ভাৰতৰ উচ্চতম ন্যায়ালয়ত সোমবাৰে সংঘটিত হয় এক চাঞ্চল্যকৰ ঘটনা। আদালতৰ শুনানিৰ মাজতেই এজন অধিবক্তাই মুখ্য ন্যায়াধীশ (CJI) বি আৰ গাভাইৰ ওপৰত জোতা নিক্ষেপ কৰাৰ চেষ্টা কৰিছিল বুলি অভিযোগ উঠিছে। এই ঘটনাৰ ফলত আদালতৰ স্বাভাৱিক কাৰ্য্যবিধি কেই মিনিটৰ বাবে ব্যাহত হৈ পৰে।
সূত্ৰ অনুসৰি, ৰাকেশ কিশোৰ নামৰ অধিবক্তাজনে ন্যায়ালয়ত এটা বিষয় উত্থাপন কৰি থাকোঁতেই হঠাতে আগবাঢ়ি আহি জোতা নিক্ষেপ কৰিবলৈ চেষ্টা কৰে। অৱশ্যে নিৰাপত্তাৰক্ষীয়ে তৎক্ষণাত পৰিস্থিতি চম্ভালি লয় আৰু অধিবক্তাজনক আদালতৰ পৰা বাহিৰলৈ লৈ যায়। বাহিৰলৈ লৈ যোৱাৰ সময়ত তেওঁ চিঞৰি কৈছিল, “সনাতন ধৰ্মৰ অপমান আমি সহ্য নকৰো!”
মুখ্য ন্যায়াধীশ গাভাইয়ে ঘটনাৰ পিছতো আদালতৰ নিয়ম-শৃংখলা বজাই ৰাখি তেওঁ আন অধিবক্তাসকলক উদ্দেশ্য কৰি কয়, “বিচলিত নহ’ব। এইবোৰে মোৰ ওপৰত কোনো প্ৰভাৱ পেলোৱা নাই।”
উল্লেখযোগ্য যে, ৰাকেশ কিশোৰে পূৰ্বে খাজুৰাহোৰ জৱৰী মন্দিৰত থকা সাত ফুট ওখ ভগৱান বিষ্ণুৰ মূৰ কাটি লোৱা প্ৰতিমূৰ্তি পুনৰুদ্ধাৰৰ দাবীত আদালতত আবেদন দাখিল কৰিছিল। ছেপ্টেম্বৰ মাহত মুখ্য ন্যায়াধীশ গাভাই আৰু ন্যায়াধীশ কে. বিনোদ চন্দ্ৰনে সেই আবেদন খাৰিজ কৰি কয় যে এই বিষয়টো ভাৰতীয় প্ৰত্নতাত্ত্বিক জৰীপ (ASI)-ৰ অধিকাৰভুক্ত, আদালতৰ নহয়।
তেতিয়াৰ শুনানিৰ সময়ত মুখ্য ন্যায়াধীশে অধিবক্তাজনক কৈছিল, “যাওক আৰু ভগৱানক কিবা কৰিবলৈ কওক। আপুনি যেহেতু বিষ্ণুৰ পৰম ভক্ত, তেন্তে প্ৰাৰ্থনা কৰক।”
এই মন্তব্যক লৈ সামাজিক মাধ্যমত ব্যাপক সমালোচনা হয় আৰু বিভ্ৰান্তিকৰ তথ্যও প্ৰচাৰিত হয়।পিছত ১৮ ছেপ্টেম্বৰত মুখ্য ন্যায়াধীশ গাভাইয়ে স্পষ্টকৈ কয়, তেওঁ সকলো ধৰ্মক সন্মান কৰে আৰু কোনো ধৰ্মক অপমান কৰাৰ প্ৰশ্নই নুঠে। ছলিচিটৰ জেনেৰেল তুষাৰ মেহতাই সামাজিক মাধ্যমত ভুল তথ্যৰ প্ৰচাৰৰ বিপদৰ কথা উল্লেখ কৰি কয়, “প্ৰতিটো কাৰ্য্যই এতিয়া ছ’চিয়েল মিডিয়াত বিকৃত ৰূপে ওলাইছে।”
