কিংবদন্তি মল্লযুঁজাৰু হাল্ক হোগানে ৭০ বছৰ বয়সত তৃতীয়বাৰৰ বাবে বিবাহপাশত আবদ্ধ হয়।
WWE তাৰকাগৰাকীয়ে স্কাই ডেলী নামৰ এগৰাকী ৪৫ বছৰীয়া মহিলাৰ সৈতে তৃতীয়বাৰৰ বাবে সংসাৰৰ পাতনি মেলিছে।
ছেপ্তেম্বৰ মাহৰ শেষৰ ফালে ফ্ল’ৰিডাত এটা অতি নিস্তব্ধ গীৰ্জাত অনুষ্ঠিত হৈছিল এই বিবাহ অনুষ্ঠান। কেৱল হাল্ক আৰু স্কাইৰ পৰিয়ালৰ সদস্য আৰু ঘনিষ্ঠ বন্ধুসকলকহে নিমন্ত্ৰণ কৰা হৈছিল এই বিবাহ অনুষ্ঠানলৈ। অৱশ্যে হাল্ক হোগানৰ ৩৫ বছৰীয়া কন্যা ব্ৰুক বিয়াত উপস্থিত নাছিল।
টেবলয়ড টিএমজেডে প্ৰকাশ কৰা ছবিত দেখা গৈছে যে হাল্ক হোগানে বিয়াত ক’লা টাক্সেডো আৰু মূৰত বেণ্ডানা পিন্ধিছিল। আৰু পত্নী ডেইলীয়ে পিন্ধিছিল বগা গ্লিটাৰী গাউন।
স্কাই ডেইলী পেছাত এগৰাকী যোগ প্ৰশিক্ষক আৰু একাউণ্টেণ্ট। চলিত বৰ্ষৰ জুলাই মাহত তেওঁলোকৰ এংগেজমেণ্ট হৈছিল।
ছয় কেৰেটৰ হীৰাৰ আঙঠি এটা লৈ ফ্ল’ৰিডাৰ এখন ৰেষ্টুৰেণ্টত হাল্কে স্কাইক প্ৰস্তাৱ দিছিল। সেই আঙঠিটোৰ দাম আছিল প্ৰায় ১ লাখ মাৰ্কিন ডলাৰ।
ইয়াৰ পিছত হাল্কে ডিলিট কৰা ইনষ্টাগ্ৰাম ষ্ট’ৰীত কয় যে তেওঁ বন্ধুৰ বিয়াত প্ৰেমিকা স্কাইক প্ৰেমৰ প্ৰস্তাৱ দিছিল। ইয়াৰ উত্তৰত স্কাইয়ে এই প্ৰস্তাৱ গ্ৰহণ কৰে।
প্ৰায় এবছৰ পূৰ্বে দ্বিতীয় পত্নী জেনিফাৰ মেকডেনিয়েলৰ লগত বিচ্ছেদ হৈছিল হাল্ক হোগানৰ। ইয়াৰ পিছত মল্লযুঁজাৰুগৰাকীয়ে স্কাই ডেইলীৰ লগত ডেটিং আৰম্ভ কৰে। ২০২২ চনৰ ২৬ ফেব্ৰুৱাৰীত আমেৰিকাৰ সংগীতজ্ঞ ব্ৰেট মাইকেলৰ কনচাৰ্টত এই প্ৰেমময় দম্পতীক প্ৰথমবাৰৰ বাবে একেলগে দেখা গৈছিল।
আনহাতে, হাল্কৰ দৰেই স্কাই ডেইলীৰো এয়া তৃতীয় বিবাহ। তেওঁৰ এগৰাকী কন্যা ন বছৰ আৰু দুজন ১৪ আৰু ১৬ বছৰৰ পুত্ৰ আছে।
হাল্ক হোগান মল্লযুঁজৰ জগতৰ এক সুপৰিচিত ব্যক্তি। তেওঁৰ প্ৰকৃত নাম টেৰী ব’লেয়া।
আশীৰ দশকৰ অন্যতম জনপ্ৰিয় মল্লযুঁজাৰু আছিল হাল্ক। বহুতে তেওঁক সৰ্বকালৰ অন্যতম শ্ৰেষ্ঠ মল্লযুঁজাৰু বুলি গণ্য কৰে।
