ভাৰতীয় ফুটবল দলৰ প্ৰাক্তন অধিনায়ক চুনি গোস্বামীৰ আজি কলকাতাত মৃত্যু হয়। দীৰ্ঘদিন ধৰি অসুস্থ হৈ থকা মহান ফুটবলাৰ গৰাকীৰ মৃত্যুৰ সময়ত বয়স হৈছিল ৮২ বছৰ।
১৯৬২ চনৰ এছিয়ান গেইমছৰ স্বৰ্ণ পদক বিজয়ী ভাৰতীয় দলৰ নেতৃত্ব বহন কৰিছিল চুনি গোস্বামীয়ে।
এই গৰাকী মহান ফুটবলাৰৰ নেতৃত্বতে ভাৰতে ১৯৬৪ চনৰ এছিয়ান গেইমছত বিজেতা আৰু ছমাহ পিছত অনুষ্ঠিত হোৱা মেডেকা ফুটবলত বাৰ্মাৰ বিৰুদ্ধে কম ব্যৱধানত পৰাস্ত হৈছিল।
গোস্বামীয়ে কেৰিয়াৰৰ অন্তলৈকে ক্লাব ফুটবল বিখ্যাত মোহন বাগানৰ হৈয়ে খেলিছিল। ইয়াৰ উপৰি তেওঁ কলকাতা য়ুনিভাৰ্ছিটিৰ ফুটবল আৰু ক্ৰিকেট দলৰো অধিনায়ক আছিল।
আশ্বৰ্যকৰ বিষয়টো হ’ল ফুটবলাৰৰ লগতে এজন দক্ষ ক্ৰিকেটাৰো আছিল গোস্বামী। তেওঁ বেংগল দলৰ হৈ প্ৰথম শ্ৰেণী ক্ৰিকেট খেলিছিল।
ভাৰতৰ এই গৰাকী মহান ক্ৰড়ীবিদে যোৱা কেইমাহ মানৰ পৰা মধুমেহ, নাৰ্ভ আদি ৰোগৰ সমস্যাত ভুগি থকাত আজি ৰাতিপুৱা কলকাতাৰ চিটি হাস্পতালত ভৰ্তি কৰোৱা হয় যদিও আবেলি ৫ বজাত শেষ নিশ্বাস ত্যাগ কৰে।
গোস্বামীৰ আন্তঃৰাষ্ট্ৰীয় ফুটবল কেৰিয়াৰ আৰম্ভ হৈছিল ১৯৫৭ চনত। মাত্ৰ ২৭ বছৰ বয়সতে অৰ্থাৎ ১৯৬৪ চনত আন্তঃৰাষ্ট্ৰীয় ফুটবলৰ পৰা অৱসৰ গ্ৰহণ কৰিছিল গোস্বামীয়ে।
ফুটবলৰ পৰা অৱসৰ লোৱাৰ পিছতেই ক্ৰিকেটত মনোনিৱেশ কৰা গোস্বামীৰ নেতৃত্বতে বেংগলে ১৯৭১-৭২ চনৰ ৰঞ্জী ট্ৰফিৰ ফাইনেলত উপনীত হৈছিল। ফাইনেলত পৰাস্ত হৈছিল বোম্বেৰ বিৰুদ্ধে।