চিৰাং জিলা উপায়ুক্ত কাৰ্যালয়ৰ সভাকক্ষত সোমবাৰে অনুষ্ঠিত এক অনুষ্ঠানত এল আই চি (ভাৰতীয় জীৱন বীমা নিগম)ৰ বঙাইগাঁও সংমণ্ডল আৰু কুকুৰমাৰীত থকা দ্য এণ্ট নামৰ এনজিঅটোৰ তৰফৰ পৰা চিৰাং জিলা প্ৰশাসনক জীৱন সুৰক্ষা দায়ক সামগ্ৰী প্ৰদান কৰে।
অনুষ্ঠানত এল আই চিৰ ফালৰপৰা ১৫০ টা পিপিই কীট আৰু ৭৫০ টা এন-৯৫ মাস্ক আৰু দ্য এণ্টৰ ফালৰ পৰা ১০ টা অক্সিজেন কনচেনট্ৰেটৰ জিলাখনৰ ক’ভিড যোদ্ধা সকলক প্ৰদান কৰাৰ উদ্দেশ্যে চিৰাং জিলা প্ৰশাসনৰ হাতত অৰ্পন কৰে।
জিলা প্ৰশাসনৰ হৈ সামগ্ৰী সমূহ গ্ৰহণ কৰে চিৰাং জিলাৰ উপায়ুক্ত নৰেন্দ্ৰ কুমাৰ শ্বাহ আৰু অতিৰিক্ত উপায়ুক্ত অজিত কুমাৰ শৰ্মাই। সামগ্ৰী সমূহ জিলা প্ৰশাসনৰ হাতত অৰ্পণ কৰাৰ বাবে জিলা উপায়ুক্তই নিজৰ ভাষণত ভাৰতীয় জীৱন বীমা নিগম আৰু দ্য এণ্টৰ কৰ্তৃপক্ষক ধন্যবাদ জ্ঞাপন কৰি কয় যে এই সামগ্ৰী সমূহে জিলাখনত ক’ভিড যোদ্ধাসকলক কভিড-১৯ ৰ বিৰুদ্ধে যুঁজ দিয়াত সহায় কৰিব ৷
লগতে জিলাখনত থকা বাকী এন জি অ সমূহকো ক’ভিডৰ বিৰুদ্ধে চলি থকা এই যুঁজৰ সময়ত সহায়ৰ হাত আগবঢ়াবলৈ আহ্বান জনায়। উল্লেখ্য যে জিলাখনত যোৱা ১ এপ্ৰিল পৰা এতিয়ালৈ ক’ভিডত আক্ৰান্তৰ হাৰ ৩.০২ % আৰু যোৱা দেওবাৰে ১.৪৯ % হোৱা বুলিও উল্লেখ কৰি তেওঁ জিলাখনত ক’ভিড-১৯ ৰ পৰিস্থিতি নিয়ন্ত্ৰণত আছে বুলি প্ৰকাশ কৰে।
সামগ্ৰী প্ৰদান অনুষ্ঠানত এল আই চি ৰ বঙাইগাঁও সংমণ্ডলৰ জ্যেষ্ঠ সংমণ্ডল প্ৰবন্ধক টি এন ভূটীয়া, বজাৰ প্ৰবন্ধক এছ কে শ্বাহ, শাখা প্ৰবন্ধক প্ৰবাস চক্ৰৱৰ্তী, দ্য এণ্টৰ কাৰ্যবাহী সঞ্চালিকা প্ৰণামী গাৰ্গ, চিৰাং জিলা প্ৰশাসনৰ নিৰ্বাচনী বিষয়া পাৰ্থ প্ৰতীম বৰুৱা, সহকাৰী আয়ুক্তসকল ক্ৰমে কুশল ডেকা, প্ৰতীক্ষা দত্ত, ৰাখীশ্ৰী লেখাৰু, চিৰাং জিলাৰ স্বাস্থ্য বিভাগৰ যুটীয়া সঞ্চালক ৰাতুল বৰদলৈ, জনসংযোগ বিষয়া গগণ নাৰ্জাৰী আদি উপস্থিত আছিল ৷
