গুৱাহাটী পৌৰনিগমত চলি অহা অনৈতিক কাৰ্য তথা দুৰ্নীতিৰ তদন্ত দাবী বিৰোধী দলপতি দেৱব্ৰত শইকীয়াৰ

অসমত কংগ্ৰেছৰ দুৰ্নীতি বিৰুদ্ধে প্ৰচাৰ চলাই শাসনলৈ অহা বিজেপি চৰকাৰখনৰ পৃষ্ঠপোষকতাত গুৱাহাটী পৌৰনিগমত চলি আহিছে বহুতো অনৈতিক কাৰ্য আৰু দুৰ্নীতি।

এই দুৰ্নীতি আৰু অনৈতিক কাৰ্যসমূহৰ বিৰুদ্ধে তদন্ত কৰিবলৈ আহ্বান জনাই অসম বিধানসভাৰ বিৰোধী দলপতি দেৱব্ৰত শইকীয়াই কয়, “বিজেপি চৰকাৰ অসমলৈ দ্বিতীয়বাৰৰ বাবে শাসনলৈ আহিছে যদিও পূৰ্বৰ হৈ থকা কেলেংকাৰী, দুৰ্নীতিৰ তদন্ত কৰি ৰাইজৰ পৰা বাঁহ বাঁহ লাভিবলৈ সক্ষম হৈছে। নিজৰ চৰকাৰখনৰ ইমেজ বঢ়াবলৈ পূৰ্বে হৈ থকা কেলেংকাৰীৰ তদন্ত কৰিবলৈ আৰম্ভ কৰিছে আৰু তাৰ উচিত শাস্তি নিৰ্ধাৰিত কৰা দেখা পোৱা গৈছে।”

কিন্তু পূৰ্বৰে পৰা চলি অহা সৰ্বানন্দ সোণোৱাল চৰকাৰৰ দিনত পৌৰনিগমত  হোৱা বৃহৎ কেলেংকাৰীৰ বিৰুদ্ধে আজিও নিমাত এইখন বিজেপি চৰকাৰ। এই বিষয়ত তদন্ত কৰি দোষীক উচিত শাস্তি প্ৰদান কৰিবলৈ মুখ্যমন্ত্ৰী হিমন্ত বিশ্ব শৰ্মালৈ আহ্বান জনাইছে দেৱব্ৰত শইকীয়াই।

আনহাতে, তেওঁ পুনৰ এই কেলেংকাৰী সন্দৰ্ভত কয়, “২৮ জানুৱাৰী ২০২১ তাৰিখে ১ বছৰৰ বাবে গুৱাহাটীৰ বিভিন্ন ঠাইৰ ৬৯ টা ন’লা, বালি গেট চাফাই কৰা আৰু চোৱাচিতা কামৰ বাবে পুঁজি আৱন্টনৰ বাবে গুৱাহাটী উন্নয়ন বিভাগৰ পৰা নিবিদা আহ্বান কৰিছিল।

এই নিবিদাত দেখা পোৱা গৈছিল যে ২০১৮ চনৰ পৰা ২০২০ চনলৈ দুছৰত প্ৰায় ২৫ কোটি টকা আৱন্টন হৈছিল। কিন্তু তাৰ বিপৰীতে ২০২১ চনৰ বাবে ৩৭ কোটি টকা লাভ কৰিছে। এই ক্ষেত্ৰত গুৱাহাটী পৌৰনিগমে দিছপুৰৰ আশীৰ্বাদপুষ্ট হৈ এক বৃহৎ কেলেংকাৰীত লিপ্ত হোৱা দেখা পোৱা গৈছে।”