মুখ্যমন্ত্ৰী সৰ্বানন্দ সোণোৱালৰ বিৰুদ্ধে প্ৰতিবন্ধী সুৰক্ষা সংস্থা অসমে আনিছে প্ৰতাৰণা কৰাৰ অভিযোগ।
দেওবাৰে গুৱাহাটী প্ৰেছ ক্লাৱত এক সংবাদমেল সম্বোধন কৰি প্ৰতিবন্ধী সুৰক্ষা সংস্থা অসমৰ সাধাৰণ সম্পাদক নৃপেন মালাকাৰে মুখ্য মন্ত্ৰী সৰ্বানন্দ সোণোৱালক মিছলীয়া আখ্যা দিয়াৰ লগতে শাসনলৈ অহাৰে পৰা প্ৰতিশ্ৰুতি ভংগ কৰি অহা বুলি গুৰুতৰ অভিযোগ তোলে।
‘মুখ্যমন্ত্ৰী সৰ্বানন্দ সোণোৱাৰ সৰ্বকালৰ সৰ্বশ্ৰেষ্ঠ মিছলীয়া মুখ্য মন্ত্ৰী। তেওঁ শাসনলৈ অহাৰ পাছৰে পৰা প্ৰতিবন্ধীসকলক দি অহা প্ৰতিশ্ৰুতি ভংগ কৰি আহিছে।’ মালাকাৰে সংবাদমেলত কয়।
সংবাদমেলত সোণোৱালে দিয়া প্ৰথমটো প্ৰতিশ্ৰুতি উনুকিয়াই দি মালাকাৰে কয় ‘প্ৰতিবন্ধীসকলে ধাৰাবাহিকভাৱে কৰি অহা আন্দোলনৰ পৰিপ্ৰেক্ষিতত ২০১৮ চনৰ ২১ ডিচেম্বৰত মুখ্য মন্ত্ৰীগৰাকীয়ে অতি শীঘ্ৰে গুৱাহাটীত প্ৰতিবন্ধীসকলৰ বাবে এটা আশ্ৰয়গৃহ নিৰ্মাণৰ প্ৰতিশ্ৰুতি দিছিল যদিও কোনো ধৰণৰ কাৰ্য্যকৰী ব্যৱস্থা গ্ৰহণ নকৰিলে। পুনৰ ২০১৯ চনৰ ৭ ডিচেম্বৰত সংস্থাৰ লগত হোৱা এক আলোচনাত মুখ্য মন্ত্ৰীগৰাকীয়ে এবিঘা ভূমি আবন্টনৰ জৰিয়তে পাঞ্জাবাৰীৰ কলাক্ষেত্ৰৰ ওচৰত জিৰণি গৃহ নিৰ্মাণৰ ব্যৱস্থা গ্ৰহণ কৰিব বুলি লিখিত প্ৰতিশ্ৰুতি দিছিল।’
ইয়াৰোপৰি গৃহ নিৰ্মাণৰ ক্ষেত্ৰত ৰাজ্য চৰকাৰৰ সমাজ কল্যাণ বিভাগৰ সচিবৰ লগতে কামৰূপ মহানগৰ জিলা উপায়ুক্ত আৰু দিচপুৰ ৰাজহ চক্ৰ বিষয়াক উদ্যোগ ল’বলৈ নিৰ্দেশ দিছিল বুলি মালাকাৰে সংবাদমেলত জনায়।
‘এই প্ৰতিশ্ৰুতি দিয়াৰ পাছতো বৰ্তমানলৈকে কাৰ্যকৰী কৰা বাদেই, চৰকাৰী বিষয়া অথবা প্ৰশাসনিক বিষয়াক উদ্যোগ ল’বলৈ নিদি এক বেচৰকাৰী সংস্থাকহে জিৰণি ঘৰৰ কাম আৰম্ভ কৰিবলৈ নিৰ্দেশ দিছে।‘ মালাকাৰে অভিযোগ তুলি কয়।
উক্ত সংবাদমেলতে মুখ্যমন্ত্ৰীয়ে দিয়া দ্বিতীয়টো মিছা প্ৰতিশ্ৰুতি উল্লেখ কৰি মালাকাৰে কয় ‘মুখ্য মন্ত্ৰীয়ে সৰ্বানন্দ সোণোৱালে সিদিনা ৰাজ্যত ইতিমধ্যে বিভিন্ন বিভাগত ৬৬৩ টা পদত প্ৰতিবন্ধীক নিযুক্তি দিয়া বুলি কৈছে। দৰাচলতে এয়া গোকাট মিছা কথা। কিয়নো মাত্ৰ ৩৫৪ টা পদত নিযুক্তি প্ৰক্ৰিয়া আৰম্ভ কৰি ৩৫২ টা পদতহে নিযুক্তি দিয়া হৈছে।’
ইয়াৰোপৰি সোণোৱালৰ অন্য এক প্ৰতিশ্ৰুতিৰ বিষয়ে উল্লেখ কৰি মালাকাৰে কয় ‘বিশেষভাৱে সক্ষম লোকৰ বাবে ৰাজ্যত কেন্দ্ৰীয় চৰকাৰৰ সঁহাৰি পালে শীঘ্ৰে এখন বিশ্ববিদ্যালয় স্থাপনৰ কাম আৰম্ভ কৰিব বুলি মুখ্য মন্ত্ৰীয়ে ঘোষণা কৰিছিল। লগতে ২০১৮ চনৰ ৯ ফেব্ৰুৱাৰিত আমি কেন্দ্ৰীয় চৰকাৰৰ ওচৰত দাখিল কৰা এক স্মাৰক পত্ৰৰ ভিত্তিত ২০১৮ চনৰ ২০ ফেব্ৰুৱাৰিত কেন্দ্ৰীয় চৰকাৰে ৰাজ্য চৰকাৰলৈ ফাইল নং AS-89078/2017/18/Edu/66163/66164 নম্বৰৰ এক পত্ৰ প্ৰেৰণ কৰে। সেই পত্ৰৰ কোনো সুদুত্তৰ নোপোৱাত পুনৰ ২১ মাৰ্চ আৰু ২৩ এপ্ৰিলত কেন্দ্ৰীয় চৰকাৰে এখন পত্ৰ প্ৰেৰণ কৰে। কিন্তু ৰাজ্য চৰকাৰে এতিয়া কেন্দ্ৰীয় চৰকাৰলৈ বিষয়টো থেলি নিজকে ধোৱা তুলসীৰ পাত সজাব বিচাৰিছে।‘
মুখ্য মন্ত্ৰীগৰাকীৰ এই মিছা প্ৰতিশ্ৰুতি সঁচালৈ ৰূপান্তৰিত কৰিবলৈ আহ্বান জনাই মালাকাৰে লগতে কয় ‘চৰকাৰে নিজৰ প্ৰতিশ্ৰুতি পালন নকৰিলে আগন্তুক দিনত ভয়ংকৰ প্ৰতিবাদ গঢ়ি তোলা হ’ব।’
