্থানীয় সেনা জোৱান উমেৰ ফায়াজৰ হত্যা, হাৰ্মাইনৰ দুই প্ৰব্ৰজিত শ্ৰমিকৰ হত্যাত ভাট জড়িত আছিল।
লগতে চোতিগাম শ্বোপিয়ানৰ বাসিন্দা কাশ্মীৰী পণ্ডিত সুনীল কুমাৰ ভাটৰ হত্যা, কাশ্মীৰী পণ্ডিত প্ৰিটিম্বাৰ নাথৰ আক্ৰমণ, চোটিগাম নিবাসী স্থানীয় বাল কৃষণৰ আক্ৰমণৰ ঘটনাতো তেওঁ জড়িত আছিল।
ভাটে স্থানীয় যুৱক-যুৱতীক সন্ত্ৰাসবাদী সংগঠনত যোগদান কৰিবলৈ উচটনি দিয়াৰ লগতে ১২ জন স্থানীয় যুৱকক প্ৰৰোচিত কৰি সন্ত্ৰাসবাদী সংগঠনত যোগ দিয়াইছিল বুলি আৰক্ষীৰ তথ্যত প্ৰকাশ।
এনকাউণ্টাৰৰ স্থানৰ পৰা এ কে ছিৰিজৰ ৰাইফলকে ধৰি আন বহু অস্ত্ৰ-শস্ত্ৰ, গোলাবাৰুদ আৰু তিনিটা মেগজিন উদ্ধাৰ কৰা হৈছে বুলি এগৰাকী আৰক্ষী বিষয়াই সদৰী কৰে।
