কৰিমগঞ্জত স্থানীয় ৰাইজে মৰিয়াই হত্যা কৰিলে এজন চোৰক; দুজনক আটক

সামান্য লোহাৰ সামগ্ৰী চুৰ কৰাৰ অপৰাধত তালিবানী কায়দাৰে মৰিয়াই মৰিয়াই হত্যা কৰিলে আব্দুল মতিন নামৰ এজন চোৰক। মানৱ সমাজক লজ্জানত কৰা এই ঘটনা সংঘটিত হৈছে কৰিমগঞ্জ জিলাৰ উত্তৰ কৰিমগঞ্জ বিধানসভা সমষ্টিৰ অন্তৰ্গত মালিপাৰা সুপ্ৰাকান্দি এলেকাত।

ঘটনা সন্দৰ্ভত জানিব পৰা মতে যোৱা ১৮ জানুৱাৰিত আব্দুল মতিন নামৰ চোৰজনে স্থানীয় এখন স্কুলৰ পৰা লোহাৰ সামগ্ৰী চুৰ কৰি স্থানীয় আকলিছ আলী নামৰ এজন ব্যক্তিৰ ওচৰত সামগ্ৰীখিনি বিক্ৰী কৰিছিল। স্থানীয় ৰাইজে এই ঘটনা জানিব পৰাত অভিযুক্ত আব্দুল মতিনক কৰায়ত্ত কৰি বেয়াকৈ মাৰধৰ কৰে।

এই ঘটনাৰ উমান পাই লগে লগে ঘটনাস্থলত কৰিমগঞ্জ আৰক্ষী উপস্থিত হৈ লোকজনক চিকিৎসালয়ত ভৰ্তি কৰোৱায়। কিন্তু মতিনৰ অৱস্থা সংকটজনক হোৱাত তেওঁক শিলচৰ চিকিৎসা মহাবিদ্যালয় হস্পিতালত ভৰ্তি কৰা হয় যদিও অৱশেষত শনিবাৰে নিশা চিকিৎসাধীন অৱস্থাতে তেওঁ শেষ নিশ্বাস ত্যাগ কৰে।

ইফালে এই নাৰকীয় হত্যাকাণ্ডৰ সৈতে জড়িত থকাৰ অভিযোগত কাজল মালাকাৰ আৰু স্বপন চন্দ নামৰ দুজন লোকক কৰায়ত্ত কৰি জেইললৈ প্ৰেৰণ কৰিছে। তদুপৰি ঘটনা সন্দৰ্ভত আৰক্ষীয়ে তদন্ত অব্যাহত ৰখাৰ লগতে অঞ্চলবাসীক শান্তি শৃংখলা অটুট ৰাখিবলৈ আহ্বান জনাইছে।