লকডাউনৰ সময়ত শিৱসাগৰ আৰক্ষীয়ে গ্ৰহণ কৰিছে বহুকেইটা গুৰুত্বপূৰ্ণ পদক্ষেপ। যিসকল বয়োজ্যেষ্ঠ লোক ঘৰত অকলে থাকে আৰু তেওঁলোকৰ ল’ৰা-ছোৱালী বাহিৰত বাস কৰে তেনে ব্যক্তিৰ সেৱাৰ বাবে শিৱসাগৰ আৰক্ষীয়ে হেল্প লাইন নম্বৰ মুকলি কৰি দিছে।
শিৱসাগৰ আৰক্ষীয়ে মুকলি কৰা হেল্পলাইন নম্বৰকেইটা হল 03772 222801, 9435500597, 9435729014 (।)
এই নম্বৰত ফোন কৰিলে আৰক্ষীয়ে সেইসকল ব্যক্তিক সহায় আগবঢ়াব বুলি জানিবলৈ দিছে।
লকডাউনৰ সময়ত শিৱসাগৰত অত্যাৱশ্যকীয় সামগ্ৰীৰ দোকান যেনে, গেলামাল দোকান আৰু ফাৰ্মাচীসমূহ দিনৰ ১০ বজাৰ পৰা আবেলি ৪ বজালৈ খুলিবলৈ অনুমতি দিয়া হৈছে।
তেনে দোকান আৰু ফাৰ্মাচীত সামাজিক দূৰত্ব বজাই ৰাখি সামগ্ৰী বিক্ৰী কৰিবলৈ নিৰ্দেশ দিয়া হৈছে দোকানীসকলক।
শিৱসাগৰ আৰক্ষীয়ে দোকান, ফাৰ্মাচীসমূহত এক মিটাৰ দূৰত্বত চিন দি গ্ৰাহকক সামাজিক দূৰত্ব বজাই ৰখাৰ প্ৰতি সজাগ কৰি তুলিছে।
ইফালে লকডাউনৰ মাজতে শিৱসাগৰৰ বিভিন্ন ঠাইত আবকাৰী বিভাগ আৰু আৰক্ষীয়ে অভিযান চলায়।
শিৱসাগৰ সদৰ অবকাৰী বিভাগে ডিমৌ আৰক্ষীৰ সহযোগত বৃহস্পতিবাৰে ডিমৌ অঞ্চলৰ বিভিন্ন স্থানত অভিযান চলায়।
ডিমৌৰ আঠাবাৰী চাহ বাগিছা, খঙ্গীয়া চাহ বাগিছা, দিচাং দেউৰী, দিচাং ৰজাবাৰী, কলাবাৰীকে ধৰি বিভিন্ন স্থানত অভিযান চলায়।
ঘৰৰ ভিতৰত আৰু হাবিৰ মাজত লুকুৱাই ৰখা বৃহৎ সংখ্যক চুলাই মদ, বিদেশী সুৰা, সুৰা প্ৰস্তুত বিভিন্ন দব্য সামগ্ৰী আদিও অভিযানত উদ্ধাৰ কৰা হয়।
কেইবাটাও চুলাই ঘাটিও অভিযানকাৰী দলটোৱে উচ্ছেদ কৰিছে।
ইয়াৰোপৰি শিৱসাগৰ সদৰ অবকাৰী বিভাগে শিৱসাগৰ আৰক্ষীৰ সহযোগত শিৱসাগৰ কোৱামৰা সন্দিকৈ মিচিং গাঁৱত অভিযান চলাই বৃহৎ পৰিমাণৰ দেশী-বিদেশী সুৰা জব্দ কৰে।
ৰামচনিদ্ৰ টায়ে নামৰ ব্যক্তি গৰাকীৰ ঘৰত তালাচী চলাই আৰক্ষী অবকাৰী বিভাগে প্ৰায় ৩০০ লিটাৰ দেশীয় সুৰা জব্দ কৰাৰ লগতে ১০ কাৰ্টুনৰো অধিক বিলাতী সুৰা জব্দ কৰে।
জব্দ কৰা সুৰাখিনি নষ্ট কৰি দিয়া হয়।
