বিশ্বকাপ বিজয়ত ইংলেণ্ডৰ হৈ গুৰুত্বপূৰ্ণ ভূমিকা গ্ৰহণ কৰা বেগী বলাৰ লিয়াম প্লাংকেটে আমেৰিকাৰ হৈ ক্ৰিকেট খেলাৰ সপোন পুহি ৰাখিছে।
ইংলেণ্ড ক্ৰিকেট ব’ৰ্ডে প্ৰশিক্ষণৰ বাবে নিৰ্বাচন কৰা ৫৫ গৰাকী ক্ৰিকেটাৰৰ তালিকাত প্লাংকেটৰ নাম সন্নিবিষ্ট নকৰাৰ পিছতেই ক্ৰিকেটাৰ গৰাকীয়ে মনত লুকাই থকা এই কথা প্ৰকাশ কৰিছে।
৩৫ বছৰীয়া ক্ৰিকেটাৰ প্লাংকেটৰ পত্নী আমেৰিকাৰ আৰু তেওঁ যোৱা বছৰ অনুষ্ঠিত হোৱা বিশ্বকাপৰ পিছৰে পৰা ইংলেণ্ডৰ হৈ এখনো মেচত অংশ লোৱা নাই।
উল্লেখ্য যে যোৱা বছৰ আমেৰিকাই আন্তঃৰাষ্ট্ৰীয় এদিনীয়াৰ স্বীকৃতি অৰ্জন কৰিছিল।
প্লাংকেটে এটা ৰেডিঅ’ চেনেলক দিয়া সাক্ষাতত কয়, ‘তাত ক্ৰিকেটৰ সৈতে জৰিত হ’লে ভাল হ’ব। মোৰ সন্তান আমেৰিকান হ’ব পাৰিব আৰু মই ইংলেণ্ড আৰু আমেৰিকাৰ হৈ ক্ৰিকেট খেলা বুলি ক’ব পাৰিম’।
তেওঁ লগতে কয়, ‘মই এজন ইংৰাজ আৰু সদাই ইংৰাজ হৈয়ে থাকিম। কিন্তু এতিয়া মই সম্পূৰ্ণ ফিট আছো। শীৰ্ষ পৰ্যায়ত খেলাৰ সুযোগ আছে যাতে মই কিয় নলম?’।
ইংলেণ্ডৰ ক্ৰিকেটাৰ গৰাকীয়ে কয় যে যদি মই আমেৰিকাৰ নাগৰিক হও তেন্তে তাত ক্ৰিকেটৰ বিকাশৰ বাবে মই কাম কৰিম।
উল্লেখ্য যে ক’ৰ’না ভাইৰাছৰ বাবে বন্ধ হৈ থকা ক্ৰিকেট পুনৰ এবাৰ আৰম্ভ কৰাৰ প্ৰতি লক্ষ্য ৰাখি ইংলেণ্ড আৰু ৱেল্ছ ক্ৰিকেট ব’ৰ্ডে যোৱা সপ্তাহত অনুশীলনৰ বাবে ৫৫ গৰাকী ক্ৰিকেটাৰৰ নাম নিৰ্বাচিত কৰিছে য’ত লিয়াম প্লাংকেটৰ নাম অন্তৰ্ভুক্ত হোৱা নাই।
