কালি দিল্লীত সংঘটিত বিস্ফোৰণৰ ঘটনাক লৈ সৰৱ হৈছে অসম নাগৰিক সন্মিলন। সন্মিলনে এই ঘটনাৰ দোষীক শাস্তি দিয়াৰ লগতে নিৰাপত্তা ব্যৱস্থাৰ সুৰুঙাৰ বিষয়েও তদন্তৰ দাবী জনাইছে। নাগৰিক সন্মিলনে এই সম্পৰ্কে এক বিবৃতি প্ৰকাশ কৰিছে। তলত উক্ত বিবৃতিটো প্ৰকাশ কৰা হ’ল –
সোমবাৰে দিল্লীৰ লালকিল্লাৰ সমীপত সংঘটিত হোৱা ভয়াৱহ বিস্ফোৰণে আমাক স্তম্ভিত কৰিছে। আহক আমি সকলোৱে একমুখে এই জঘন্য ঘটনাক গৰিহণা দিওঁ। চৰকাৰে ঘটনাৰ আঁৰৰ লোকসকলক শীঘ্ৰেই চিনাক্ত কৰক আৰু উপযুক্ত শাস্তি প্ৰদান কৰক। আমি নিহত সকলৰ পৰিয়াললৈ আমাৰ গভীৰ সমবেদনা জ্ঞাপন কৰিছোঁ। কিন্তু ইয়াৰ বাবে আমি চৰকাৰকো জবাবদিহি কৰিবই লাগিব। কিয়নো এই ঘটনাই কেন্দ্ৰীয় গৃহ মন্ত্ৰালয়ৰ অধীনস্থ দিল্লী আৰক্ষীৰ নিৰাপত্তাৰ ক্ষেত্ৰত থকা সুৰুঙা উদঙাই দিছে। এতিয়া কোনে ইয়াৰ দায়িত্ব ল’ব? যোৱা এপ্ৰিল মাহত পেহেলগামত সন্ত্ৰাসবাদীৰ আাক্ৰমণত ২৬ জন লোক নিহত হোৱাৰ পিছত এইটো এটা দ্বিতীয় বৃহৎ কূটাঘাতমূলক ঘটনা। আমি অপৰাধীৰ বিৰুদ্ধে কঠোৰ ব্যৱস্থা গ্ৰহণৰ দাবী জনাইছো। লগতে, নিৰপত্তা ব্যৱস্থাৰ বিফলতাৰ বিষয়ে নিছিদ্ৰ তদন্ত হোৱাটোও আমি বিচাৰোঁ। ভুক্তভোগীৰ ন্যায়ৰ বাবে দোষীক শাস্তি বিহা আৰু যাৰ গাফিলতিৰ বাবে ঘটনাটো ঘটিল তেওঁলোকক জগৰীয়া কৰাটোও সমানেই প্ৰয়োজনীয়। পেহেলগাম কাণ্ডৰ পিছত আকৌ এবাৰ হোৱা এনে জঘন্য সন্ত্ৰাসবাদী আক্ৰমণে দেশৰ চোৰাংচোৱা আৰু নিৰাপত্তা ব্যৱস্থাৰ প্ৰতি মানুহৰ আস্থা নোহোৱা কৰি পেলাইছে। সেয়েহে আমি সমগ্ৰ ঘটনাটোৰ এক ন্যায়িক তদন্তৰ দাবী জনাইছোঁ।
অসম নাগৰিক সন্মিলনৰ হৈ
হীৰেন গোহাঁই, হৰেকৃষ্ণ ডেকা, অজিত কুমাৰ ভূঞা, পৰেশ মালাকাৰ, আব্দুল মান্নান, শান্তনু বৰঠাকুৰ
