মাৰাত্মক কৰ’ণা ভাইৰাছৰ সংক্ৰমণ প্ৰতিৰোধ কৰিবলৈ প্ৰধান মন্ত্ৰী নৰেন্দ্ৰ মোদীয়ে ঘোষণা কৰা লকডাউনৰ আজি চতুৰ্থ দিন।
জৰুৰীকালীন সেৱাসমূহক বাদ কৰি এতিয়া সকলোবোৰ স্তব্ধ হৈ পৰিছে। দেশজুৰি স্তব্ধ হৈ পৰিছে বাছ সেৱা, ৰেল সেৱাকে ধৰি জল পৰিবহণ সেৱা।
যোৱা এসপ্তাহ ধৰি বন্ধ হৈ আছে মহানগৰীৰ বেতকুছিস্থিত আইএছবিটি। তাত এতিয়া শ্মশানসদৃশ পৰিৱেশে বিৰাজ কৰা পৰিলক্ষিত হৈছে।
দৈনিক ৬০০ৰ পৰা ৭০০ গাড়ী উত্তৰ পূৰ্বাঞ্চলৰ বিভিন্ন ৰাজ্যলৈ চলাচল কৰে আইএছবিটিৰ পৰা। কিন্তু লকডাউনৰ ফলত এতিয়া এনেদৰে শ-শ বাছ পৰি ৰৈছে উক্ত স্থানত।
অন্য সময়ত উক্ত স্থানত উত্তৰ-পূৰ্বাঞ্চলৰ বিভিন্ন ৰাজ্যৰ যাত্ৰীৰ ভিৰ পৰিলক্ষিত হয়। দূৰণিবটীয়া যাত্ৰীসকলে নিজ নিজ ঠাইৰ অভিমুখী বাছৰ বাবে ৰৈ থাকে এই বাছ আস্থানত।
কিন্তু এতিয়া নীৰৱ নিস্তব্ধ আইএছবিটি। এই নিমাওমাও পৰিৱেশৰ মাজতে আবদ্ধ হৈ ৰৈছে প্ৰায় অৰ্দ্ধ শতাধিক বাছচালক।
যোৱা এসপ্তাহে অত্যন্ত কষ্টৰ মাজেৰে দিন অতিবাহিত কৰিছে বাছচালকসকলে। তেওঁলোকৰ মাজত খাদ্য সা নাটনি হোৱাৰ লগতে খোৱাপানীৰ সুবিধাও লাভ কৰা নাই।
বাছচালকসকলৰ মাজৰ বেছিভাগ উজনি অসমৰ। লকডাউনৰ ফলত নিজৰ মৰমৰ ঘৰখনলৈ যাব পৰা নাই বাছচালকসকল।
তেওঁলোকে জনোৱা অনুসৰি আইএছবিটিত কেতিয়াও এনে অৱস্থা বা পৰিস্থিতিৰ সন্মুখীন হোৱা নাছিল।
এসাজ ভালদৰে খাবলৈ নোপোৱা এইসকল অসহায় বাছচালকসকলে আৰক্ষীৰ বিৰুদ্ধে অভিযোগ তুলি কয় যে তেওঁলোকক বাৰম্বাৰ সেই স্থান এৰিবলৈ ভাবুকি প্ৰদান কৰি আহিছে।
অত্যাৱশ্যকীয় সামগ্ৰী ক্ৰয় কৰিবলৈ গ’লেও আৰক্ষীয়ে ওভটাই পঠিয়াই এইসকল গাড়ীচালকক।
উল্লেখযোগ্য যে, সদাব্যস্ত এই স্থানত পূৰ্বে কেতিয়াও এনে পৰিস্থিতিৰ সৃষ্টি হোৱা নাছিল।
লকডাউনৰ ফলত আইএছবিটিত আৱদ্ধ হৈ পৰা এইসকল চালকে যিকোনো প্ৰকাৰে নিজৰ ঘৰখনলৈ যাবলৈ সুবিধা কৰি দিবলৈ ৰাজ্য চৰকাৰক আহ্বান জনায়।
