বঙাইগাঁওস্থিত ভাৰতীয় জীৱন বীমা নিগমৰ মাণ্ডলিক কাৰ্যালয়ৰ তৰফৰ পৰা আজি প্ৰতিষ্ঠানটোৰ সামাজিক দায়বদ্ধতা আঁচনিৰ অধীনত বঙাইগাঁও অসামৰিক চিকিৎসালয়লৈ ক’ভিড যোদ্ধাসকলৰ সহায়ক হোৱাকৈ এহেজাৰ এন ৯৫ মাস্ক আৰু দুশ পিপিই কিট প্ৰদান কৰে ৷
এই উপলক্ষে বঙাইগাঁও অসামৰিক চিকিৎসালয়খনত আয়োজিত এক অনুষ্টুপীয়া অনুষ্ঠানত বঙাইগাঁও জিলাৰ উন্নয়ন আয়ুক্ত ভাস্কৰ দাসৰ হাতত জীৱন বীমা নিগমৰ মাণ্ডলিক প্ৰৱন্ধক পি এন ভূটীয়াই ক’ভিড যোদ্ধাসকলৰ বাবে আগবঢ়োৱা এই সামগ্ৰীখিনি অৰ্পণ কৰে ৷
অনুষ্ঠানত মহকুমা স্বাস্থ্য আৰু চিকিৎসা বিষয়া ডাঃ পি কে ৰয় , ৰাষ্ট্ৰীয় স্বাস্থ্য অভিযানৰ জিলা আঁচনি প্ৰৱন্ধক আনন্দ শৰ্মাৰ লগতে চিকিৎসক ,নাৰ্ছ আৰু জীৱন বীমা নিগমৰ বঙাইগাঁও মাণ্ডলিক কাৰ্যালয়ৰ ব্যণিজ্যিক প্ৰৱন্ধক এচ কে সাহা , বঙাইগাঁও শাখা কাৰ্যালয়ৰ প্ৰৱন্ধক প্ৰভাস চক্ৰৱৰ্তী আদি উপস্থিত আছিল ৷
উল্লেখ্য যে ৰাজ্যত ক’ৰোনা মহামাৰীৰ সময়ত ক’ভিড যোদ্ধা সকলৰ সহায় হোৱাকৈ ভাৰতীয় জীৱন বীমা নিগমৰ বঙাইগাঁওস্থিত মাণ্ডলিক কাৰ্যালয়ৰ তৰফৰ পৰা বঙাইগাঁও ,চিৰাং ,ধুবুৰী ,গোৱালপাৰা, বৰপেটাকে ধৰি ছয়খন জিলালৈ এইদৰে সহায় আগবঢোৱাৰ কথা মাণ্ডলিক প্ৰৱন্ধক ভূটীয়াই প্ৰকাশ কৰে ৷
ইপিনে ক’ভিড মহামাৰীৰ সময়ত এনেদৰে ক’ভিড যোদ্ধাক সহায় কৰাৰ বাবে জীৱন বীমা নিগমক ধন্যবাদ প্ৰদান কৰাৰ লগতে ভৱিষ্যতলৈও এইদৰে সহায়ৰ হাত আগবঢ়াব বুলি আশা ব্যক্ত কৰে ৷
লগতে এইদৰে সকলোৱে সহায় কৰিলে ক’ভিড মহামাৰী বিৰোধী যুঁজত জয়ী হ’ব বুলিও আশা প্ৰকাশ কৰে মহকুমা স্বাস্থ্য আৰু চিকিৎসা বিষয়া ডা: পি কে ৰয়ে৷
