অসম চৰকাৰৰ শিক্ষা বিভাগে উচ্চ মাধ্যমিক বিদ্যালয়ৰ একাংশক উচ্চতৰ মাধ্যমিক বিদ্যালয়লৈ উন্নীতকৰণৰ বাবে সিদ্ধান্ত গ্ৰহণ কৰি ইতিমধ্যে প্ৰথম পৰ্যায়ত ১১৩ খন আৰু দ্বিতীয় পৰ্যায়ত ৩৫ খন উচ্চ মাধ্যমিক বিদ্যালয়ক উচ্চতৰ মাধ্যমিকলৈ উন্নীত কৰাৰ নিৰ্দেশনা জাৰি কৰিছে ।
কিন্তু এই তালিকাত সমগ্ৰ যোৰহাট জিলাত কেৱল এখনহে বিদ্যালয় অন্তৰ্ভূক্ত হোৱাত ব্যাপক প্ৰতিক্ৰিয়াৰ সৃষ্টি হৈছে ।
জিলাখনৰ অন্তৰ্গত টীয়ক নগৰৰ মাজ মজিয়াত অৱস্থিত শতবৰ্ষ গৰকা টীয়ক উচ্চ মাধ্যমিক বিদ্যালয়। বানে গৰকা জাঁজীমুখ জনজাতি হাইস্কুল, বিস্তৃত অঞ্চলত উচ্চ শিক্ষানুষ্ঠান নথকা ঔগুৰি হাইস্কুল উচ্চতৰ মাধ্যমিক বিদ্যালয়লৈ উন্নীতকৰণ হব বুলি সকলোৱে আশা কৰিছিল ।
বিভাগীয় কাৰ্যালয়ৰ সমন্বয়ৰ অভাৱৰ বাবে জিলাখনৰ কেইবাখনো গুৰুত্বপূৰ্ণ বিদ্যালয় এইক্ষেত্ৰত বঞ্চিত হোৱা বুলি অভিযোগ উত্থাপিত হৈছে ।
বঞ্চিত বিদ্যালয় সমূহক শীঘ্ৰে উচ্চতৰ মাধ্যমিক বিদ্যালয়লৈ উন্নীত কৰাৰ বাবে যোৰহাট জিলাৰ অভিভাৱক মন্ত্ৰী তথা শিক্ষা মন্ত্ৰী ৰণোজ পেগুক বিশেষ ব্যৱস্থা গ্ৰহণৰ বাবে আহ্বান জনাইছে বিভিন্নজনে ।